ଇମ୍ଫାଲ, ୧୧ା୨ (ପି.ଟି.)- ନ୍ୟାଶନାଲ ଫୁଟ୍ବଲ ଫେଡେରେଶନ ଡେଭଲପମେଣ୍ଟ ଟିମ୍ ଇଣ୍ଡିଆନ ଆରୋଜ ଏବଂ ନେରୋକା ମଧ୍ୟରେ ମଙ୍ଗଳବାର ଖେଳାଯାଇଥିବା ଏକ ଆଇ-ଲିଗ୍ ମ୍ୟାଚ୍ ଗୋଲଶୂନ୍ୟ ଡ୍ର’ ଭାବେ ଶେଷ ହୋଇଛି। ଖୁମାନ ଲାମ୍ପାକ ଷ୍ଟାଡିୟମରେ ଅନୁଷ୍ଠିତ ଏହି ମ୍ୟାଚରେ ନେରୋକା ଦଳ ବହୁ ଗୋଲ ଦେବାର ସୁଯୋଗ ସୃଷ୍ଟି କରି ମଧ୍ୟ ବିଫଳ ହୋଇଥିଲା। ମଙ୍ଗଳବାର ଫଳାଫଳକୁ ନେଇ ନେରୋକା ସମାନ ସଂଖ୍ୟକ ମ୍ୟାଚରୁ ୧୨ ପଏଣ୍ଟ ସହ ଟେବୁଲର ୮ମ ସ୍ଥାନକୁ ଉନ୍ନୀତ ହୋଇଥିବାବେଳେ ଆରୋଜ ୧୧ଟି ମ୍ୟାଚରୁ ୮ ପଏଣ୍ଟ ଅର୍ଜନ କରି ସର୍ବନିମ୍ନ ସ୍ଥାନରେ ରହିଛି। ପ୍ରଥମାର୍ଦ୍ଧ ଖେଳ ସେତେଟା ଆକର୍ଷଣୀୟ ହୋଇପାରି ନ ଥିଲା। ନେରୋକା ଖେଳାଳିମାନେ ଆରୋଜ ଦଳର ରକ୍ଷଣଭାଗ ଖେଳାଳିଙ୍କ ଦୃଢ ବିରୋଧର ସମ୍ମୁଖୀନ ହୋଇଥିଲେ। ଇଣ୍ଡିଆନ ଆରୋଜ ପ୍ରଥମାର୍ଦ୍ଧ ଖେଳର ୫୨ ପ୍ରତିଶତ ସମୟ ବଲ୍କୁ ନିଜ ନିୟନ୍ତ୍ରଣରେ ରଖିଥିଲା। ଦଳ ଗୋଲପୋଷ୍ଟକୁ ୭ଥର ଶଟ୍ ମାରିଥିଲା। ତନ୍ମଧ୍ୟରେ ଥରେ ଟାର୍ଗେଟ କରିଥିଲା,ତାହା ପୁଣି ୪୨ତମ ମିନିଟ୍ରେ ଆୟୁଷ ଅଧିକାରୀଙ୍କ ଜରିଆରେ। ହେଲେ ନେରୋକା ଅଧିନାୟକ ମାର୍ଭିନ ଡେଭନ ଫିଲିପ୍ ଏହାୟି ଉଦ୍ୟମକୁ ପଣ୍ଡ କରିଦେଇଥିଲେ।