କୋଲକାତା, ୨୫ା୭ (ପି.ଟି.)-ଭାରତୀୟ ଫୁଟ୍ବଲର ବର୍ତ୍ତମାନ ଦୃଶ୍ୟପଟ୍ଟ ସମ୍ପର୍କରେ ସର୍ବଭାରତୀୟ ଫୁଟ୍ବଲ ମହାସଂଘ (ଏଆଇଏଫ୍ଏଫ୍)ଠାରୁ ଅପ୍ଡେଟ୍ ଚାହିଁିଛି ବିଶ୍ୱ ଫୁଟ୍ବଲ ପରିଚାଳନା ସଂସ୍ଥା ‘ଫିଫା’। ତେବେ ଦେଶର ଶ୍ରେଷ୍ଠ ଫୁଟ୍ବଲ ଲିଗ୍ ମାନ୍ୟତାକୁ ନେଇ ଦେଖା ଦେଇଥିବା ବିବାଦର ସମାଧାନ ୨ରୁ ୩ ବର୍ଷ ମଧ୍ୟରେ ହୋଇଯିବ ବୋଲି ଏଆଇଏଫ୍ଏଫ୍ କହିଛି। ଫିଫାର ଚିଫ୍ ଆସୋସିଏଶନ ମେମ୍ବର ଜଏସ୍ କୁକ୍ ଏଆଇଏଫ୍ଫ୍ର ସାଧାରଣ ସମ୍ପାଦକ କୁଶାଲ ଦାସଙ୍କ ନିକଟକୁ ଏକ ଚିଠି ଲେଖିଛନ୍ତି। ଏଥିରେ ବର୍ତ୍ତମାନ ଭାରତୀୟ ଫୁଟ୍ବଲର ଅବସ୍ଥା ବ୍ୟତୀତ ଅନ୍ୟାନ୍ୟ ସୂଚନା ପଠାଇବା ଲାଗି କୁହାଯାଇଛି। ସୂଚନାଯୋଗ୍ୟ, ଏଆଇଏଫ୍ଏଫ୍ର କାର୍ଯ୍ୟଶୈଳିରେ ଅସନ୍ତୋଷ ପ୍ରକାଶ କରି ଆଇ-ଲିଗ୍ର ୬ଟି ପ୍ରମୁଖ ଦଳ ମୋହନ ବାଗାନ, ଇଷ୍ଟ ବେଙ୍ଗଲ, ମିନର୍ଭା ପଞ୍ଜାବ, ଚର୍ଚ୍ଚିଲ ବ୍ରଦର୍ସ, ଆଇଜଲ ଏଫ୍ସି ଏବଂ ଗୋକୁଳମ କେରଳ ଫିଫାର ହସ୍ତକ୍ଷେପ ଲୋଡିଥିଲେ। ଆଇ-ଲିଗ୍ ଦେଶର ପ୍ରଥମ ପ୍ରଫେସନାଲ ଲିଗ୍ ହୋଇଥିବାବେଳେ ଏଆଇଏଫ୍ଏଫ୍ ଆଇଏସ୍ଏଲକୁ ଦେଶର ଶ୍ରେଷ୍ଠ ଲିଗ୍ ମାନ୍ୟତା ପ୍ରଦାନ କରିବା ଲାଗି ଯୋଜନା ଚଳାଇଥିବା ସେମାନେ ଅଭିଯୋଗ କରିଥିଲେ। ଏହା ବ୍ୟତୀତ ଏଆଇଏଫ୍ଏଫ୍ର ପ୍ରଶାସନିକ ବ୍ୟବସ୍ଥା ଏକ ପ୍ରକାର ପଙ୍ଗୁ ପାଲଟି ଯାଇଛି। ଏହା ଅନ୍ୟର ହାତବାରିସୀ ପାଲିଟି ଯାଇଛି ବୋଲି ମଧ୍ୟ ସେମାନେ ଦର୍ଶାଇଛନ୍ତି।