କୃଷ୍ଣପ୍ରସାଦ,୧୮ା୪(ଡି.ଏନ.ଏ.): କୁଟୀରଶିଳ୍ପ ପାଇଁ ଓଡ଼ିଶା ସାରା ବିଶ୍ୱରେ ଏକ ସ୍ବତନ୍ତ୍ର ସ୍ଥାନ ଅଧିକାର କରିଛି। ଲକ୍ଡାଉନ ଯୋଗୁ ଶିଳ୍ପୀ ପରିବାର ଆଜି ଭୋକ ଉପବାସରେ ଦିନ କାଟୁଛନ୍ତି। ଏଭଳି ଦେଖିବାକୁ ମିଳିଛି ପୁରୀ ଜିଲା କୃଷ୍ଣପ୍ରସାଦ ବ୍ଲକ ବଡଅଁଳ ପଞ୍ଚାୟତ ହରିଜନସାହିରେ। ସାହିରେ ୩୦ ପରିବାର ବାସ କରନ୍ତି। ସେମାନେ ସକାଳୁ ଉଠି କିଆ ଗଛ ବଣ ବୁଲି ତାର ଚେର ସଂଗ୍ରହ କରିଥାନ୍ତି। ସେହି ଚେରରେ ଟୋକେଇ, କୁଲା, ଫୁଲ ଚାଙ୍ଗୁଡି ତିଆରି କରିଥାନ୍ତି। ସେହିଭଳି ଖଜୁରି ଗଛର ପତ୍ର ଆଣି ସେଥିରେ ଝାଡୁ, ଫୁଲଦାନୀ ଆଦି ତିଆରି କରନ୍ତି। ତାହାକୁ ଗଁାକୁ ଗଁା ବୁଲି ବିକ୍ରି କରି ନିଜର ପରିବାର ପୋଷଣ କରିଥାନ୍ତି। କିଆ ଚେରରେ ତିଆରି ସାମଗ୍ରୀର ଚାହିଦା ଖୁବ୍ ଭଲ। ଦେଖିବା ପାଇଁ ବେତ ତିଆରି ଜିନିଷ ଭଳି ସୁନ୍ଦର। ଏହା ଅଳ୍ପ ଦାମରେ ବି ମିଳିଥାଏ। ତେଣୁ ଗ୍ରାହକମାନଙ୍କ ଚାହିଦା ରହିଥାଏ। ସେମାନେ ପୁରୀ ସହର, ସମୁଦ୍ର କୂଳ, ଗଞ୍ଜାମ ଜିଲା, ଖୋର୍ଦ୍ଧା ଜିଲା ବାଲୁଗଁା, ବାଣପୁର, କଟକ, ନୟାଗଡକୁ ପ୍ରସ୍ତୁତ ସାମଗ୍ରୀ ନେଇ ବିକ୍ରି କରି ରୋଜଗାର କରନ୍ତି। କେତେଜଣ ବ୍ୟବସାୟୀ ଘରକୁ ଆସି ବହୁ ପରିମାଣରେ ସାମଗ୍ରୀ କିଣି ନେଇ ରାଜ୍ୟ ବାହାରେ ବ୍ୟବସାୟ କରିଥାନ୍ତି। କରୋନା ପାଇଁ ଲକ୍ଡାଉନ ପରେ ସେମାନେ ଆଉ ଘରୁ ବାହାରି ପାରୁନାହାନ୍ତି କି ବ୍ୟବସାୟୀମାନେ ମଧ୍ୟ ଆସି ପାରୁନାହାନ୍ତି। ଜେମା ନାୟକ କୁହନ୍ତି, ପ୍ରତିବର୍ଷ ବିଷୁବ ସଂକ୍ରାନ୍ତିରେ ଓଡ଼ିଶାର ୨ୟ ବାଲିଯାତ୍ରା କୃଷ୍ଣପ୍ରସାଦ ବ୍ଲକ ଦେଉଳପଡା ପଣାଯାତ୍ରାରେ ସେମାନେ ୨୦ ହଜାରରୁ ଊର୍ଦ୍ଧ୍ୱ ଟଙ୍କାର ସାମଗ୍ରୀ ବିକ୍ରି କରିଥାନ୍ତି। ସେହି ଉଦ୍ଦେଶ୍ୟରେ ସମସ୍ତ ପରିବାର ବହୁସଂଖ୍ୟାରେ ସାମଗ୍ରୀ ତିଆରି କରି ରଖିଛନ୍ତି। ହେଲେ କରୋନା ପାଇଁ ଯାତ୍ରା ବନ୍ଦ ହେଲା। ସେମାନେ ଘରୁ ବାହାରକୁ ଯାଇ ପାରୁନାହାନ୍ତି। ତିଆରି କରିଥିବା ସାମଗ୍ରୀ ବିକ୍ରି କରି ନ ପାରି ଘରେ ରଖିଛନ୍ତି। ସରକାର ଦେଇଥିବା ୧ ହଜାର ଟଙ୍କା ୫ ଦିନରେ ସରିଗଲା। ଏବେ ସେମାନେ ଖାଇବେ କ’ଣ ସେହି ଚିନ୍ତା ଘରିଛି। ସରକାର ସେମାନଙ୍କୁ ଗଁ। ଗଁ। ବୁଲି ସାମଗ୍ରୀ ବିକ୍ରି କରିବାକୁ ଅନୁମତି ଦେବାକୁ ନିବେଦନ କରିଛନ୍ତି। ଯାହାଦ୍ୱାରା କୁଟୀର ଶିଳ୍ପର ବିକାଶ ହେବ ଏବଂ ସେମାନଙ୍କ ପରିବାରଙ୍କୁ ମୁହଁରେ ମୁଠାଏ ଖାଦ୍ୟ ଦେଇପାରିବେ।