ଭୁବନେଶ୍ୱର,୧୨।୯(ସ୍ପୋଟର୍ସ ବ୍ୟୁରୋ)- ସ୍ଥାନୀୟ ପଟିଆସ୍ଥିତ ୬ ପକେଟ୍ସଠାରେ ଚାଲିଥିବା ଫାଲ୍କନ ଚିଲିକା ଇଷ୍ଟ ଜୋନ୍ ସ୍ନୁକର ଚାମ୍ପିୟନଶିପ୍ ବୁଧବାର ସପ୍ତମ ଦିବସରେ ପହଞ୍ଚିଛି। ଟୁର୍ନାମେଣ୍ଟର କ୍ୱାର୍ଟର ଫାଇନାଲ ଲାଇନ୍ଅପ୍ ଚୂଡାନ୍ତ ହୋଇଛି। କ୍ୱାର୍ଟର ଫାଇନାଲରେ ପଶ୍ଚିମବଙ୍ଗର ମନୀଷ ଜୈନ ଓ ଓଡ଼ିଶାର ଆଶୁତୋଷ ପାଢ଼ୀ, ପଶ୍ଚିମବଙ୍ଗର ଶାହବାଜ ଆଦିଲ ଖାଁ ଓ ଓଡ଼ିଶାର ସୌଭାଗ୍ୟ ବେହେରା, ଓଡ଼ିଶାର ସୁବ୍ରତ ଦାସ ଓ ସୋଏବ ଖାଁ ଏବଂ ଓଡ଼ିଶାର ଆକାଶ ମହାପାତ୍ର ଓ ରେଲଓ୍ବେର ନୀରଜ କୁମାର ପରସ୍ପରକୁ ଭେଟିବେ। ଶୁକ୍ରବାର କ୍ୱାର୍ଟର ଫାଇନାଲ ମ୍ୟାଚଗୁଡିକ ଖେଳାଯିବ।
ସୁବ୍ରତ ଦାସଙ୍କ ଛାତ୍ର ତଥା ଅଣସିଡ୍ ଖେଳାଳି ଓଡ଼ିଶାର ସୌଭାଗ୍ୟ ବେହେରା ଏକ ବଡ଼ ବିପର୍ଯ୍ୟୟ ଘଟାଇବା ସହ କ୍ୱାର୍ଟର ଫାଇନାଲରେ ପ୍ରବେଶ କରିଛନ୍ତି। ବୁଧବାର ସେ ଭାରତର ପୂର୍ବତନ ୭ ନମ୍ବର ଖେଳାଳି ତଥା ଏକାଧିକ ବାର ଓ୍ବେଷ୍ଟ ବେଙ୍ଗଲ୍ ଟାଇଟଲ ଜିତିଥିବା ଆମୀର ହୁସେନଙ୍କୁ ୪-୧ରେ କ୍ୱାର୍ଟରକୁ ଉଠିଛନ୍ତି। ସେହିପରି ପୂର୍ବତନ ଓ୍ବେଷ୍ଟବେଙ୍ଗଲ ଚାମ୍ପିୟନ ତଥା ସବ୍ ଜୁନିୟର ଜାତୀୟ ଚାମ୍ପିୟନ ସୋଏବ ଖାଁ ୪-୨ରେ ଓଡ଼ିଶାର ରାକେଶ ରୋଶନ ପ୍ରଧାନଙ୍କୁ ହରାଇ କ୍ୱାର୍ଟର ଫାଇନାଲରେ ପ୍ରବେଶ କରିଛନ୍ତି। ଅନ୍ୟପଟେ ପୂର୍ବରୁ ଏକାଧିକବାର ଓ୍ବେଷ୍ଟବେଙ୍ଗଲ ଚାମ୍ପିୟନ ହୋଇଥିବା ପୂର୍ବତନ ଜୁନିୟର ୨ ନମ୍ବର ଖେଳାଳି ପଶ୍ଚିମବଙ୍ଗର ମନୀଷ ଜୈନ ୪-୩ରେ ଛତିଶଗଡ଼ର ଆଦର୍ଶ ବର୍ମାଙ୍କୁ ହରାଇ କ୍ୱାର୍ଟର ଫାଇନାଲରେ ପ୍ରବେଶ କରିଛନ୍ତି। ଅନ୍ୟଏକ ମ୍ୟାଚ୍ରେ ରେଲଓ୍ବେର ଶ୍ରେଷ୍ଠ ତଥା ଭାରତର ୩୨ ନମ୍ବର ଖେଳାଳି ପଶ୍ଚିମବଙ୍ଗର ନୀରଜ କୁମାର ୪-୦ରେ ଓଡ଼ିଶାର ଜିତେନ ଷଡଙ୍ଗୀଙ୍କୁ ହରାଇ କ୍ୱାର୍ଟରକୁ ଉଠିଛନ୍ତି।
ସେହିପରି ମଙ୍ଗଳବାର ଓଡ଼ିଶାର ଆଶୁତୋଷ ପାଢ଼ୀ ୪-୧ରେ ପଶ୍ଚିମବଙ୍ଗର କିଙ୍ଗସୁକ୍ ଶାହାଙ୍କୁ ୪-୧ରେ ହରାଇ କ୍ୱାର୍ଟରକୁ ଉଠିଥିଲେ। ଅନ୍ୟ ଏକ ମ୍ୟାଚ୍ରେ ଓଡ଼ିଶାର ଆକାଶ ମହାପାତ୍ର ନିଜ ରାଜ୍ୟର ମହମ୍ମଦ ରାଜାଙ୍କୁ ୪-୨ରେ ହରାଇ କ୍ୱାର୍ଟରକୁ ଉଠିଥିଲେ।