ନୂଆଦିଲ୍ଲୀ,୧୧।୪(ପି.ଟି.): ଭବିଷ୍ୟତରେ ଦିନେ ଅଲ ଇଣ୍ଡିଆ ଫୁଟବଲ ଫେଡେରେଶନ (ଏଆଇଏଫ୍ଏଫ୍) ଅଧ୍ୟକ୍ଷ ପଦ ପାଇଁ ନିର୍ବାଚନ ଲଢିବି ବୋଲି ପୂର୍ବତନ ଭାରତୀୟ ଫୁଟବଲ ଅଧିନାୟକ ବାଇଚୁଙ୍ଗ୍ ଭୂତିଆ କହିଛନ୍ତି। ଭାରତ ପାଇଁ ଦୀର୍ଘ ଏକ ଦଶନ୍ଧି ଧରି ଫୁଟବଲ ଖେଳିଆସିଥିବା ଓ ଭାରତୀୟ ଫୁଟବଲର ପୋଷ୍ଟର ବଏ ବିବେଚିତ ହୋଇ ଆସୁଥିବା ଭୂତିଆ ୨୦୧୧ରେ ଅବସର ଘୋଷଣା କରିଥିଲେ। ଏକ ପ୍ରଶ୍ନର ଉତ୍ତର ଦେବା ଅବସରରେ ସେ ଭବିଷ୍ୟତରେ ଏହି ପଦ ପାଇଁ ନିର୍ବାଚନରେ ଅବତୀର୍ଣ୍ଣ ହେବେ ବୋଲି କହିଛନ୍ତି। ଏବେ ଦେଶରେ ତୃଣମୂଳ ସ୍ତରରେ କିପରି ଫୁଟବଲର ଉନ୍ନତି ହେବ ସେ ନେଇ ପ୍ରୟାସ ଜାରି ରଖିବି। ବାଇଚୁଙ୍ଗ ଭୂତିଆ ଫୁଟବଲ ସ୍କୁଲ, ୟୁନାଟେଡ ସିକ୍କିମ କ୍ଲବ ଓ ଜିଲାସ୍ତରରେ ତୃଣମୂଳସ୍ତରରେ ଫୁଟବଲ ଉନ୍ନତି ପାଇଁ ଏବେ ଫୋକସ କରୁଛି ବୋଲି ସେ କହିଛନ୍ତି।
ଏବେ ୨୦୦୮ରୁ ପ୍ରଫୁଲ୍ଲ ପଟେଲ ଏଆଇଏଫ୍ଏଫ୍ ଅଧ୍ୟକ୍ଷ ଭାବେ କାର୍ଯ୍ୟ କରିଆସୁଛନ୍ତି। ପ୍ରିୟରଞ୍ଜନ ଦାସ ମୁନ୍ସୀ ଅସୁସ୍ଥ ହେବା ପରେ ସେ ଏହି ଗୁରୁ ଦାୟିତ୍ୱ ବହନ କରି ଆସୁଛନ୍ତି। ସେ ୨୦୧୨ରେ ଓ ପରେ ୨୦୧୬ରେ ଏଆଇଏଫ୍ଏଫ୍ ଅଧ୍ୟକ୍ଷ ନିର୍ବାଚିତ ହୋଇଥିଲେ। ତେବେ ସେ ଦେଶରେ ଲାଗୁ ହୋଇଥିବା ସ୍ପୋଟର୍ସ କୋଡ୍ ଯୋଗୁଁ ଚଳିତ ବର୍ଷ ପୁଣି ଥରେ ନିର୍ବାଚନ ନ ଲଢିବା ନିଶ୍ଚିତ ହୋଇଛି।
ଭାରତ ପ୍ରଥମ ଫୁଟବଲ ଭାବେ ୪୩ ବର୍ଷୀୟ ଭୂତିଆ ୧୦୦ ଅନ୍ତର୍ଜାତୀୟ ଫୁଟବଲ ମ୍ୟାଚ୍ ଖେଳି ରେକର୍ଡ କରିଥିଲେ। ନିଜର ଗୋଲ ସ୍କୋରିଂ କୌଶଳ ପାଇଁ ଭୂତିଆ ବେଶ୍ ଜଣାଶୁଣା ଥିଲେ। ଏବେ ଭାରତୀୟ ଦଳ ତଥା ଏଫ୍ସି ଗୋଆ ଖେଳାଳି ବ୍ରାଣ୍ଡନ ଫର୍ନାଣ୍ଡିଜ୍ ଦେଶର ଶ୍ରେଷ୍ଠ ମିଡ୍ ଫିଲ୍ଡର ବୋଲି ଭୂତିଆ କହିଛନ୍ତି। ଫର୍ନାଣ୍ଡିଜ୍ଙ୍କ ଖେଳ ମୋତେ ପ୍ରଭାବିତ କରିଛି। ଗୋଆ ପାଇଁ ସେ ଭଲ ପ୍ରଦର୍ଶନ କରୁଛନ୍ତି। ମିଡ୍ଫିଲ୍ଡରେ ସେ ପ୍ରଭାବୀ ପ୍ରଦର୍ଶନ କରି ଦଳକୁ ଏକାଧିକବାର ଜିତାଉଛନ୍ତି ବୋଲି ଭୂତିଆ କହିଛନ୍ତି। ଫୁଟବଲର ଉନ୍ନତି ପାଇଁ ଉତ୍ତରପୂର୍ବାଞ୍ଚଳର ଯୁବ ବ୍ୟବସାୟୀମାନେ ଉଲ୍ଲେଖନୀୟ ଭୂମିକା ଗ୍ରହଣ କରିପାରିବେ ବୋଲି ସେ କହିଛନ୍ତି। କ୍ଲବ୍ଗୁଡିକୁ ପ୍ରାୟୋଜକ ମିଳିବା, ଖେଳାଳିମାନଙ୍କୁ ସମର୍ଥନ ଦେବା ସହ କ୍ରୀଡ଼ା ସରଞ୍ଜାମ ଓ ଟ୍ରେନିଂ ଦିଆଗଲେ ଉତ୍ତରପୂର୍ବାଞ୍ଚଳରେ ଫୁଟବଲର ଉନ୍ନତି ଆହୁରି ହୋଇପାରିବ ବୋଲି ସେ ମତ ଦେଇଛନ୍ତି।