????????????????????????????????????
ବ୍ରହ୍ମପୁର ଅଫିସ୍,୧୯ା୮-ସ୍ଥାନୀୟ ଏକ ହୋଟେଲ୍ରେ ରବିବାର ଓଡ଼ିଶା ବ୍ୟବସାୟୀ ମହାସଂଘର ନୂତନ କାର୍ଯ୍ୟକାରିଣୀର ପ୍ରଧାନ ଅଧିବେଶନ ଅନୁଷ୍ଠିତ ହୋଇଯାଇଛି। ଏଥିରେ ବ୍ୟବସାୟୀଙ୍କ ବିଭିନ୍ନ ସମସ୍ୟା ସମ୍ପର୍କରେ ଆଲୋଚନା ହୋଇଥିଲା। ଓଡ଼ିଶା ବ୍ୟବସାୟୀ ମହାସଂଘକୁ ତୃଣମୂଳସ୍ତରରୁ ସଂଗଠିତ କରିବା ଲାଗି ଗୋଟିଏ ପ୍ରତିନିଧି ମଣ୍ଡଳୀ ରାଜ୍ୟର ସମସ୍ତ ବ୍ୟବସାୟୀ ସଂଗଠନ ସହ ଯୋଗାଯୋଗ କରିବା ପାଇଁ ରାଜ୍ୟ ଭ୍ରମଣ କରିବା ସହ ବ୍ୟବସାୟୀମାନଙ୍କ ସମସ୍ୟା ଏବଂ ଏହାର ନିରାକରଣ ସମ୍ପର୍କରେ ଆଲୋଚନା କରିବାକୁ ନିଷ୍ପତ୍ତି ନିଆଯାଇଥିଲା। ରାଜ୍ୟର ସମସ୍ତ ଉପଭୋକ୍ତାମାନେ କ୍ରୟ କରୁଥିବା ସମସ୍ତ ଦ୍ରବ୍ୟର ଗୁଣବତ୍ତା ଓ ମୂଲ୍ୟ ଯେପରିି ଠିକ୍ ରହେ ସେଥିପ୍ରତି ଆଗାମୀ ଦିନରେ ଦୃଷ୍ଟି ଦିଆଯିବ। ବିଭିନ୍ନ କମ୍ପାନୀଗୁଡିକ ଦ୍ୱାରା ରାଜ୍ୟ ତଥା ଦେଶର ବ୍ୟବସାୟୀମାନେ ବର୍ତ୍ତମାନ ଏକ ନୂତନ ବିପଦର ସମ୍ମୁଖୀନ ହେଉଛନ୍ତି। ସେମାନେ ଉତ୍ପାଦିତ ଦ୍ରବ୍ୟର ମୂଲ୍ୟ ବଡ଼ ବଡ଼ ମଲ୍ମାନଙ୍କୁ ଅଧିକ ବ୍ୟବସାୟିକ ରିହାତି ଦେଉଥିବା ବେଳେ ସାଧାରଣ ବ୍ୟବସାୟୀମାନଙ୍କୁ କମ୍ ରିହାତି ଦେଉଛନ୍ତି। ଏହା ଦ୍ୱାରା ସାଧାରଣ ବ୍ୟବସାୟୀମାନେ ସମ୍ପୃକ୍ତ କମ୍ପାନୀ ଦ୍ୱାରା ଉତ୍ପାଦିତ ଦ୍ରବ୍ୟ ବିକ୍ରି କରିବା ପାଇଁ ସମସ୍ୟାର ସମ୍ମୁଖୀନ ହେଉଛନ୍ତି । ଅଧିକ ଦର ରହୁଥିବା ଯୋଗୁ ଗ୍ରାହକମାନଙ୍କ ବିଶ୍ୱସନିୟତା ହରାଉଛନ୍ତି।
ସେଥି ପାଇଁ ଉଭୟ ମଲ୍ ଏବଂ ଛୋଟ ବ୍ୟବସାୟୀମାନଙ୍କୁ ଗୋଟିଏ ଦରରେ ଦେବା ପାଇଁ ଆଗାମୀ ଦିନରେ ଉତ୍ପାଦକଙ୍କ ନିକଟରେ ଦାବି ଉପସ୍ଥାପନ କରିବାକୁ ନିଷ୍ପତ୍ତି ନିଆଯାଇଥିଲା। ନ ହେଲେ ସମ୍ପୃକ୍ତ ଉତ୍ପାଦକଙ୍କ ଦ୍ରବ୍ୟ ବିକ୍ରି ଉପରେ କଟକଣା ଜାରି କରାଯିବ। ରାଜ୍ୟ ସରକାର ଅଗଣତାନ୍ତ୍ରିକ ଭାବେ ଆଞ୍ଚଳିକ ବଜାର ନିୟନ୍ତ୍ରିତ କମିଟି ଦ୍ୱାରା ବଜାର ଶୁଳ୍କ ଆଦାୟ କରୁଛନ୍ତି। ଅତୀତରେ ଏହାକୁ ବନ୍ଦ କରିବା ପାଇଁ ରାଜ୍ୟ ସରକାରଙ୍କୁ ଅନୁରୋଧ କରାଯାଇଥିଲା । ରାଜ୍ୟ ସରକାର ଏହା ଉପରେ ଯେପରି ପଦକ୍ଷେପ ନେବା କଥା ତାହା ନେଉନାହାନ୍ତି । ଦରକାର ପଡ଼ିଲେ ବ୍ୟବସାୟୀ ମହାସଂଘ ପୁର୍ନବାର ହାଇକୋର୍ଟଙ୍କ ଦ୍ୱାରସ୍ଥ ହେବ ଏବଂ ଆନ୍ଦୋଳନ କରିବାକୁ ବୈଠକରେ ନିଷ୍ପତ୍ତି ନିଆଯାଇଛି। ବୈଠକରେ ମହାସଂଘ ସଭାପତି ଚିଏଚ୍. ରବୀନ୍ଦ୍ରନାଥ, ସମ୍ପାଦକ ସୁଧାକର ପଣ୍ଡା, ଗଞ୍ଜାମ ଚାମ୍ବର ଅଫ୍ କମର୍ସ ସଭାପତି ଇ. ଶିବ ପ୍ରସାଦ ରଥ ଏବଂ ସମ୍ପାଦକ ଭି.ସନ୍ତୋଷ କୁମାରଙ୍କ ସମେତ ଉଭୟ ସଂଗଠନର ବହୁ କର୍ମକର୍ତ୍ତା ଉପସ୍ଥିତ ଥିଲେ ।