ଭଦ୍ରକ ଅଫିସ, ୧୨।୮- ସୋମବାର ଇଦ୍-ଉଲ୍-ଜୁହା ପର୍ବ। ଏଥିପାଇଁ ଭଦ୍ରକ ସହରରେ ଥିବା ବିଭିନ୍ନ ମସ୍ଜିଦ, ସମୂହ ନମାଜ ପାଠ ହେବାକୁ ଥିବା କଦମବେଡା ଇଦ୍ଗାହା ଅଞ୍ଚଳର ପରିବେଶ ଉତ୍ସବମୁଖର ହୋଇଉଠିଛି। ସହରରେ ଭାଇଚାରା ଓ ସଦ୍ଭାବନା ରକ୍ଷା କରି ଏହି ପର୍ବ ପାଳନ କରିବା ଲାଗି ପ୍ରଶାସନ ପକ୍ଷରୁ ଗୁରୁତ୍ୱାରୋପ କରାଯାଇ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି। ସମ୍ବେଦନଶୀଳ ଅଞ୍ଚଳ କୁହାଯାଉଥିବା ସହରର ପୁରୁଣାବଜାର ଇଲାକାରେ ଦୁଇଦିନ ଧରି ଜିଲା ପୋଲିସ ପକ୍ଷରୁ ଫ୍ଲାଗମାର୍ଚ୍ଚ କରାଯିବା ସହ କଡ଼ା ପୋଲିସ ପହରା ଦିଆଯାଇଛି। ଶନିବାର ବିଳମ୍ବିତ ରାତିରେ ଡିଆଇଜି ଅମିତେନ୍ଦ୍ର ନାଥ ସିହ୍ନା ଭଦ୍ରକରେ ପହଞ୍ଚି ସୁରକ୍ଷା ବ୍ୟବସ୍ଥା ଅନୁଧ୍ୟାନ କରିଥିଲେ। ପରେ ଟାଉନ ଥାନା ଓ ପୁରୁଣାବଜାର ଥାନା ଅଞ୍ଚଳରେ ପହଞ୍ଚି ସୁରକ୍ଷା ବ୍ୟବସ୍ଥା ଯାଞ୍ଚ କରି ସେ ଫେରିଛନ୍ତି। ଏସ୍ପି ରାଜେଶ ପଣ୍ଡିତଙ୍କ ନେତୃତ୍ୱରେ ପୁରୁଣାବଜାର ଥାନା ଅଞ୍ଚଳରେ ୧୭ ପ୍ଲାଟୁନ ଫୋର୍ସ ମୁତୟନ କରାଯାଇଛି। କଦମବେଡା ଇଦ୍ଗାହା ନିକଟରେ ସମୂହ ନମାଜ ପାଠ ସ୍ଥଳରେ ମଧ୍ୟ କଡ଼ା ସୁରକ୍ଷା ବ୍ୟବସ୍ଥା ହୋଇଛି। ସହରାଞ୍ଚଳରେ ଥିବା ସମସ୍ତ ମନ୍ଦିର ଓ ମସ୍ଜିଦ୍ଗୁଡ଼ିକରେ ପୋଲିସ ମୁତୟନ ସହ ଭ୍ରାମ୍ୟମାଣ ପୋଲିସର ପାଟ୍ରୋଲିଂ ବ୍ୟବସ୍ଥା କରାଯାଇଛି। ୪ ଅତିରିକ୍ତ ଏସ୍ପି, ୯ ଡିଏସ୍ପି, ୧୫ ଇନ୍ସପେକ୍ଟର, ୬୯ ଏସ୍ଆଇ, ଏଏସ୍ଆଇ, ୬ ହାବିଲଦାର, ୪୯ ଓଆର୍ କନଷ୍ଟେବଳ ଓ ୧୪୦ ହୋମଗାର୍ଡ ମୁତୟନ ରହିଛନ୍ତି। ଚଉଦ ମହଲା ମୁସ୍ଲିମ ଜମାତ ସଭାପତି ମହମ୍ମଦ ଅବଦୁଲ ବାରି କହିଛନ୍ତି, ସୋମବାର ପୂର୍ବାହ୍ନ ୯ଟା ବେଳେ ୧୦ ହଜାରରୁ ଊର୍ଦ୍ଧ୍ୱ ମୁସ୍ଲିମ ଧର୍ମାବଲମ୍ବୀ ସମୂହ ନମାଜପାଠରେ ଯୋଗଦେବେ। ଏଥିଲାଗି ପ୍ରସ୍ତୁତି ବୈଠକ ବସି ସମସ୍ତ କାର୍ଯ୍ୟକ୍ରମ ଚୂଡ଼ାନ୍ତ କରାଯାଇଛି। ସମୂହ ନମାଜପାଠରେ ସାମିଲ ହୋଇଥିବା ଲୋକଙ୍କୁ ସେଠାରେ ବିଭିନ୍ନ ସମ୍ପ୍ରଦାୟର ତଥା ରାଜନୈତିକ ଦଳର ବ୍ୟକ୍ତିବିଶେଷଙ୍କ ପକ୍ଷରୁ ଶୁଭେଚ୍ଛା ଜଣାଇବା କାର୍ଯ୍ୟକ୍ରମ ରହିଛି।