ଅନୁଗୋଳ ଅଫିସ, ୨୯ା୧୧:ଆସନ୍ତା ଡିସେମ୍ବରରୁ ୨୦୨୩ ଏପ୍ରିଲ୍ ୧, ଏହି ୪ ମାସ ଉତ୍ସବମୁଖର ହେବ ଅନୁଗୋଳ। ସାହିତ୍ୟ ସମ୍ମିଳନୀଠାରୁ ସାଂସ୍କୃତିକ କାର୍ଯ୍ୟକ୍ରମ ଯାଏ ଅନେକ କିଛି ହେବ ଆୟୋଜନ। ଏଥିପାଇଁ ପ୍ରକମ୍ପିତ ହେବ ସାରା ଜିଲା। ଓଲିଉଡ୍, ବଲିଉଡ ଷ୍ଟାରଙ୍କ ନାଚ, ଗୀତରେ ଝୁମିବେ ଅନୁଗୋଳବାସୀ। ଅନୁଗୋଳ ଜିଲା ଗଠନକୁ ୨୦୨୩ ଏପ୍ରିଲ୍ ୧ରେ ୩୦ ବର୍ଷ ଛୁଉଁଥିବାରୁ ଏହାକୁ ସ୍ମରଣୀୟ କରିବାକୁ ଜିଲା ପ୍ରଶାସନ ଏପରି ଏକ ବ୍ଲୁ ପ୍ରିଣ୍ଟ ପ୍ରସ୍ତୁତ କରିଛି। ଏଥିରେ ସାହିତ୍ୟ, ମନୋରଞ୍ଜନ ସହ ସାମାଜିକ, କ୍ରୀଡା଼ଭିତ୍ତିକ କାର୍ଯ୍ୟକ୍ରମକୁ ମଧ୍ୟ ସାମିଲ କରାଯାଇଛି। ୪ ମାସ ଧରି ଚାଲିବାକୁ ଥିବା ଏହି ଉତ୍ସବ ଋତୁକୁ ନେଇ ଏବେ ଜିଲାବାସୀ ଉତ୍ସାହିତ ହୋଇପଡ଼ିଛନ୍ତି।
୧୯୯୩ ଏପ୍ରିଲ୍ ୧ରେ ଅନୁଗୋଳକୁ ଜିଲା ମାନ୍ୟତା ମିଳିଥିଲା। ଶିଳ୍ପସମୃଦ୍ଧ ଅନୁଗୋଳ ଜିଲା ଇତିମଧ୍ୟରେ ଢେର ଆଗକୁ ଯାଇଥିବା ବେଳେ ଆସନ୍ତା ବର୍ଷ ୩୦ ବର୍ଷରେ ପଦାର୍ପଣ କରିବ। ଜିଲା ୩୦ ବର୍ଷରେ ପାଦ ଦେବାକୁ ଯାଉଥିବାରୁ ଏହାକୁ ଧୁମଧାମରେ ପାଳନ କରିବାକୁ ଜିଲା ପ୍ରଶାସନ ୨୦୨୧ରୁ ପ୍ରସ୍ତୁତି ଆରମ୍ଭ କରିସାରିଛି। ଭିଜନ୍ ୨୩ ନାମରେ ବିଭିନ୍ନ ପ୍ରକଳ୍ପର ନିର୍ମାଣ କାର୍ଯ୍ୟ ଜୋରସୋରରେ ଚାଲିଛି। ସେହିପରି ଜାତୀୟ ଅନ୍ତର୍ଜାତୀୟ ସ୍ତରର ସାହିତି୍ୟକମାନଙ୍କୁ ନେଇ ଅନୁଗୋଳରେ ୨ ଦିନିଆ ସାହିତ୍ୟ ସମ୍ମିଳନୀର ଆୟୋଜନ କରାଯିବ। ଡିସେମ୍ବର ୧୧ରେ ଜିଲା ମୁଖ୍ୟାଳୟରେ ମାରାଥନ, ୧୮ ତାରିଖରେ ସଦର ମହକୁମା ଓ ସମସ୍ତ ଉପଖଣ୍ଡରେ ରାହଗିରି କାର୍ଯ୍ୟକ୍ରମ କରାଯିବ। କବାଡି ପ୍ରତିଯୋଗିତା ସହ ରାଜ୍ୟସ୍ତରୀୟ ଟେବୁଲ ଟେନିସ୍ ମଧ୍ୟ ଆୟୋଜିତ ହେବ। ଜିଲାର ବିଭିନ୍ନ ଲୋକକଳା ଦଳ, ଓଲିଉଡ୍ କଣ୍ଠଶିଳ୍ପୀଙ୍କୁ ଆଣି ସାଂସ୍କୃତିକ କାର୍ଯ୍ୟକ୍ରମ କରାଯିବ। ଜାନୁୟାରୀ ୧୮ରୁ ୨୨ ତାରିଖ ପର୍ଯ୍ୟନ୍ତ ଜିଲା ମହୋତ୍ସବ ମଧ୍ୟ ପାଳନ କରାଯିବ। ଗତ ଜିଲା ମହୋତ୍ସବ ଅନୁଗୋଳବାସୀଙ୍କୁ ଭିନ୍ନ ଅନୁଭୂତି ଦେଇଥିଲା। ବଲିଉଡ୍ କଣ୍ଠଶିଳ୍ପୀ ଷ୍ଟିବେନ୍ ବେନଙ୍କଠାରୁ ଆରମ୍ଭ କରି ସଚେତ-ପରମ୍ପରା ଯୋଡ଼ି, ଇଣ୍ଡିଆନ ଆଇଡଲ ଫେମ୍ ସନମୁଖା ପ୍ରିୟାଙ୍କ ଭଳି ତାରକାଙ୍କୁ ନେଇ କାର୍ଯ୍ୟକ୍ରମ ଅନୁଗୋଳବାସୀଙ୍କୁ ମନ୍ତ୍ରମୁଗ୍ଧ କରିଦେଇଥିଲା। ହେଲେ ଗତ ମହୋତ୍ସବଠାରୁ ଆଗାମୀ ମହୋତ୍ସବକୁ ଅଧିକ ରଙ୍ଗାରଙ୍ଗ ଓ ଆଡମ୍ବରପୂର୍ଣ୍ଣ କରାଯିବ ବୋଲି ଜିଲା ପ୍ରଶାସନ ପକ୍ଷରୁ କୁହାଯାଇଛି।