ନୁଡଲ୍ସ ଏବେ ପ୍ରତିଟି ଘରେ ପସନ୍ଦ ହୋଇଛି। କମ୍ ସମୟ ଭିତରେ ପ୍ରସ୍ତୁତି ଓ ସୁସ୍ବାଦୁ ହୋଇଥିବାରୁ ଲୋକଙ୍କ ଆଦର ବେଶ୍ ଅଧିକ ଏହା ପ୍ରତି। ଆଗେ ଜଳଖିଆରେ ସାମିଲ ହେଉଥିବା ନୁଡଲ ଏବେ ମେନ୍ କୋର୍ସକୁ ରୂପାନ୍ତରିତ ହୋଇଗଲାଣି। ରାଜଧାନୀରେ ତ ଏବେ ମାଳ ମାଳ ରେଷ୍ଟୁରାଣ୍ଟ ଖୋଲିଲାଣି। ଭାରତୀୟ, ବହୁଦେଶୀୟ, ଇଟାଲୀୟ, ଫ୍ରେଞ୍ଚ, ଚାଇନିଜ ଆଦି ଅନେକ ଏକ୍ସକ୍ଲୁସିଭ ରେଷ୍ଟୁରାଣ୍ଟ ଖୋଲିଛି। ତେବେ ସିଆର୍ପି ଛକ ନିକଟରେ ‘ସିଲ୍ଭର ସ୍ଟିକ’ ନାମକ ଏକ ଚାଇନିଜ ରେଷ୍ଟୁରାଣ୍ଟ ବହୁ ବର୍ଷ ହେଲାଣି ରହିଛି। ଯେଉଁଠି ଅନ୍ୟ ଚାଇନିଜ ରେଷ୍ଟୁରାଣ୍ଟ ଅପେକ୍ଷା ସ୍ବତନ୍ତ୍ର ଓ ଭିନ୍ନ ଶୈଳୀର ଖାଦ୍ୟ ପରଷାଯାଉଛି। ଏହି ରେଷ୍ଟୁରାଣ୍ଟରେ ବେଶ୍ ଲୋକପ୍ରିୟ ହୋଇଥିବା ‘ଇ-ଫୁ’ ନୁଡଲ୍ସ ପ୍ରସ୍ତୁତି ବିଷୟରେ ସେଫ୍ ପୁରନ ଆଲେମଗର କହନ୍ତି, ଏହା ଅନ୍ୟ ନୁଡଲ୍ସ ଅପେକ୍ଷା ଭିନ୍ନ ଓ ସ୍ବାଦ ପୂରା ସ୍ବତନ୍ତ୍ର ଯାହା କ୍ରିସ୍ପି ରହିବ। ଏହାକୁ ଆପଣ ଖାଲିରେ କିମ୍ବା ଚିକେନ ଲଲିପପ୍ ସହ ଖାଇପାରିବେ । ଚିଲ୍ଲି ଚିକେନ ସହ ଖାଇବାର ସ୍ବାଦ ବି ନିଆରା…
ଆବଶ୍ୟକ ସାମଗ୍ରୀ
ଅଦା
ରସୁଣ
କଞ୍ଚାଲଙ୍କା
ନୁଡଲ୍ (ପତଳା)
ମଞ୍ଚୁରିଆନ ସସ୍
(ଅଲଗା କରି ପ୍ରସ୍ତୁତ କରିବାକୁ ହେବ)
ରିଫାଇନ୍ ତେଲ
ପିଆଜ
କ୍ୟାପସିକମ୍
ବନ୍ଧା ବା ପତ୍ର କୋବି
ଡାର୍କ ସୋୟା ସସ୍
ଗୋଲ ମରିଚ
ଲୁଣ
ମ୍ୟାଗି ମସଲା
ପ୍ରସ୍ତୁତି ପ୍ରଣାଳୀ
ପ୍ରଥମେ କଡେଇରେ ତେଲ ଗରମ ହୋଇଯିବା ପରେ ଅଦା, ରସୁଣ, କଞ୍ଚାଲଙ୍କା ପକାଇ ୧୦ ସେକେଣ୍ଡ ପର୍ଯ୍ୟନ୍ତ ଫ୍ରାଏ କରିବାକୁ ପଡେ। ତା’ପରେ ପିଆଜ, ଗାଜର, କ୍ୟାପସିକମ୍ ଓ ବନ୍ଧାକୋବି ପକେଇ ୩-୫ମିନିଟ୍ ପର୍ଯ୍ୟନ୍ତ ନାଲି ରଙ୍ଗ ଆସିବା ଯାଏ ଫ୍ରାଏ କରାଯାଏ। ପୂର୍ବରୁ ସିଝା ହୋଇଥିବା ନୁଡଲ୍ସକୁ ସେଥିରେ ମିଶାଇ ୩ ମିନିଟ୍ ପର୍ଯ୍ୟନ୍ତ ଗୋଳାନ୍ତୁ। ଭଲ ଭାବେ ମିଶିଯିବା ପରେ ସେଥିରେ ଗୋଲମରିଚ ଗୁଣ୍ଡ, ଲୁଣ, ମ୍ୟାଗି ମସଲା ଓ ସୋୟା ସସ୍ ଏକାସାଙ୍ଗେ ପକେଇ ୩ ମିନିଟ୍ ପର୍ଯ୍ୟନ୍ତ ନିଆଁଠୁ ଅଳ୍ପ ଉପରକୁ ନେଇ ରଖିବାକୁ ପଡିବ। ପରେ ପୁଣି ମଞ୍ଚୁରିଆନ ସସ୍ ପକାଇ ତାକୁ ୨ ମିନିଟ୍ ପର୍ଯ୍ୟନ୍ତ ମିଶାନ୍ତୁ। ପୂର୍ବରୁ ଥିବା ଫ୍ରାଏଡ ନୁଡଲ୍ସକୁ ମିଶାଇ ୨୦-୩୦ ସେକେଣ୍ଡ ଗୋଳେଇବା ପରେ କାଢ଼ି ଦିଅନ୍ତୁ। ଏବେ ସମ୍ପୂର୍ଣ୍ଣ ପ୍ରସ୍ତୁତ ହୋଇଗଲା ‘ଇ-ଫୁ’ ନୁଡଲ୍ସ।