ପୋଲିସ ଆଖିରେ ଧୂଳି ଦେଇ ଅପରାଧୀ ଖସିଯାଉଥିବାବେଳେ ଦୁଇଟି ଛେଳି ପୋଲିସ ହାବୁଡ଼ରେ ପଡି ଗିରଫ ହୋଇ ଥାନାକୁ ଆସିବା ଖବର ଶୁଣି ଟିକେ ଆଶ୍ଚର୍ଯ୍ୟ ହୋଇଯାଉଥିବେ। ହେଲେ ଏମିତି ଘଟଣା ଘଟିଛି ତେଲେଙ୍ଗାନାର କରିମନଗର ଜିଲା ହୁଜୁରାବାଦ ସହରରେ। ଦୁଇଟି ଛେଳିଙ୍କ ନାଁରେ ଚାରା ଖାଇଥିବା ଅଭିଯୋଗ ହେବା ପରେ ହୁଜୁରାବାଦ ପୋଲିସ ଛେଳି ଦୁଇଟିକୁ ଗିରଫ କରି ଆଣି ଥାନାରେ ବାନ୍ଧିଛି। ଅଭିଯୋଗ ହେଉଛି ଦୁଇଟିିଯାକ ଛେଳି ଚାରା ଖାଇଯାଇଛନ୍ତି। ହୁଜୁରାବାଦ ସହରରେ ‘ସେଭ୍ ଦି ଟ୍ରିଜ୍’ ନାମକ ଏକ ସ୍ବଚ୍ଛାସେବୀ ସଂଗଠନ ଚାରା ରୋପଣ କରିଥିଲା। ସଂଗଠନ ଚାରା ରୋପଣ କରିବା ପରେ ଏହି ଛେଳି ଦୁଇଟି ଚାରା ଖାଇଦେଇଥିଲେ। ଏହାପରେ ‘ସେଭ୍ ଦି ଟ୍ରିଜ୍’ର ଦୁଇଜଣ ସଦସ୍ୟ ସଂପୃକ୍ତ ଦୁଇ ଛେଳି ନାଁରେ ବାରମ୍ବାର ଚାରା ଖାଇଯାଉଛନ୍ତି ବୋଲି ଥାନାରେ ଅଭିଯୋଗ କରିଥିଲେ। ତାଙ୍କ ସଂଗଠନ ସହରରେ ୯୦୦ ଚାରା ରୋପଣ କରିଥିଲେ ବି ସେଥିରୁ ୨୦୦ ଚାରା ଏମାନେ ଖାଇଦେଇଥିଲେ। ଏହି ଅଭିଯୋଗ ଆସିବା ପରେ ପୋଲିସ ଛେଳି ଦୁଇଟିକୁ ଖୋଜି ଗିରଫ କରିବାକୁ ବାଧ୍ୟ ହୋଇଥିଲା। ଛେଳିର ମାଲିକ ହୁଜୁରାବାଦ ନଗର ନିଗମକୁ ୧ ହଜାର ଟଙ୍କା ଜରିମାନା ଦେବା ପରେ ଥାନାରୁ ଛେଳି ଦୁଇଟି ମୁକୁଳିଛନ୍ତି।