ନୂଆଦିଲ୍ଳୀ,୨୯।୪: ବଲିଉଡ ଅଭିନେତା ଇର୍ଫାନ ଖାନ୍ଙ୍କ ପରଲୋକରେ ସାରା କ୍ରୀଡ଼ାଜଗତ ଶୋକ ପ୍ରକାଶ କରିଛି। ୫୪ ବର୍ଷରେ ଇର୍ଫାନ କ୍ୟାନ୍ସର କାରଣରୁ ମୁମ୍ବାଇର କୋକିଳାବେନ ହସ୍ପିଟାଲରେ ବୁଧବାର ମୃତ୍ୟୁବରଣ କରିଥିବା ବେଳେ କ୍ରିକେଟ ଆଇକନ ସଚିନ ତେନ୍ଦୁଲକର, ଭାରତୀୟ ଅଧିନାୟକ ବିରାଟ କୋହଲି, ପୂର୍ବତନ ବିସ୍ଫୋରକ ଓପନର ବୀରେନ୍ଦ୍ର ସେହ୍ବାଗ, ଭାରତୀୟ ହକି ଅଧିନାୟକ ମନ୍ପ୍ରୀତ ସିଂ, ପୂର୍ବତନ ଅଲରାଉଣ୍ଡର ଯୁବରାଜ ସିଂ, ଓପନର ଶିଖର ଧାଓ୍ବନ, ମହମ୍ମଦ କୈଫ, ଅମିତ ମିଶ୍ରା, ହିମା ଦାସ, ବକ୍ସର ବିଜେନ୍ଦର ସିଂଙ୍କ ଭଳି କ୍ରୀଡ଼ାବିତ୍ ଦୁଃଖ ପ୍ରକାଶ କରିବା ସହ ତାଙ୍କ ପରିବାର ସଦସ୍ୟଙ୍କୁ ସମବେଦନା ଜଣାଇଛନ୍ତି।
ଇର୍ଫାନ ମୋର ଫେଭରାଇଟ୍ ଅଭିନେତା ଥିଲେ। ତାଙ୍କର ସବୁ ସିନେମା ଦେଖିଛି। ଶେଷ ସିନେମା ଅଙ୍ଗ୍ରେଜି ମିଡିମ ମଧ୍ୟ ଦେଖିଛି। ତାଙ୍କର ଆତ୍ମାର ସଦ୍ଗତି ହେଉ ବୋଲି ସଚିନ ଟୁଇଟ୍ କରି ଉଲ୍ଲେଖ କରିଛନ୍ତି। ତାଙ୍କ ପରିବାରକୁ ସମବେଦନା ଜଣାଉଛି ବୋଲି ସେ କହିଛନ୍ତି। ସେହିପରି ସେ ଜଣେ ମହାନ୍ ଅଭିନେତା ତଥା ମଣିଷ ଥିଲେ। ତାଙ୍କ ପରିବାର ପ୍ରତି ସମବେଦନା ଜଣାଉଛି ବୋଲି ସେହ୍ବାଗ ଟୁଇଟ୍ କରି ଜଣାଇଛନ୍ତି। ଇର୍ଫାନ ଜଣେ ପ୍ରତିଭାସମ୍ପନ୍ନ ଅଭିନେତା ଥିଲେ ଓ ଅଭିନୟର ଯାଦୁରେ ସେ ସମସ୍ତଙ୍କ ହୃଦୟକୁ ଛୁଇଁଥିଲେ। ତାଙ୍କ ଆତ୍ମାର ସଦ୍ଗତି ହେଉ ବୋଲି କୋହଲି ଟୁଇଟ କରି ଶୋକ ପ୍ରକାଶ କରିଛନ୍ତି। ଆମେ ଜଣେ ମହାନ୍ ଅଭିନେତାଙ୍କୁ ହରାଇଲୁ ବୋଲି ହିମା ଟୁଇଟ କରି ଉଲ୍ଲେଖ କରିଛନ୍ତି। ଇର୍ଫାନ ମୋର ଅନ୍ୟତମ ପ୍ରିୟ ଅଭିନେତା ଥିଲେ ଓ ତାଙ୍କ ଅଭିନୟ କାରଣରୁ ସେ ସବୁଦିନ ଜୀବିତ ରହିବେ ବୋଲି କୈଫ୍ କହିଛନ୍ତି। ସେହିପରି ଆମେ ସବୁଦିନ ପାଇଁ ତାଙ୍କୁ ହରାଇଲୁ ବୋଲି ଅମିତ୍ କହିଛନ୍ତି। ସେହିପରି ଇର୍ଫାନଙ୍କ ସମସ୍ୟା, ସଂଘର୍ଷ, ଯନ୍ତ୍ରଣା ସହିତ ମୁଁ ଭଲ ଭାବେ ପରିଚିତ ବୋଲି ଯୁବରାଜ କହିଛନ୍ତି। ଇର୍ଫାନଙ୍କ ଆତ୍ମାର ସଦ୍ଗତି ହେଉ ବୋଲି ଯୁବରାଜ ଟୁଇଟ୍ କରିଛନ୍ତି। ଉଲ୍ଲେଖଥାଉ କି, କର୍କଟ ରୋଗରେ ପୀଡିତ ହେବା କାରଣରୁ ଇର୍ଫାନ ଲଣ୍ଡନରେ ତାଙ୍କର ଚିକିତ୍ସା କରାଇଥିଲେ। ତେବେ ଗତ କିଛିଦିନ ମଧ୍ୟରେ ତାଙ୍କର ସ୍ବାସ୍ଥ୍ୟାବସ୍ଥା ଆହୁରି ଖରାପ ହୋଇଯାଇଥିଲା।