ପିଲାମାନେ ଟଙ୍କାଟିଏ ପାଇଲେ ବଜାରରୁ ବିସ୍କୁଟ କି ଚକୋଲେଟ କିଣିଦିଅନ୍ତି। କିନ୍ତୁ ଏମିତି ପିଲା ଅଛନ୍ତି ଯେଉଁମାନେ ତାଙ୍କ ପକେଟ୍ ଖର୍ଚ୍ଚ ସଞ୍ଚୟ କରି ଚଳାଉଛନ୍ତି ଶିଶୁ ବ୍ୟାଙ୍କ। ମଧ୍ୟପ୍ରଦେଶ ଛତରପୁର ଅଞ୍ଚଳରେ ଚାଲୁଛି ଏହି ବ୍ୟାଙ୍କ। ବିଭିନ୍ନ ବ୍ୟାଙ୍କରେ କୋଟି କୋଟି ଟଙ୍କା ଜମା ହେଉଥିତ୍ବାବେଳେ ଶିଶୁ ବ୍ୟାଙ୍କରେ ୧ ଟଙ୍କାରୁ ଆରମ୍ଭ କରି ୧୦ ଟଙ୍କା ଯାଏ ଜମା ହେଉଥିତ୍ବା ଶୁଣି ଆଶ୍ଚର୍ଯ୍ୟ ହେବା ସ୍ବାଭାବିକ। ଗରିବ ପିଲାମାନେ ସେମାନଙ୍କ ପକେଟ ଖର୍ଚ୍ଚ ବଞ୍ଚାଇ ବ୍ୟାଙ୍କ ବାଲାନ୍ସ ବୃଦ୍ଧି କରୁଛନ୍ତି। ଏହି ବ୍ୟାଙ୍କରେ ସେମାନେ ଟଙ୍କା ଜମା ରଖିବା ସହ ଆବଶ୍ୟକ ସମୟରେ ବ୍ୟାଙ୍କରୁ ୫୦୦ ଟଙ୍କା ଯାଏ ମଧ୍ୟ ଋଣ ନେଉଛନ୍ତି। ଛତରପୁର ଥାନାରେ ସଂଚାଳିତ ସଞ୍ଜୀବନୀ ବାଲ୍ ମିତ୍ର କେନ୍ଦ୍ର ଦ୍ୱାରା ଏହି ଶିଶୁ ବ୍ୟାଙ୍କ ମେ’ ୨୦୧୬ରେ ଖୋଲାଯାଇଥିଲା। ଏବେ ଏହି ବ୍ୟାଙ୍କରେ ୧୫୦ ଜଣ ଶିଶୁ ଯୋଡ଼ି ହୋଇଗଲେଣି। ୧୪ ବର୍ଷ ବୟସ ଯାଏ ପିଲାମାନେ ବ୍ୟାଙ୍କରେ ଖାତା ଖୋଲିପାରୁଛନ୍ତି। ବ୍ୟାଙ୍କ ମ୍ୟାନେଜର, କୋଷାଧ୍ୟକ୍ଷ ମଧ୍ୟ ପିଲାମାନେ ରହିଛନ୍ତି। ଏହି ବ୍ୟାଙ୍କ ସେବା ମାଧ୍ୟମରେ ସେମାନଙ୍କ ସଞ୍ଚୟ ମନୋଭାବ ବୃଦ୍ଧି ପାଉଛି ଓ ଜରୁରୀ ସମୟରେ ସେମାନେ ଆଉ ମାତାପିତାଙ୍କୁ ପଇସା ମାଗୁନାହାନ୍ତି। ଜନ୍ମଦିନରେ ଖର୍ଚ୍ଚ କରିବା ଲାଗି ହେଉ କି ଅନ୍ୟ କୌଣସି ଜିନିଷ କିଣିବା ଲାଗି ସେମାନେ ବ୍ୟାଙ୍କ୍ରୁ ଋଣ ନେଉଛନ୍ତି। ଏହି ବ୍ୟାଙ୍କର ଜମାକାରୀ ପିଲାମାନଙ୍କୁ ପୋଲିସ ପକ୍ଷରୁ ନୈତିକ ଶିକ୍ଷା, ପରିବେଶ ଓ ସ୍ବାସ୍ଥ୍ୟ, ଦେଶପ୍ରେମ, ସାଧାରଣ ଜ୍ଞାନ, ଇଂଲିଶ ଓ କମ୍ପ୍ୟୁଟର ଶିକ୍ଷା ପ୍ରଦାନ କରାଯାଉଛି। ଏଥିପାଇଁ ପିଲାମାନଙ୍କୁ ଘରୁ କେନ୍ଦ୍ରକୁ ଅଣାଯାଉଛି। ଏହି ବ୍ୟାଙ୍କ ଓ କେନ୍ଦ୍ର ସହ ଜଡିତ ଥିବା ପିଲା ବୟସ୍କ ହୋଇ ଭିନ୍ନ ଭିନ୍ନ କ୍ଷେତ୍ରରେ ରୋଜଗାରକ୍ଷମ ବି ହୋଇପାରିଛନ୍ତି।