ବେଜିଂ: କରୋନା ଆତଙ୍କରେ ଥରହର ହେଉଛି ସାରା ବିଶ୍ୱ। ଦିନକୁ ଦିନ ଏହି ଭୂତାଣୁ ଗୋଟିଏ ପରେ ଗୋଟିଏ ଦେଶରେ କାୟା ମେଲାଇ ଚାଲିଛି। ଏହି ଜଟିଳ ରୋଗର ଶତ ପ୍ରତିଶତ ନିରାକରଣ ଲାଗି ଅଦ୍ୟାବଧି ପ୍ରତିଷେଧକ ବାହାରିନାହିଁ, ଯାହା ସମସ୍ୟାକୁ ଆହୁରି ବଢ଼ାଇଦେଇଛି। ତେବେ ନିକଟରେ କରୋନା ସନ୍ଦିଗ୍ଧଙ୍କୁ ଚିହ୍ନଟ କରିବାକୁ ଆର୍ଟିଫିସିଆଲ ଇଣ୍ଟେଲିଜେନ୍ସ (ଏଆଇ) ଟେକ୍ନୋଲୋଜି ବେଶ୍ ଫଳପ୍ରଦ ହେବ ବୋଲି ଦାବି କରିଛନ୍ତି ବୈଜ୍ଞାନିକ। ଏହାଦ୍ୱାରା ପ୍ରଭାବିତ ଅଞ୍ଚଳରେ ଭୂତାଣୁର ଶିକାର ହୋଇଥିବା ରୋଗୀଙ୍କୁ ସହଜରେ ଠାବ କରାଯାଇପାରିବ। ମନୁଷ୍ୟ ଶରୀରର ତାପମାତ୍ରାକୁ ଆଧାର କରି ସନ୍ଦିଗ୍ଧ ରୋଗୀଙ୍କୁ ଚିହ୍ନଟ କରାଯାଇପାରିବ। ଏହାଦ୍ୱାରା ପ୍ରାରମ୍ଭିକସ୍ତରରୁ ରୋଗୀଙ୍କୁ ଚିକିତ୍ସା ସୁବିଧା ମିଳିପାରିବ। ମିଚିଗାନ ଏବଂ କେମ୍ବ୍ରିଜ୍ ବିଶ୍ୱବିଦ୍ୟାଳୟର ବୈଜ୍ଞାନିକମାନେ ଏହି ଟେକ୍ନୋଲୋଜିର ବିକାଶ କରିଛନ୍ତି।
ଏହି ଟେକ୍ନୋଲୋଜି ଜରିଆରେ ୧୦୦୦ବର୍ଗ ଫୁଟ ଅଞ୍ଚଳରେ ନଜର ରଖାଯାଇପାରିବ ଏବଂ ଥରକେ ୧୦୦ଜଣଙ୍କ ଶରୀରର ତାପମାତ୍ରାକୁ ଯାଞ୍ଚ କରାଯାଇପାରିବ। ଏସବୁ କାମ ମାତ୍ର କେଇ ମାଇକ୍ରୋ ସେକେଣ୍ଡ ମଧ୍ୟରେ ହୋଇଯିବ। ଏହି ଟେକ୍ନୋଲୋଜିରେ ଇଣ୍ଟିଗ୍ରେଟେଡ୍ କ୍ୟାମେରା ସିଷ୍ଟମ, ଟେମ୍ପରେଚର ସେନ୍ସର, ନ୍ୟୁରଲ ନେଟ୍ଓ୍ବାର୍କ ସିଷ୍ଟମର ବ୍ୟବହାର କରାଯିବ। ଉହାନ୍, ବେଜିଂ ସମେତ ଚାଇନାର ଅନେକ ସ୍କୁଲ, ହସ୍ପିଟାଲ, ସ୍କୁଲ ସମେତ ସର୍ବସାଧାରଣ ସ୍ଥାନରେ ଏହି ଟେକ୍ନୋଲୋଜିକୁ ବ୍ୟବହାର କରାଯିବାକୁ ଯୋଜନା କରାଯାଉଛି।
ଏଆଇ ଟେକ୍ନୋଲୋଜିରେ ଫାୟରଟାଇନ୍ସ ଇନ୍ଷ୍ଟଲ କରାଯାଇଛି। ଏହା ହେଉଛି ଏକ ଉଚ୍ଚ କ୍ଷମତା ସମ୍ପନ୍ନ ଇଣ୍ଟିଗ୍ରେଟେଡ୍ ସର୍କିଟ୍। ଏହାକୁ ଉପଯୋଗ କରି ୯୯% ଠିକ୍ ତାପମାତ୍ରା ରିଡିଂକରାଯାଇପାରିବ। ଏହି ବୈଷୟିକ କୌଶଳ କ୍ଷୀପ୍ରଗତିରେ ସେଣ୍ଟ୍ରାଲ୍ ସର୍ଭରକୁ ଡାଟା ପ୍ରେରଣ କରିବ। ଏଥିରେ ଲାଗିଥିବା ଫେସିଆଲ ରେକଗ୍ନାଇଜେଶନ ସିଷ୍ଟମ ଏବଂ ନ୍ୟୁରଲ ପ୍ରୋସେସିଂ ୟୁନିଟ୍ ଏକ ସେକେଣ୍ଡରେ ୩ ଲକ୍ଷ କୋଟି ଗଣନା କରିବାକୁ ସକ୍ଷମ, ଯାହା କରୋନା ଭାଇରସ୍ ସନ୍ଦିଗ୍ଧଙ୍କୁ ଠାବ କରିବାରେ ସଫଳ ହେବ ବୋଲି ବେଜ୍ଞାନିକମାନେ କହିଛନ୍ତି।