କେନ୍ଦୁଝର, ୧୨ା୬ (ସ୍ବ.ପ୍ର.)- ଦୃଢ ମନୋବଳ ଆଉ ସାହସ ଥିଲେ ଭିନ୍ନକ୍ଷମ ବି ସବୁ କିଛି କରିପାରେ। ଏହାର ଏକ ନିଚ୍ଛକ ଉଦାହରଣ ସାଜିଛନ୍ତି କେନ୍ଦୁଝରର ଅଭୟ କୁମାର ଜେନା। ନୂଆଦିଲ୍ଲୀରେ ଚଳିତମାସ୧୯ରୁ ୨୩ ପର୍ଯ୍ୟନ୍ତ ହେବାକୁ ଥିବା ଇଣ୍ଡିଆନ ହ୍ବିଲଚେୟାର ପ୍ରିମିୟର ଲିଗ (ଆଇଡବ୍ଲ୍ୟୁପିଏଲ) କ୍ରିକେଟ ସେଶନ -୨ରେ ଖେଳିବା ଲାଗି ସୁଯୋଗ ପାଇଛନ୍ତି। ପୁଣି ଅଲରାଉଣ୍ଡର ଭାବେ ଖେଳିଥାନ୍ତି ସେ।
ଅଭୟଙ୍କ ଘର କେନ୍ଦୁଝର ସହର ଜଗନ୍ନାଥପୁର ସାହିରେ। ଦଶମ ଶ୍ରେଣୀରୁ ପାଠ ଛାଡି ଦେଇ ବିଭିନ୍ନ ସାମାଜିକ କାର୍ଯ୍ୟରେ ନିୟୋଜିତ ହୋଇଥିଲେ। ବିଶେଷ କରି ଦିବ୍ୟାଙ୍ଗଙ୍କ ବିକାଶ ତଥା ସେମାନଙ୍କ ସ୍ବାବଲମ୍ବୀ ହେବା କ୍ଷେତ୍ରରେ କାର୍ଯ୍ୟ ଜାରୀ ରଖିଛନ୍ତି। ଅପରପକ୍ଷରେ ଖେଳ ପ୍ରତି ତାଙ୍କର ପିଲାବେଳୁ ଢେର ଆଗ୍ରହ ଥିଲା। ଓଡିଶା ଦଳ ପାଇଁ ଚୟନ ହୋଇଥିବା ବେଳେ ଆଇଡବ୍ଲ୍ୟୁପିଏଲରେ ଖେଳିବାକୁ ସୁଯୋଗ ମିଳିଥିବାରୁ ସେ ବେଶ ଖୁସି ଥିବା କହିଛନ୍ତି। ଏହି ପ୍ରତିଯୋଗିତାରେ ସବୁ ରାଜ୍ୟରୁ ମୋଟ ୮ଟି ଦଳ ଭାଗ ନେଉଛନ୍ତି। ଗ୍ରୁପ ଏ’ରେ ମହାରାଷ୍ଟ୍ର ଟାଇଗର୍ସ, ଦିଲୀ ସୁପରଷ୍ଟାର, ଉତ୍ତରପ୍ରଦେଶ ହିରୋସ, ବିହାରୀ ଦବଙ୍ଗ ଦଳ ଏବଂ ଗ୍ରୁପ ବି’ରେ ଗୁଜୁରାଟ ଫାଇଟର, ରାଜସ୍ଥାନ ରାଜଓ୍ବାଡେ, ଉତ୍ତରାଖଣ୍ଡ ଓ୍ବାରିଅର୍ସ, ଚେନାଇ ସୁପର ଷ୍ଟ୍ରଙ୍ଗ ଦଳ ଭାଗ ନେଉଛନ୍ତି ା ପ୍ରତ୍ୟେକ ଦଳ ୨୦ ଓଭର ବିଶିଷ୍ଟ ତିନୋଟି ଲେଖାଏଁ ମ୍ୟାଚ ଖେଳିବେ । ଏଥିପାଇଁ ସେ କ୍ରିକେଟ କୋଚ ଗିରିଶ ଚନ୍ଦ୍ର ହୋତାଙ୍କ ତତ୍ତ୍ୱାବଧାନରେ ଜୋରଦାର ଅଭ୍ୟାସ ଚଳାଇଥିବା କୁହନ୍ତି। ଅବଶ୍ୟ ଆଇଡବ୍ଲ୍ୟୁପିଏଲ ପରେ ମୁମ୍ବାଇ ସିରିଜ ହେବ। ସେଥିରେ ଓଡିଶା ଦଳ ପକ୍ଷରୁ ଖେଳିବେ ବୋଲି ସେ କହିଛନ୍ତି। ଆସନ୍ତା ୨୦୨୦ରେ ଥାଇଲାଣ୍ଡରେ ହେବାକୁ ଥିବା ବିଶ୍ୱକପ ପ୍ରତିଯୋଗିତାରେ ମଧ୍ୟ ଖେଳିବାକୁ ତାଙ୍କୁ ସୁଯୋଗ ମିଳିବ ବୋଲି ସେ ଦୃଢ ଆଶାବାଦୀ। କ୍ରୀଡା କ୍ଷେତ୍ରରେ ଦିବ୍ୟାଙ୍ଗ ମାନେ ବି ପାରଙ୍ଗମ ା କ୍ରୀଡା ଦ୍ୱାରା ସମାଜର ମୁଖ୍ୟସ୍ରୋତରେ ସାମିଲ କରାଯିବା ନେଇ ହ୍ବିଲ ଚେୟାର କ୍ରିକେଟ ଆସୋସିଏଶନ ପକ୍ଷରୁ ପଦକ୍ଷେପ ନିଆଯାଉଛି ବୋଲି କହିଛନ୍ତି ଅଭୟ। ପ୍ରଥମ ଥର ପାଇଁ ଓଡିଶାରେ ହ୍ବିଲଚେୟାର କ୍ରିକେଟ ଟିମ ଗଠନ ହୋଇଥିବା ବେଳେ ଆଗାମୀ ଦିନରେ ବହୁ ଦିବ୍ୟାଙ୍ଗ ପିଲା ଏଥିରେ ଖେଳିପାରିବେ। ଜିଲା ପ୍ରଶାସନ ଏଥିପ୍ରତି ଦୃଷ୍ଟି ଦେବା ସହ ସହାୟତା କଲେ କେନ୍ଦୁଝରରେ ମଧ୍ୟ ଏକ ଟିମ ଗଠନ ହୋଇପାରିବ ବୋଲି ଆଶାବ୍ୟକ୍ତ କରିଛନ୍ତି ଅଭୟ ା