ଗୋପାଳପୁର/ହିଞ୍ଜିଳିକାଟୁ/ଶେରଗଡ଼,୧୯ା୨(ଡି.ଏନ୍.ଏ.) – ଗୋପାଳପୁର/ହିଞ୍ଜିଳିକାଟୁ/ଶେରଗଡ଼,୧୮ା୨(ଡି.ଏନ୍.ଏ.)-ସାଧାରଣ ଉଦ୍ୟୋଗ ବିଭାଗ ପ୍ରମୁଖ ସଚିବ ବିଜୟ ଆରୋରା ମଙ୍ଗଳବାର ଗଞ୍ଜାମ ଜିଲା ଗସ୍ତରେ ଆସିଥିଲେ। ରଙ୍ଗେଇଲୁଣ୍ଡା, ହିଞ୍ଜିଳିକାଟୁ, ଶେରଗଡ଼ ବ୍ଲକ ଗସ୍ତ କରି ବିଭିନ୍ନ ଉଦ୍ୟୋଗ ଓ ପ୍ରକଳ୍ପ ବୁଲି ଦେଖିବା ସହ ସେଗୁଡ଼ିକର ସମୀକ୍ଷା କରିଥିଲେ। ଜିଲାପାଳ ବିଜୟ ଅମୃତା କୁଲାଙ୍ଗେ ଉପସ୍ଥିତ ଥିଲେ। ପ୍ରମୁଖ ସଚିବ ପ୍ରଥମେ ରଙ୍ଗେଇଲୁଣ୍ଡା ବ୍ଲକ ଗସ୍ତରେ ଯାଇଥଲେ। ନାରାୟଣପୁର ଗ୍ରାମରେ ରାଜୀବ ଗାନ୍ଧୀ ଗ୍ରାମୀଣ ବିଦ୍ୟୁତୀକରଣ ଯୋଜନାର ହିତାଧିକାରୀଙ୍କୁ ଭେଟି ସମସ୍ୟା ବୁଝିଥିଲେ। ସେଠାରୁ କରାପଲ୍ଲୀ ଆଦର୍ଶ ବିଦ୍ୟାଳୟକୁ ଯାଇଥିଲେ। ସେଠାର ଛାତ୍ରୀନିବାସରେ ସିସି କ୍ୟାମେରା ଲଗାଇବାକୁ ନିର୍ଦ୍ଦେଶ ଦେଇଥିଲେ। ପରେ ଡୁରା ପଞ୍ଚାୟତର ବାହାଦୁରପେଟା ଗ୍ରାମକୁ ଯାଇ ଉନ୍ନୟନମୂଳକ କାର୍ଯ୍ୟ ତଦାରଖ କରିଥିଲେ। ରଙ୍ଗେଇଲୁଣ୍ଡା ବିଡିଓ କୁମାର ନାଗଭୂଷଣ, ସିଡିପିଓ ଜ୍ୟୋତ୍ସ୍ନା ପାଢ଼ୀ, ଜିଲା ଶିକ୍ଷାଧିକାରୀ ଅମୂଲ୍ୟ କୁମାର ପ୍ରଧାନ, ବିଇଓ ଡ଼. ପ୍ରଭାତୀ ମହାପାତ୍ର, ଆଦର୍ଶ ବିଦ୍ୟାଳୟ ଅଧ୍ୟକ୍ଷ ବିଭୂତି ଭୂଷଣ ଶତପଥୀ, ସହକାରୀ ଯନ୍ତ୍ରୀ ପ୍ରହଲ୍ଲାଦ ପ୍ରଧାନ, ପଞ୍ଚାୟତ ନିର୍ବାହୀ ଅଧିକାରୀ କମଳ ପଣ୍ଡା, ସୁଦର୍ଶନ ବିଷୋୟୀ ପ୍ରମୁଖ ଉପସ୍ଥିତ ଥିଲେ।
ସେହିପରି ପ୍ରମୁଖ ସଚିବ ହିଞ୍ଜିଳିକାଟୁ ବ୍ଲକ ଗସ୍ତ କରି କଞ୍ଚୁରୁ ପଞ୍ଚାୟତରେ ଶିଶୁ ଉଦ୍ୟାନ, ସାରୁ ପଞ୍ଚାୟତର ଲାଇବ୍ରେରୀ, ମ୍ୟୁନିସିପାଲିଟିରେ ହିଞ୍ଜିଳି ଦେଉଳବନ୍ଧରେ ବୋଟିଂ ଓ ସୌନ୍ଦର୍ଯ୍ୟକରଣ କାର୍ଯ୍ୟ ବୁଲି ଦେଖିଥିଲେ। ଏଥିସହ ବସ ଟର୍ମିନାଲ, ଇନଡ଼ୋର ଷ୍ଟାଡ଼ୟମ ଆଦିର ଅଗ୍ରଗତି ସମ୍ପର୍କରେ ଜିଲାପାଳ ଓ ଅନ୍ୟ ଅଧିକାରୀଙ୍କ ସହ ଆଲୋଚନା କରିଥିଲେ। ପ୍ରମୁଖ ସଚିବଙ୍କ ଗସ୍ତ ସମୟରେ ମ୍ୟୁନିସିପାଲିଟି କାର୍ଯ୍ୟ ନିର୍ବାହୀ ଅଧିକାରୀ ଡ଼ ମନୋରଞ୍ଜନ ସାହୁ, ବିଡ଼ିଓ ପ୍ରସନ୍ନ କୁମାର ପାତ୍ର, ସିଡ଼ିପିଓ ଶୁଭଶ୍ରୀ ପାତ୍ର, ବ୍ଲକ ଅଧ୍ୟକ୍ଷ ଏନ. ରଘୁନାଥ, ମୁଖ୍ୟମନ୍ତ୍ରୀଙ୍କ ପ୍ରତିନିଧି ଶରତ କୁମାର ମହାପାତ୍ର ପ୍ରମୁଖ ଉପସ୍ଥିତ ଥିଲେ।
ହିଞ୍ଜିଳିକାଟୁ କାର୍ଯ୍ୟକ୍ରମ ସାରି ପ୍ରମୁଖ ସଚିବ ଆରୋରା ଓ ଜିଲାପାଳ କୁଲାଙ୍ଗେ ଶେରଗଡ଼ ବ୍ଲକ ଗସ୍ତ କରିଥିଲେ। ପ୍ରମୁଖ ସଚିବ ପିତ୍ତଳ ପଞ୍ଚାୟତରେ ଶ୍ମଶାନ ରାସ୍ତା ନିର୍ମାଣ ଅଗ୍ରଗତି, ବହୁମୁଖୀ ଗୋଷ୍ଠୀ ସମନ୍ନିତ କେନ୍ଦ୍ର, ବୁଣାକାରମାନଙ୍କୁ ଭେଟି ସେମାନଙ୍କ ସମସ୍ୟା ପଚାରି ବୁଝିଥିଲେ। ପରେ ପଞ୍ଚାୟତର ନୂତନ ୩ ଅଙ୍ଗନଓ୍ବାଡି କେନ୍ଦ୍ର କୋଠା ବୁଲି ଦେଖିଥିଲେ। ପିତ୍ତଳରୁ ପ୍ରମୁଖ ସଚିବ ସେରାଙ୍କୁଡା ଗ୍ରାମକୁ ଯିବା କାର୍ଯ୍ୟକ୍ରମ ରହିଥିଲେ ମଧ୍ୟ କୌଣସି କାରଣବଶତଃ ଏହା ବାତିଲ ହୋଇଯାଇଥିଲା। ଫଳରେ ସେରାଙ୍କୁଡାର ୫୦ରୁ ଅଧିକ ଲେମ୍ବୁଚାଷୀ ସେମାନଙ୍କ ସମସ୍ୟା ଜଣାଇ ପାରିନାହାନ୍ତି।