ଲକ୍ଷ୍ନୌ,୨୦।୭: ଜମି ବିବାଦରେ ଗୋଣ୍ଡ ଜନଜାତି ସମ୍ପ୍ରଦାୟର ୧୦ ଜଣ ମହିଳା-ପୁରୁଷଙ୍କ ମୃତ୍ୟୁ ଘଟିଛି। ଉତ୍ତରପ୍ରଦେଶ ସୋନଭଦ୍ର ଜିଲାରେ ଏଭଳି ଘଟଣା ଘଟିଛି। ୩୨ଟି ଟ୍ରାକ୍ଟରରେ ୩ଶହ ଲୋକ ଆସି ଏହି କାଣ୍ଡ ଭିଆଇଥିବା କୁହାଯାଉଛି। ପୀଡ଼ିତ ପରିବାର ସଦସ୍ୟଙ୍କୁ ଭେଟିବାକୁ ଯାଉଥିବା କଂଗ୍ରେସ ରାଷ୍ଟ୍ରୀୟ ମହାସଚିବ ପ୍ରିୟଙ୍କା ଗାନ୍ଧି ଭଦ୍ରାଙ୍କୁ ବାଟରେ ଅଟକ ରଖାଯାଇଥିଲା। ତେବେ ପ୍ରିୟଙ୍କା ରାସ୍ତାରେ ଧାରଣାରେ ବସିଥିଲେ। ପ୍ରିୟଙ୍କାଙ୍କ ଏହି ଫଟୋ ୧୯୭୭୯ ଅଗଷ୍ଟ ୧୩ରେ ରାସ୍ତାରେ ଧାରଣାରେ ବସିଥିବା ପୂର୍ବତନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧିଙ୍କ ଫଟୋ ସହ ମେଳ ଖାଉଛି। ଇନ୍ଦିରା ବିହାର ବେଲଚିରେ ହୋଇଥିବା ଏକ ହତ୍ୟାକାଣ୍ଡ ଘଟଣାରେ ପୀଡ଼ିତ ପରିବାରଙ୍କୁ ଭେଟିବାକୁ ଯାଇଥିଲେ। ଏହି ଘଟଣାରେ ୧୧ ଜଣଙ୍କୁ ହତ୍ୟା କରାଯାଇଥିଲା। ସେତେବେଳେ ଇନ୍ଦିରା କ୍ଷମତାରେ ନ ଥିଲେ। ସେତେବେଳେ ବିହାରରେ ବନ୍ୟା ହୋଇଥିବାରୁ ଇନ୍ଦିରା ହାତୀରେ ବସି ପୀଡ଼ିତଙ୍କୁ ଦେଖା କରିବାକୁ ଯାଇଥିଲେ। ସେ ସେଠାରେ ଧାରଣାରେ ବସିଥିଲେ ବୋଲି କୁହାଯାଉଛି। ଏହାପରେ ଇନ୍ଦିରା ପୁଣି ଥରେ କ୍ଷମତା ଦଖଲ କରିଥିଲେ। ଇନ୍ଦିରା ଏବଂ ପ୍ରିୟଙ୍କା ଧାରଣାରେ ବସି ଥିବା ଏହି ଫଟୋ ଏବେ ସୋସିଆଲ୍ ମିଡ଼ିଆରେ ଭାଇରାଲ ହେବାରେ ଲାଗିଛି। ପ୍ରିୟଙ୍କା ଇନ୍ଦିରାଙ୍କ ପଦାନୁସରଣ କରୁଛନ୍ତି ବୋଲି ଲୋକେ କମେଣ୍ଟ ଦେବା ଆରମ୍ଭ କରିଛନ୍ତି।