ଲକ୍ଷ୍ନୌ,୭।୪: ଉତ୍ତରପ୍ରଦେଶରେ ବିଭିନ୍ନ ଜିଲାର ୩୧ରୁ ଊର୍ଦ୍ଧ୍ୱ ଅଞ୍ଚଳକୁ ମଙ୍ଗଳବାର ସମ୍ପୂର୍ଣ୍ଣ ସିଲ୍ କରାଯାଇଛି। ସିଲ୍ କରାଯାଇଥିବା ଅଞ୍ଚଳକୁ ଏବେ କେହି ଯାଆସ କରିପାରିବେ ନାହିଁ। ତେବେ ଯେଉଁ ଅଞ୍ଚଳଗୁଡିକୁ ସିଲ୍ କରାଯାଇଛି ସେଠାରେ ଗତ ୪୮ ଘଣ୍ଟା ମଧ୍ୟରେ ଅଧିକ କରୋନା ପଜିଟିଭ୍ ରୋଗୀ ଚିହ୍ନଟ ହୋଇଥିବା ଜଣାପଡ଼ିଛି। ରାୟବରେଲି ଜିଲାରେ ଦିଲ୍ଲୀରୁ ଫେରିଥିବା ତବଲିଘ ଜମାତର ୨ଜଣଙ୍କର କରୋନା ପଜିଟିଭ୍ ଆସିବା ପରେ ସୋମବାର ସେଠାକାର ୧୦ଟି ଅଞ୍ଚଳକୁ ସିଲ୍ କରିଦିଆଯାଇଛି। ଏହାପରେ ଉକ୍ତ ଅଞ୍ଚଳକୁ କରୋନା ମୁକ୍ତ କରିବା ପାଇଁ ପ୍ରଶାସନ ପକ୍ଷରୁ ବିଶୋଧନ କରାଯାଇଛି। ସେହିପରି ବାରାଣସୀର ୪ଟି ଅଞ୍ଚଳକୁ ମଙ୍ଗଳବାର ସିଲ୍ କରିଦିଆଯାଇଛି।