ଜାତିସଂଘ,୨୮।୯(ପି.ଟି.): ଜମ୍ମୁ-କଶ୍ମୀରରୁ ଭାରତ ‘ଅମାନବୀୟ କର୍ଫ୍ୟୁ’ ହଟାଉ। ଏହାସହ ସମସ୍ତ ‘ରାଜନୈତିକ ବନ୍ଦୀ’ଙ୍କୁ ତୁରନ୍ତ ମୁକ୍ତ କରୁ ବୋଲି ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ୍ ଖାନ ଶୁକ୍ରବାର ଜାତିସଂଘରେ ଦାବି କରିଛନ୍ତି। ୟୁଏନ୍ଜିଏରେ ମୋଦି କଶ୍ମୀର ସମ୍ପର୍କରେ ପଦୁଟିଏ କହି ନ ଥିବାବେଳେ ଇମ୍ରାନ ଅନ୍ତର୍ଜାତୀୟ ସମୁଦାୟ ଆଗରେ ଏହି ପ୍ରସଙ୍ଗ ଉଠାଇଥିଲେ।
ଇମ୍ରାନ ୫୦ ମିନିଟ ଭାଷଣର ଅଧା ସମୟ କଶ୍ମୀର ପ୍ରସଙ୍ଗରେ କହିଥିଲେ। ଭାରତ ଜମ୍ମୁ-କଶ୍ମୀରର ସ୍ବାୟତ୍ତତା ପ୍ରତ୍ୟାହାର କରି ଜାତିସଂଘ ସୁରକ୍ଷା ପରିଷଦର ୧୧ ସଂକଳ୍ପନାମା, ଶିମ୍ଲା ରାଜିନାମା ଓ ନିଜ ସମ୍ବିଧାନକୁ ଉଲ୍ଲଂଘନ କରିଛି। ଏହାକୁ ନେଇ ଆଣବିକ ଅସ୍ତ୍ରସମ୍ପନ୍ନ ଦୁଇ ପଡ଼ୋଶୀ ମୁହଁାମୁହଁି ହେଲେ ପରିଣାମ ଭୟାବହ ହେବ। ୯/୧୧ ଆକ୍ରମଣ ପରେ ଇସ୍ଲାମୋଫୋବିଆ (ଇସ୍ଲାମ ପ୍ରତି ଭୟ ଓ ଘୃଣା) ବ୍ୟାପକ ଭାବେ ବୃଦ୍ଧି ପାଇଛି। ଇସ୍ଲାମୋଫୋବିଆ ବିଶ୍ୱକୁ ଭାଗଭାଗ କରୁଛି। ମୁସ୍ଲିମ ମହିଳାଙ୍କୁ ଅନ୍ୟ ଦେଶରେ ସେମାନଙ୍କ ବୁର୍ଖା କାଢ଼ିବାକୁ କୁହାଯାଉଛି। ବିଦେଶରେ ଜଣେ ମହିଳା ତାଙ୍କ ପୋଷାକ କାଢ଼ିପାରିବେ। କିନ୍ତୁ ବୁର୍ଖା କାହିଁକି ପିନ୍ଧିପାରିବେ ନାହିଁ। ଏହାର କାରଣ ହେଉଛି କେତେଜଣ ଆତଙ୍କବାଦ ସହ ଇସ୍ଲାମକୁ ଯୋଡ଼ୁଛନ୍ତି। ଭାରତ ସବୁବେଳେ ଆମ ବିରୋଧରେ ଆତଙ୍କବାଦର ଅଭିଯୋଗ ଆଣୁଛି। କିନ୍ତୁ ପାକିସ୍ତାନରେ ଆତଙ୍କବାଦୀ ନାହାନ୍ତି। ଜାତିସଂଘର ଅଧିକାରୀମାନେ ପାକିସ୍ତାନ ଆସି ଯାଞ୍ଚ କରିପାରନ୍ତି। ସେହିପରି ପାକିସ୍ତାନକୁ ଏକ ଶିକ୍ଷା ଦିଆଯାଇଛି ବୋଲି ମୋଦି ନିର୍ବାଚନ ବେଳେ ପ୍ରଚାର କରିଥିଲେ। ଏହା ଏକ ମିଛ ଥିଲା। ପୁଲଓ୍ବାମା ଆକ୍ରମଣ ପରେ ଭାରତ ଆମ ଉପରେ ଦୋଷ ଦେଇଥିଲା। ଆମେ ପ୍ରମାଣ ମାଗିବାରୁ ସେମାନେ ପାକିସ୍ତାନକୁ ଯୁଦ୍ଧବିମାନ ପଠାଇଥିଲେ। ମୋଦିଙ୍କ ଜୀବନ ହେଉଛି ଆର୍ଏସ୍ଏସ୍, ଯାହାକି ଆଡୋଲ୍ଫ ହିଟ୍ଲର ଓ ବେନିତୋ ମୁସୋଲିନିଙ୍କ ଆଦର୍ଶରେ ଅନୁପ୍ରାଣିତ। ପାରମ୍ପରିକ ଯୁଦ୍ଧ ଆରମ୍ଭ ହେଲେ ଆମେ କ’ଣ କରିବୁ ବୋଲି ନିଜକୁ ନିଜେ ମୁଁ ବହୁଥର ପ୍ରଶ୍ନ କରିଛି। ଦୁଇ ଆଣବିକ ଅସ୍ତ୍ରସମ୍ପନ୍ନ ଦେଶ ଲଢ଼େଇ କଲେ ଯାହା ହୁଏ ତାହା ସମସ୍ତେ ଚିନ୍ତା କରନ୍ତୁ ବୋଲି ଇମ୍ରାନ କହିଛନ୍ତି। କେତେକ ଦେଶ ଜଳବାୟୁ ପରିବର୍ତ୍ତନକୁ ନେଇ ଗମ୍ଭୀର ନୁହନ୍ତି। ପାକିସ୍ତାନରେ ତାଙ୍କ ଦଳ ପିପିପି କ୍ଷମତାକୁ ଆସିବା ପରେ ଲକ୍ଷ ଲକ୍ଷ ବୃକ୍ଷ ରୋପଣ କରାଯାଇଛି। କିନ୍ତୁ ଗୋଟିଏ ଦେଶ ସବୁକିଛି କରିପାରିବ ନାହିଁ। ଇମ୍ରାନ ଭାଷଣ ଦେବାବେଳେ ମୋଦି ସଭା ଛାଡ଼ି ଚାଲିଯାଇଥିଲେ।