ରାଇରଙ୍ଗପୁର,୧୨ା୬(ଡି.ଏନ୍.ଏ.)- ଋଣ କରାଇ ଦେବା ନାଁରେ ଠକେଇ ଅଭିଯୋଗରେ ମୟୂରଭଞ୍ଜ ଜିଲା ରାଇରଙ୍ଗପୁର ଗ୍ରାମାଞ୍ଚଳ ଥାନା ପୋଲିସ ବୁଧବାର ୨ ଯୁବକଙ୍କୁ ଗିରଫ କରି କୋର୍ଟ ଚାଲାଣ କରିଛି। ଅଭିଯୁକ୍ତ ଦ୍ୱୟ ହେଲେ ରାଇହରି ଗ୍ରାମର ପବିତ୍ର କୁମାର ପାତ୍ର ଏବଂ ବଡାମତଳିଆ ଗ୍ରାମର କହ୍ନେଇ ହାଁସଦା। ଏନେଇ ଥାନାରେ ଏକ ମାମଲା(ନଂ.୬୭/୨୦୨୦) ରୁଜୁ ହୋଇଛି।
ପୋଲିସ ସୂଚନା ଅନୁଯାୟୀ, ନିଜକୁ ଏକ ଅର୍ଥଲାଗାଣକାରୀ ସଂସ୍ଥାର କର୍ମଚାରୀ ଦର୍ଶାଇ ଅଭିଯୁକ୍ତ ଦ୍ୱୟ ରାଇରଙ୍ଗପୁର, ବିଜାତଳା, ତିରିଂ ଏବଂ ବିଶୋଇ ଅଞ୍ଚଳର ପ୍ରାୟ ୧୨୫ ଜଣ ଲୋକଙ୍କୁ ୭୦ ହଜାର ଟଙ୍କାର ଋଣ କରାଇ ଦେବେ ବୋଲି ପ୍ରବର୍ତ୍ତାଇ ଥିଲେ। ଏଥି ନିମନ୍ତେ ପ୍ରତ୍ୟେକଙ୍କଠାରୁ ଇନ୍ସ୍ୟୁରାନ୍ସ ବାବଦରେ ୨୦୭୦ଟଙ୍କା ଲେଖାଏଁ ଅର୍ଥ ଆଦାୟ କରିଥିଲେ। ତେବେ ସେମାନଙ୍କ ଉପରେ ସନ୍ଦେହ ହେବାରୁ ରାଇହରି ଗ୍ରାମର ନୀଳାମ୍ବର ପାତ୍ର ଥାନାରେ ଅଭିଯୋଗ କରିଥିଲେ। ପୋଲିସ ଘଟଣାର ତଦନ୍ତ କରି ଅଭିଯୁକ୍ତ ଦ୍ୱୟଙ୍କୁ ଗିରଫ କରି ତଦନ୍ତ ଜାରି ରଖିଥିତ୍ବା ଥାନା ଅଧିକାରୀ ପଦ୍ମଲୋଚନ ପାଣିଗ୍ରାହୀ କହିଛନ୍ତି।
