କଥାରେ ଅଛି-‘ରଖେ ହରି, ମାରେ କିଏ?’ ଏହି ଆପ୍ତବାକ୍ୟଟି ସତ୍ୟରେ ପରିଣତ ହୋଇଛି ଜଣେ ୭ବର୍ଷର ବାଳିକା କ୍ଷେତ୍ରରେ। ତେଲେଙ୍ଗାନାର ମକଥଲ୍ ଅଞ୍ଚଳର ଏହି ବାଳିକାଟି ଦୁର୍ଘଟଣାବଶତଃ ତାଙ୍କ ପଡୋଶୀ ଘରର ଏକ ବାଥ୍ରୁମ୍ରେ ପଡ଼ିଯିବାର ୪ ଦିନ ପରେ ଉଦ୍ଧାର ହୋଇଛି। ଏପ୍ରିଲ ୨୦ରେ ବାଳିକା ଜଣକ ନିଜ ବାସଭବନକୁ ଲାଗିଥିବା ଏବଂ ତାଲା ପଡ଼ିଥିବା ପଡିଶା ଘରର ଟେରାସ୍ରେ ଖେଳୁଥିବା ସମୟରେ ଅଚାନକ ତଳକୁ ଖସିପଡିଥିଲା। ବାଳିକାର ମାତାପିତା ଝିଅକୁ ନ ପାଇ ନିଖୋଜ ହୋଇଯାଇଥିବା ନେଇ ପୋଲିସରେ ଅଭିଯୋଗ କରିଥିଲେ। ଏପ୍ରିଲ ୨୪ରେ ପଡୋଶୀ ଘର ଲୋକେ ଫେରିଆସି ତାଲା ଖୋଲିବା କ୍ଷଣି ଗାଧୁଆଘରେ ଝିଅଟି ଚେତାଶୂନ୍ୟ ହୋଇ ପଡିଥିବାର ଦେଖି ପୋଲିସକୁ ଖବର ଦେଇଥିଲେ। ଏହାପରେ ଝିଅକୁ ମେଡିକାଲ ନିଆଯାଇ ଆବଶ୍ୟକ ଚିକିତ୍ସା କରାଯାଇଥିଲା। ବାଳିକାଟି ବଞ୍ଚତ୍ବା ପାଇଁ ଗାଧୁଆ ଘରର ପାଣି ଉପରେ ନିର୍ଭର କରିଥିଲା ବୋଲି ଡାକ୍ତରମାନେ ସୂଚନା ଦେଇଛନ୍ତି। ସେ ତଳେ ଏକ ରଶିରେ ଝୁଲୁଥିବା ଲୁଗାପଟା ଉପରେ ପଡିଯିବାରୁ ଆଘାତପ୍ରାପ୍ତ ହୋଇ ନ ଥିଲା। ଦୀର୍ଘ ୪ ଦିନ ପରେ ବନ୍ଦଘରୁ ଉଦ୍ଧାର ହୋଇ ପୁନର୍ଜୀବନ ଲାଭ କରିଥିବାରୁ ମାତାପିତା ବେଶ୍ ଖୁସି ପ୍ରକଟ କରିଛନ୍ତି।