ଢେଙ୍କାନାଳ ଅଫିସ, ୭।୮-ଅଭିଭାବକମାନେ ଚାହାନ୍ତି ସେମାନଙ୍କ ସନ୍ତାନ ଭଲ ପାଠପଢ଼ି ବଡ଼ମଣିଷ ହେଉ। ନିଜ ପିଲାମାନଙ୍କ ପାଇଁ ମା’ବାପା ଏପରି ସ୍ବପ୍ନ ଦେଖିବା ସ୍ବାଭାବିକ। ଏବେ ଦେଖାଯାଉଛି ପିଲାଟିଏ ଉଚ୍ଚଶିକ୍ଷିତ ହେବାପରେ ନିଜର ଜନ୍ମକଲା ମା’ବାପାଙ୍କୁ ହତାଦର କରୁଛି। ଯେତେ ଭଲ ପାଠ ପଢ଼ିଲେ ମଧ୍ୟ ଯଦି ନିଜର ଅଭିଭାବକଙ୍କୁ ସମ୍ମାନ ଦେଇ ନ ପାରିଲ, ତେବେ ସେପରି ଶିକ୍ଷା ମୂଲ୍ୟହୀନ। କେବଳ ଉଚ୍ଚଶିକ୍ଷିତ ହେଲେ ହେବନାହିଁ, ନୈତିକ ମୂଲ୍ୟବୋଧ ଜାଣିବା ଆଜିର ସାମାଜିକ ବ୍ୟବସ୍ଥା ପାଇଁ ଆହ୍ବାନ ବୋଲି କହିଛନ୍ତି ବିଧାୟକ ସୁଧୀର କୁମାର ସାମଲ। ଢେଙ୍କାନାଳ ସଦର ବ୍ଲକ ମଙ୍ଗଳପୁରସ୍ଥିତ ଇ-ଟେକ୍ ଆବାସିକ ମହାବିଦ୍ୟାଳୟର ୧୧ତମ ପ୍ରତିଷ୍ଠା ଦିବସ ସମାରୋହରେ ମୁଖ୍ୟଅତିଥି ଭାବେ ଯୋଗଦେଇ ଛାତ୍ରୀଛାତ୍ରଙ୍କ ଉଦ୍ଦେଶ୍ୟରେ ସେ ଏପରି ବକ୍ତବ୍ୟ ରଖିଛନ୍ତି। ଏଥିସହ ନିଜର ମାତୃଭାଷା, ଐତିହ୍ୟ, ସଂସ୍କୃତିକୁ ବଞ୍ଚାଇ ରଖିବାକୁ ବିଧାୟକ ସାମଲ ଆହ୍ବାନ ଦେଇଥିଲେ।
ସମ୍ମାନିତ ଅତିଥି ଭାବେ ଯୋଗଦେଇ ଅତିରିକ୍ତ ପୋଲିସ ମହାନିର୍ଦ୍ଦେଶକ ଡ. ସୁଧାଂଶୁ ଷଡ଼ଙ୍ଗୀ କହିଲେ, ଯେତେ ଅଧିକ ବହି ପଢ଼ିବ ସେତେ ଆଗକୁ ବଢ଼ିବ। ନମ୍ର ହେବା ଲାଗି ପୁସ୍ତକ ପଢ଼ିବା ଜରୁରୀ। ସବୁବେଳେ ଶିଖିବା ଇଚ୍ଛା ରଖୁଥିବା ମଣିଷ ଜୀବନରେ ସଫଳତା ପାଇଥାଏ ବୋଲି ସେ ମତବ୍ୟକ୍ତ କରିଥିଲେ। ଅନ୍ୟତମ ଅତିଥି ବିଶିଷ୍ଟ ସଙ୍ଗୀତ ନିର୍ଦ୍ଦେଶକ ଶରତ ନାୟକ କହିଲେ, ସ୍ବଦେଶୀ ସାମଗ୍ରୀ ଆମ ଅସ୍ମିତାର ପ୍ରତୀକ। ନିଜ ଅଞ୍ଚଳର ହାତ ତିଆରି ସାମଗ୍ରୀକୁ ଅଧିକରୁ ଅଧିକ ବ୍ୟବହାର କଲେ ଲୋକଙ୍କ ଆର୍ଥିକ ମାନଦଣ୍ଡ ସୁଦୃଢ଼ ହେବ ବୋଲି ସେ ପରାମର୍ଶ ଦେଇଥିଲେ। ମୁଖ୍ୟବକ୍ତା ଭାବେ ଭୁବନେଶ୍ୱରସ୍ଥିତ ଓଡ଼ିଆ ଭାଷା ସାହିତ୍ୟ ପ୍ରତିଷ୍ଠାନର ନିର୍ଦ୍ଦେଶକ ଡ. ବିଜୟ କୁମାର ନାୟକ କହିଲେ, ସେବା ମନୋବୃତ୍ତି ରଖିଲେ ସୁନାଗରିକ ହୋଇପାରିବ। ଏହି ଅବସରରେ ଅତିଥିଙ୍କ ଦ୍ୱାରା ଅନୁଷ୍ଠାନର ମୁଖପତ୍ର ‘ପୂର୍ବାଶା’ ଉନ୍ମୋଚିତ ହୋଇଥିଲା।
