ସରକାରୀ ଚାକିରିରୁ ଅବସର ଗ୍ରହଣ ଦିନ କେଉଁ କର୍ମଚାରୀଙ୍କୁ ଖୁସି ଲାଗେ ତ, କାହାର ମନ ବିଷାଦରେ ଭରିଯାଏ। ଖୁସି ଲାଗେ ଏଇଥିପାଇଁ, କିଛିବର୍ଷ ରୁଟିନବନ୍ଧା କର୍ତ୍ତବ୍ୟରତ ଜୀବନଯାପନ ଭିତରୁ ଖସିଆସି ଖୁସି ମନେଇବାର ଅବସର ମିଳିଯାଏ। ଦୁଃଖ ଲାଗେ ଏଇଥିପାଇଁ, ସହକର୍ମୀମାନଙ୍କ ଗହଣରେ କର୍ମକରିବାରେ ଯେଉଁ ଆନନ୍ଦ ମିଳୁଥିଲା ତାହା ସବୁଦିନ ପାଇଁ ହରାଇବାକୁ ପଡ଼େ। ଏହି ଅବସରରେ ଜଣେ ଚତୁର୍ଥ ଶ୍ରେଣୀ ସ୍କୁଲ କର୍ମଚାରୀ ଅବସର ନେବା ଦିନ ଖୁସିରେ ହେଲିକପ୍ଟରରେ ଉଡ଼ିବା ଘଟଣା ନିଆରା ନିଶ୍ଚୟ। ତାଙ୍କର କାର୍ଯ୍ୟ ଏବେ ଚର୍ଚ୍ଚାର ବିଷୟ ପାଲଟିଛି। ହରିୟାଣା ଫରିଦାବାଦର ନିମକା ଗାଁ ବାସିନ୍ଦା କୁଦେରାମ୍ ସ୍ଥାନୀୟ ସରକାରୀ ସ୍କୁଲରେ ଜଣେ ଚତୁର୍ଥ ଶ୍ରେଣୀ କର୍ମଚାରୀ ଭାବେ କାମ କରନ୍ତି। ମଙ୍ଗଳବାର ତାଙ୍କର ଅବସର ଗ୍ରହଣ ଦିବସ ଥିଲା। ଏହି ଅବସରରେ କୁଦେରାମ୍ ହେଲିକପ୍ଟର ଭଡ଼ାରେ ଆଣି ସେଥିରେ ଉଡ଼ି ବୁଲିଛନ୍ତି। ହେଲିକପ୍ଟରରେ ଉଡ଼ିବା ପାଇଁ ତାଙ୍କୁ ସାଢ଼େ ତିନିଲକ୍ଷ ଟଙ୍କା ଭଡ଼ା ଦେବାକୁ ପଡ଼ିଛି। ସେ ହେଲିକପ୍ଟରକୁ ଭଡ଼ାରେ ନେବା ଲାଗି ଗତ ମାର୍ଚ୍ଚ ମାସଠାରୁ ବୁକିଂ କରିଥିଲେ। କୁଦେରାମ୍ଙ୍କ ଏଭଳି କାର୍ଯ୍ୟ ଏବେ ସୋସିଆଲ୍ ମିଡିଆରେ ଭାଇରାଲ ହେବାରେ ଲାଗିଛି।