ନୂଆଦିଲ୍ଲୀ, ୪।୫: ଅଲ୍ଇଣ୍ଡିଆ ଫୁଟବଲ ଫେଡେରେଶନ(ଏଆଇଏଫ୍ଏଫ୍) ଏବଂ ସ୍ପୋଟର୍ସ ଅଥରିଟି ଅଫ୍ ଇଣ୍ଡିଆ(ସାଇ) ପକ୍ଷରୁ ମିଳିତଭାବେ ଆୟୋଜିତ ଅନ୍ଲାଇନ୍ କୋଚିଂ ରିଫ୍ରେଶର କୋର୍ସ ବେଶ୍ ଉପାଦେୟ ହୋଇଛି। ଏଥିରେ ଭାଗ ନେଇଥିବା କୋଚ୍ମାନେ ଏଆଇଏଫ୍ଏଫ୍ ଓ ସାଇର ଉଦ୍ୟମକୁ ପ୍ରଶଂସା କରିଛନ୍ତି। ତୃଣମୂଳ ସ୍ତରରୁ ଏହି ଗେମ୍ ସମ୍ପର୍କରେ ଜଟିଳ ଜ୍ଞାନ ଆହରଣ ହୋଇପାରିଛି ବୋଲି ସେମାନେ କହିଛନ୍ତି । ଦେଶର ୮୮୪ କୋଚ୍ ଏହି ପ୍ରୋଗ୍ରାମ ପାଇଁ ନାମ ପଞ୍ଜୀକରଣ କରିଥିଲେ। ଏପ୍ରିଲ ୨୦ରୁ ଏହା ଆରମ୍ଭ ହୋଇ ମେ’ ୨ରେ ଶେଷ ହୋଇଥିଲା।
”ଲକ୍ଡାଉନ୍ ସ୍ଥିତିରେ ମୁଁ କିପରି ସମୟ କାଟିବି ଚିନ୍ତା କରୁଥିଲି। ଏହି କୋର୍ସ ସମ୍ପର୍କରେ ଜାଣିବା ମାତ୍ରେ ସଙ୍ଗେସଙ୍ଗେ ଗ୍ରହଣ କଲି। ସେସନ ସମୟରେ ଯେଉଁ ବିଷୟରେ ଆଲୋଚନା ହୋଇଥିଲା ପ୍ରକୃତରେ ତାହା ମୋତେ ସତେଜ କରିଛି। ଚିନ୍ତାଧାରା ବାହାରେ ଥିବା ଅନେକ କଥା ଜାଣିବାକୁ ପାଇଲି“ ବୋଲି ଭବାନୀପୁର ଏଫସି ମୁଖ୍ୟ କୋଚ୍ ତଥା ପୂର୍ବତନ ମୋହନବାଗାନ ଖେଳାଳି ଶଙ୍କରଲାଲ ଚକ୍ରବର୍ତ୍ତୀ ପ୍ରକାଶ କରିଛନ୍ତି। ସେହିପରି ପୂର୍ବତନ ଗୋଲକିପର ତଥା ଭାରତୀୟ ୨୩ ବର୍ଷରୁ କମ୍ ଗୋଲକିପିଂ କୋଚ୍ ତନ୍ମୟ ବାସୁ ମଧ୍ୟ ଏହି କାର୍ଯ୍ୟକ୍ରମକୁ ପ୍ରଶଂସା କରିଛନ୍ତି। ଏହା କୋଚ୍ମାନଙ୍କୁ ସେମାନଙ୍କ କୋଚିଂ ପ୍ରଣାଳୀ ସମ୍ପର୍କରେ ଚିନ୍ତା କରିବାକୁ ବାଧ୍ୟ କରିବ ବୋଲି ସେ କହିଛନ୍ତି। ”ଆମେ ସାଧାରଣତଃ ପଡ଼ିଆରେ ନିଜ ନିଜ ଦଳ ସହ ବ୍ୟସ୍ତ ରହିଥାଉ। ଆମେ ଟ୍ରେନିଂ ଶୈଳୀରେ ପରିବର୍ତ୍ତନ ସମ୍ପର୍କରେ ଚିନ୍ତା କରିବାକୁ କେବେ ସମୟ ପାଇ ନ ଥାଉ। ମାତ୍ର ଏହି କୋର୍ସ ଆମକୁ ଅନେକ କଥା ଶିଖାଇଛି“ ବୋଲି ବାସୁ କହିଛନ୍ତି । ଏଆଇଏଫ୍ଏଫ୍ କୋଚିଂ ଇନ୍ଷ୍ଟ୍ରକ୍ଟରଙ୍କ ସହ ଭାରତୀୟ ସିନିୟର ଫୁଟବଲ ଦଳର ମୁଖ୍ୟ କୋଚ୍ ଇଗର ଷ୍ଟିମାକ, ଏଆଇଏଫ୍ଏଫ୍ ବୈଷୟିକ ନିର୍ଦ୍ଦେଶକ ଇାସକ୍ ଦୋରୁ, ଏଆଇଏଫ୍ଏଫ୍ କୋଚ୍ ଏଜୁକେଶନ ମୁଖ୍ୟ ସାଭିଓ ମାଡେଇରା ପ୍ରମୁଖ ବକ୍ତୃତା ଦେଇଥିଲେ। କୋଚ୍ମାନଙ୍କୁ ଉତ୍ସାହିତ କରିବା ପାଇଁ କେନ୍ଦ୍ର କ୍ରୀଡ଼ାମନ୍ତ୍ରୀ କିରେନ ରିଜିଜୁ ସେସନରେ ଭାଗନେଇ ତୃଣମୂଳ ସ୍ତରରେ ଫୁଟବଲର ଗୁରୁତ୍ୱ ଉପରେ ଆଲୋକପାତ କରିଥିଲେ ।