ଜଗତ୍ସିଂହପୁର ଅଫିସ,୧୮ା୩: ସରକାରୀ କର୍ମଚାରୀ ଇ-ଅଫିସ ମାଧ୍ୟମରେ ଘରେ ରହି ମଧ୍ୟ କାମ କରିପାରିବେ। ଇ-ଅଫିସ ଏଭଳି ଜରୁରୀ ପରିସ୍ଥିତିରେ ବେଶ୍ ସହାୟକ ହୋଇପାରିଛି ବୋଲି ଜିଲାପାଳ ସଂଗ୍ରାମ କେଶରୀ ମହାପାତ୍ର କହିଥିଲେ। କୌଣସି ଲୋକ ଜିଲାପାଳଙ୍କ ନିକଟକୁ ନ ଆସି ମୋବାଇଲ କିମ୍ବା କମ୍ପ୍ୟୁଟର ମାଧ୍ୟମରେ ଅଭିଯୋଗ କରିପାରିବେ। ଅନ୍ୟପକ୍ଷରେ ଜିଲାର ୨ଜଣ କରୋନା ସନ୍ଦିଗ୍ଧ ସୋମବାର ଚିହ୍ନଟ ହୋଇଥିଲେ। ସଙ୍ଗେସଙ୍ଗେ ସେମାନଙ୍କ ରକ୍ତ ନମୁନା ପରୀକ୍ଷା ପାଇଁ କଟକ ବଡ ଡାକ୍ତରଖାନା ପଠାଯାଇଥିଲା। କିନ୍ତୁ ସେମାନେ ବିପଦମୁକ୍ତ ଅଛନ୍ତି। ଜିଲା ମୁଖ୍ୟ ଚିକିତ୍ସାଳୟ, ପାରାଦୀପ ପୋର୍ଟ ହସ୍ପିଟାଲ ଓ ବାଲିକୁଦା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ପୃଥକ ଅଲଗା ରଖାଯିବା (ଆଇସୋଲେଶନ୍) ୱାର୍ଡ ଖୋଲାଯାଇ କରୋନା ସନ୍ଦିଗ୍ଧଙ୍କୁ ପରୀକ୍ଷା କରାଯାଉଛି। ପାରାଦୀପ ପୋର୍ଟ ତରଫରୁ ବାହାରୁ ଆସୁଥିବା ଲୋକଙ୍କୁ ସ୍କ୍ରିନିଂ କରାଯାଇ ସନ୍ଦେହ ହେଲେ ନମୁନା ପରୀକ୍ଷା ବ୍ୟବସ୍ଥା ହେଉଛି। ଏଥିସହ ଜିଲାର ସମସ୍ତ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର, ପ୍ରାଥମିକ ସ୍ବାସ୍ଥ୍ୟକେନ୍ଦ୍ର ଓ ଉପକେନ୍ଦ୍ରଗୁଡିକରେ ପୋଷ୍ଟର, ବ୍ୟାନର ମରାଯାଇଛି। ପାରାଦୀପ ଓ ଜଗତ୍ସିଂହପୁରରେ ୨ଟି ହୋର୍ଡିଂ ଲଗାଯାଇଛି। ଜିଲା ମୁଖ୍ୟ ଚିକିତ୍ସାଳୟ ପରିସରରେ ୨ଟି ଏଲ୍ଇଡି ଟିଭି ଲଗାଯାଇ କରୋନା ଭୂତାଣୁ ସଂକ୍ରାନ୍ତରେ ସତର୍କ ସୂଚନା ପ୍ରଦର୍ଶନ କରାଯାଉଛି। ଜିଲା ସୂଚନା ଓ ଲୋକ ସମ୍ପର୍କ ବିଭାଗ, ଜଗତ୍ସିଂହପୁର ଓ ପାରାଦୀପ ପୌର ପରିଷଦ ପକ୍ଷରୁ ଡାକବାଜି ଯନ୍ତ୍ର ସାହାଯ୍ୟରେ ମଧ୍ୟ ସଚେତନତା ସୃଷ୍ଟି କରାଯାଉଛି। ଜିଲାର ସମସ୍ତ ସରକାରୀ, ବେସରକାରୀ ଶିକ୍ଷାନୁଷ୍ଠାନ, କୋଚିଂସେଣ୍ଟର, ହଷ୍ଟେଲ, ମେସ୍ ଆଦିକୁ ଆସନ୍ତା ୩୧ ତାରିଖ ପର୍ଯ୍ୟନ୍ତ ବନ୍ଦ କରାଯାଇଛି। ଯୁଗ୍ମ ଜନଅଭିଯୋଗ ଶୁଣାଣି, ଓକାକ୍ ଅଧୀନରେ ଚାଲୁଥିବା ସମସ୍ତ ଆଧାର ପଞ୍ଜୀକରଣ କେନ୍ଦ୍ରଗୁଡିକୁ ସାମୟିକ ଭାବେ ବନ୍ଦ ରଖାଯାଇଛି। ଗୋଷ୍ଠୀ ହୋଇ ଭୋଜି କରିପାରିବେ ନାହିଁ। କେହି ରାଜ୍ୟ ବାହାରୁ ଆସୁଥିବା ସୂଚନା ପାଇଲେ ନିଜେ ଯେପରି ଅଲଗା ଭାବେ ରହିବେ ସେଥିନେଇ ବିଡିଓ, ସରପଞ୍ଚ ଆଦି ପରାମର୍ଶ ଦେବାକୁ କୁହାଯାଇଛି