ମଧ୍ୟପ୍ରଦେଶର ଜଣେ ଆଦିବାସୀ ମହିଳା କୃଷିରେ ନୂଆ କୌଶଳ ପ୍ରୟୋଗ କରି ଗାଁରେ ପୂରା ଚାଷ ପଦ୍ଧତିକୁ ବଦଳାଇ ଦେଇଛନ୍ତି। ଆଦିବାସୀବହୁଳ ଡିଣ୍ଡୋରି ଜିଲାର ଏକ ଛୋଟ ଗାଁରେ ରହନ୍ତି ବୈଗା ସମ୍ପ୍ରଦାୟର ମହିଳା ଉଜିୟାରୀ ବାଈ। ସେ ୫ମ ଶ୍ରେଣୀ ଯାଏ ପଢିଛନ୍ତି। ତାଙ୍କ ଚାଷ ପଦ୍ଧତି ଶିଖିବା ଲାଗି ଦକ୍ଷିଣ ଆଫ୍ରିକା ଓ ଫିଲିପାଇନ୍ସ ଭଳି ଦେଶ ତାଙ୍କୁ ଆମନ୍ତ୍ରିିତ କରିଛିି। ଡିଣ୍ଡୋରୀର କୃଷିବିଜ୍ଞାନ କେନ୍ଦ୍ରର ବରିଷ୍ଠ ଟେକ୍ନିକାଲ ଅଧିକାରୀଙ୍କ ମୁତାବକ ଉଜିୟାରୀ ଫସଲରେ ପାଣି ଦେବା ଲାଗି ବନ୍ଧ ବାନ୍ଧିଛନ୍ତି ଓ ପାଣି ଦେବାର ଭିନ୍ନ କୌଶଳ ଆପଣାଇଛନ୍ତି। ସ୍ବତନ୍ତ୍ର କୁଣ୍ଡରେ ସେ ଜିଆଖତ ପ୍ରସ୍ତୁତ କରୁଛନ୍ତି। ଜୈବିକ ଉପାୟରେ ଶସ୍ୟ ଉପତ୍ାଦନ କରିବା ସହ ମଞ୍ଜି ସଂଗ୍ରହ କରୁଛନ୍ତି। ମଞ୍ଜିକୁ ଜୈବିକ ଉପାୟରେ ବିଶୋଧନ ବି କରୁଛନ୍ତି। ଉଜିୟାରୀଙ୍କ ପିଲାଦିନ ଦାରିଦ୍ର୍ୟରେ କଟିଥିଲା। ଉଜିୟାରୀ କୁହନ୍ତି ତାଙ୍କ ପାଖରେ ଜମି ଥିଲା, ଗାଁକୁ ଲାଗି ଜଙ୍ଗଲ ବି ଥିଲା। କିନ୍ତୁ ଗାଁ ଲୋକ ମଜୁରିଆ ଭାବେ ଦିନ କାଟୁଥିଲେ। ୨୦୦୮ରେ ଉଜିୟାରୀ ବାଈ ଡିଣ୍ଡୋରୀ କୃଷି ବିଜ୍ଞାନ କେନ୍ଦ୍ର ସମ୍ପର୍କରେ ଜାଣି ପାରି ଗାଁ ଲୋକମାନଙ୍କୁ ନେଇ ସେଠାରେ ପହଞ୍ଚି ଚାଷ ପ୍ରଣାଳୀ ଶିଖିଥିଲେ। ଏହାପରେ ଏହି ଟେକ୍ନିକ ଗାଁ ଲୋକଙ୍କୁ ଶିଖାଇଥିଲେ। ଉଜିୟାରୀ କେବଳ ଚାଷ ଭିତରେ ବାନ୍ଧି ହୋଇ ନାହାନ୍ତି, ସେ ଜଙ୍ଗଲ ସଂରକ୍ଷଣ ମଧ୍ୟ କରୁଛନ୍ତି। ଜଙ୍ଗଲ ନଷ୍ଟ କରୁଥିବା ଲୋକଙ୍କୁ ସଚେତନ କରୁଛନ୍ତି। କୃଷିରେ ଏହି ସଫଳତା ଲାଗି ୨୦୧୯ରେ ଜବଲପୁରସ୍ଥିତ ଜବାହରଲାଲ ନେହେରୁ କୃଷି ବିଶ୍ୱବିଦ୍ୟାଳୟ ପକ୍ଷରୁ ତାଙ୍କୁ ପୁରସ୍କୃତ କରାଯାଇଛି।