‘ଉତ୍କଳ ଗଣନାଟ୍ୟ’ରୁ ଆରମ୍ଭ ହୋଇଥିଲା ତାଙ୍କ ଅଭିନୟର ଯାତ୍ରା। ଏହା ୧୯୯୧ ମସିହା କଥା। ପ୍ରଥମ ନାଟକ ଥିଲା ‘ପାଗଳୀ ଆସିଛି ଆମ ଗଁାକୁ’। ଚେହେରା ଥିଲା ଯେମିତି ଅଭିନୟ ବି ଥିଲା ସେମିତି। ଏହି ନାଟକ ଜରିଆରେ ଓଡ଼ିଶା ଯାତ୍ରା ଜଗତ ପାଇଥିଲା ଜଣେ ଉଦ୍ଦୀୟମାନ ଅଭିନେତାଙ୍କୁ। ସେହି ଅଭିନେତା ଜଣକ ହେଉଛନ୍ତି ତ୍ରିଲୋଚନ ସାହୁ। ‘ଉତ୍କଳ ଗଣନାଟ୍ୟ’ରୁ ଯାତ୍ରା କ୍ୟାରିୟର ଆରମ୍ଭ କରିଥିବା ତ୍ରିଲୋଚନ ଇତିମଧ୍ୟରେ ଅଭିନୟର ଏକ ଲମ୍ବା ଇନିଂସ ଖେଳି ସାରିଛନ୍ତି। ସମ୍ପ୍ରତି ଏବେ ଆସି ପହଞ୍ଚତ୍ଛନ୍ତି ‘ଯାତ୍ରା ସ୍ବପ୍ନମହଲ’ରେ। ସବୁପ୍ରକାର ଭୂମିକାରେ ଅବତୀର୍ଣ୍ଣ ହୋଇଛନ୍ତି ସେ। ନାୟକ ହେଉ କି ଚରିତ୍ର ଅଭିନେତା ପୁଣି ଖଳଚରିତ୍ର – ପ୍ରତ୍ୟେକ ଚରିତ୍ରକୁ ସମୁଚିତ ମାନ୍ୟତା ଦେଇ ସେ ନିଜକୁ ଜଣେ ଅସଲ କଳାକାର ବୋଲି ପ୍ରତିପାଦିତ କରିଛନ୍ତି। ଯଦିଓ ଯାତ୍ରାକୁ କ୍ୟାରିୟର କରିବେ ବୋଲି ଭାବି ନ ଥିଲେ; ତଥାପି କଳା ପ୍ରତି ପିଲାଟି ବେଳୁ ଦୁର୍ବଳତା ଥିଲା। ସେଥିଲାଗି ତ ସେ ସାଥୀପିଲାଙ୍କ ମେଳରେ କରୁଥିଲେ ନାଟକ। ବତାକୁ କରୁଥିଲେ ଖଣ୍ଡା। ସଢ଼େଇ ହେଉଥିଲା ମାଇକ୍। ବାପାଙ୍କ ଧୋତିରେ ତିଆରି ହେଉଥିଲା ମଞ୍ଚ। ପିଲାବେଳର ସେହି ଅଭିନୟର ଖେଳ କେମିତି ପେସା ପାଲଟିଗଲା ସେକଥା ସେ ନିଜେ ମଧ୍ୟ ଜାଣିପାରିଲେ ନାହିଁ। ଇତିମଧ୍ୟରେ ସେ ଅନେକ ଯାତ୍ରାପାର୍ଟିରେ ଅଭିନୟ କରି ସାରିଛନ୍ତି। ସେଥିମଧ୍ୟରେ ରହିଛି ‘ରଘୁନାଥ କଳାକୁଞ୍ଜ’, ‘ଜଗଜ୍ଜନନୀ ଅପେରା’, ‘ପାର୍ବତୀ ଗଣନାଟ୍ୟ’, ‘ତାରିଣୀ ଗଣନାଟ୍ୟ’, ‘ଯାତ୍ରା ତ୍ରିରଙ୍ଗା’, ‘ନ୍ୟୁ ବାଣେଶ୍ୱରୀ’, ‘ଯାତ୍ରା ଇନ୍ଦ୍ରଭୁବନ’, ‘ଇନ୍ଦ୍ରମହଲ’ ଏବଂ ଆହୁରି ଅନେକ। ଏକାଧିକ ସଫଳ ନାଟକର ତାଲିକା ମଧ୍ୟ ରହିଛି ତାଙ୍କ ନାମରେ। ସେଥିମଧ୍ୟରୁ କେତୋଟି ହେଉଛି ‘କିନ୍ତୁ ଏକ ନାଟକ ବାଜେ ନୁହେଁ’, ‘କଣ୍ଢେଇ ଦେଇ ଭଣ୍ଡେଇ ଦେଲୁ’, ‘ନାଲି ଟୁକୁଟୁକୁ ସାଧବ ବୋହୂ’, ‘ବଳାତ୍କାରୀକୁ ଫାଶୀଦିଅ’, ‘ଗୁମୁରି କାନ୍ଦୁଛି ଲୋଟଣୀ ପାରା’, ‘ସୁନାର ପଞ୍ଜୁରି ମାଟିର ଶାରୀ’, ‘କହିଦେଲେ ମୁଁ ମରିଯିବୁ ତୁ’, ‘ଉର୍ବଶୀ ଆସୁଛି ଇନ୍ଦ୍ରମହଲ’, ‘ବଡ଼ ଲୋକକୁ ଉତ୍ତର ନାହିଁ’ ଏବଂ ‘ଶ୍ରୀକୃଷ୍ଣ ମୋର ଶେଷ ସାକ୍ଷୀ’ ଏବଂ ଆହୁରି ଅନେକ। ଚଳିତବର୍ଷ ସେ ‘ଯାତ୍ରା ସ୍ବପ୍ନମହଲ’ରେ ନିଜର ଅଭିନୟ ଜାରି ରଖିଛନ୍ତି। ସ୍ବପ୍ନମହଲରେ ତାଙ୍କ ଅଭିନୀତ ନାଟକଗୁଡ଼ିକ ମଧ୍ୟରେ ରହିଛି ‘ବାପା ବୋଉ ତୁମେ ଭୁଲ କଲ’, ‘ଆପଣମାନେ ଖୁସି ତ’, ‘ସିଆଇଡି ଦୟା’ ଏବଂ ‘ସ୍ବପ୍ନ ମହଲର ସ୍ବପ୍ନା’।