ଅନୁଗୋଳ ଅଫିସ, ୮।୭: ଗତବର୍ଷ ଅନୁଗୋଳର ଦୁଇଟି ବ୍ୟାଙ୍କରେ କଳାକନା ବୁଲାଇଥିଲେ ଡକାୟତ। ପ୍ରଥମେ ୨୦୧୮ ଏପ୍ରିଲ ୬ରେ ସହରର ଶଙ୍କର ସିନେମା ହଲ ନିକଟ ଆନ୍ଧ୍ର ବ୍ୟାଙ୍କରୁ ୨୩ ଲକ୍ଷ ଟଙ୍କା ଓ ୩ କେଜି ସୁନା ଡକାୟତି ହୋଇଥିଲା। ସେହିପରି ଜୁଲାଇ ୭ରେ ହରିମହୁରି ଛକସ୍ଥିତ ଇଣ୍ଡିଆନ୍ ବ୍ୟାଙ୍କରୁ ୮ ଲକ୍ଷ ଟଙ୍କା ଓ ୭ କେଜି ସୁନା ଲୁଟି ନିଆଯାଇଥିଲା। ଏହି ଦୁଇଟି ଘଟଣାରେ ୮ ଜଣିଆ ବିହାରୀ ଗ୍ୟାଙ୍ଗର ହାତ ଥିବା ପୋଲିସ ତଦନ୍ତରୁ ଜାଣିପାରିଥିଲେ ବି ଗ୍ୟାଙ୍ଗର ସର୍ଦ୍ଦାରଙ୍କ ସହ ୪ଜଣଙ୍କୁ ଗିରଫ କରିପାରିଛି। ଅନ୍ୟ ୪ଜଣ ଏବେ ବି ଫେରାର ରହିଛନ୍ତି। ସେହିପରି ଦୁଇଟି ବ୍ୟାଙ୍କରୁ ଡକାୟତି ହୋଇଥିବା ଟଙ୍କା ଓ ସୁନା ଉଦ୍ଧାର କରିବାରେ ପୋଲିସକୁ ସଫଳତା ମିଳିପାରି ନାହିଁ। ଇଣ୍ଡିଆନ ବ୍ୟାଙ୍କ ଡକାୟତି ପରେ ପୋଲିସ ପ୍ରଥମେ ଯେଉଁ ଦୁଇ ଅଭିଯୁକ୍ତଙ୍କୁ ଗିରଫ କରିଥିଲା ସେମାନଙ୍କ ନିକଟରୁ ମାତ୍ର ୩୪୩ ଗ୍ରାମ ସୁନା ଜବତ ହୋଇଥିଲା। ବାକି ଟଙ୍କା ଓ ସୁନା କୁଆଡ଼େ ଗଲା ତାହା ତଦନ୍ତାଧୀନ ଥିବା ବେଳେ ଗିରଫ ଗ୍ୟାଙ୍ଗ ସର୍ଦ୍ଦାର ମାଧବ ରବି ଦାସ ଡକାୟତି ଅର୍ଥରେ ଦେଶର ବିଭିନ୍ନ ସ୍ଥାନରେ ସମ୍ପତ୍ତି କିଣିଥିବା ପୋଲିସ ଜାଣିବାକୁ ପାଇଛି। ତେଣୁ ଉକ୍ତ ସମ୍ପତ୍ତି ସିଜ୍ କରିବାକୁ ଏବେ ଉଦ୍ୟମ କରାଯାଉଥିବା ଅନୁଗୋଳ ପୋଲିସ ପକ୍ଷରୁ ସୂଚନା ମିଳିଛି।
ଡକାୟତି ଘଟଣାର ତଦନ୍ତ କରୁଥିବା ଅନୁଗୋଳ ପୋଲିସ ୨୦୧୮ ଜୁଲାଇ ୧୭ରେ ବିହାରର ଗୟା ଜିଲା ବାରଚାଟି ଅଞ୍ଚଳରୁ ଓମ୍ ପ୍ରକାଶ ଦାସ ଓ ରାଜେଶ ଦାସଙ୍କୁ ଗିରଫ କରି ଅନୁଗୋଳ ଆଣିଥିଲା। ଏହାପରେ ଅନୁଗୋଳରେ ରହି ଗ୍ୟାଙ୍ଗ ସଦସ୍ୟଙ୍କୁ ପରିଚାଳନା କରୁଥିବା ମାଷ୍ଟର ମାଇଣ୍ଡ ତଥା ସର୍ଦ୍ଦାର ମାଧବ ରବି ଦାସଙ୍କ ସମ୍ପର୍କୀୟ ଯୋଗିନ୍ଦର ଦାସଙ୍କୁ ଗିରଫ କରିଥିଲା। ପରେ ସର୍ଦ୍ଦାର ମାଧବଙ୍କୁ ରାଞ୍ଚତ୍ରୁ ଗିରଫ କରାଯାଇଥିଲା। ଏହି ଡକାୟତି ଗ୍ୟାଙ୍ଗ ଦେଶର ବିଭିନ୍ନ ରାଜ୍ୟରେ ବ୍ୟାଙ୍କ ଡକାୟତିରେ ସମ୍ପୃକ୍ତ ଥିବାରୁ ୫ଟି ରାଜ୍ୟର ପୋଲିସ ଅନୁଗୋଳ ଆସି ଏମାନଙ୍କୁ ପଚରା ଉଚରା କରିଥିଲା। ଗିରଫ ୪ଜଣଙ୍କ ମଧ୍ୟରୁ ସର୍ଦ୍ଦାର ମାଧବ ରବି ଦାସ ଓ ଯୋଗିନ୍ଦର ଏବେ ଅନୁଗୋଳ ଜେଲରେ ଥିବା ବେଳେ ଓମ୍ ପ୍ରକାଶ ଓ ରାଜେଶଙ୍କୁ ବିହାର ବାରଚାଟି ଜେଲରେ ଛଡ଼ାଯିବା ପରେ ଆସାମସୋଲ ପୋଲିସ ରିମାଣ୍ଡରେ ନେଇଥିବା ସୂଚନା ମିଳିଛି। ଅନ୍ୟପକ୍ଷରେ ଗ୍ୟାଙ୍ଗ ସର୍ଦ୍ଦାରଙ୍କ ବ୍ୟାଙ୍କ ଆକାଉଣ୍ଟକୁ ପୋଲିସ ସିଜ୍ କରିବା ସହ ଦେଶର ବିଭିନ୍ନ ସ୍ଥାନରେ ଥିବା ତାଙ୍କର ସ୍ଥାବର ଓ ଅସ୍ଥାବର ସମ୍ପତ୍ତି ଜବତ କରିବାକୁ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି)କୁ ଚିଠି ଲେଖାଯାଇଥିଲା। ଏବେ ଉକ୍ତ ସମ୍ପତ୍ତିକୁ ଚିହ୍ନଟ ପାଇଁ ବିହାର ଓ ଅନୁଗୋଳ ପୋଲିସ ଯୋଜନା କରିଥିବା ଅନୁଗୋଳ ଏସ୍ପି ମିତ୍ରଭାନୁ ମହାପାତ୍ର ସୂଚନା ଦେଇଛନ୍ତି। ସେ କହିଛନ୍ତି, ବ୍ୟାଙ୍କ ଡକାୟତି ପରେ ମାଧବ ରବି ଦାସ ବିଭିନ୍ନ ଅଞ୍ଚଳରେ ଜମି କିଣି ଥିଲେ। ଉକ୍ତ ଜମିର ଚିହ୍ନଟ ପାଇଁ ଅନୁଗୋଳ ପୋଲିସ ଓ ଗୟା ପୋଲିସକୁ ଆୟକର ବିଭାଗ ଅଧିକାରୀମାନେ ସହଯୋଗ କରିବେ ବୋଲି ଚିଠି ଯିବା ପରେ ଉକ୍ତ ବିଭାଗ ପକ୍ଷରୁ ସହମତି ମିଳିଛି। ଏଥିସହ ପୂରା ଘଟଣାରେ ଓଡ଼ିଶା କ୍ରାଇମ୍ ବ୍ରାଞ୍ଚ ସହଯୋଗ କରୁଥିବା ଏସ୍ପି ମହାପାତ୍ର କହିଛନ୍ତି।