ପ୍ଲାଷ୍ଟିକ୍ ପ୍ରଦୂଷଣ କମ୍ କରିବା ଲାଗି ଡେରାଡୁନ ସ୍ମାର୍ଟସିଟି ଲିଃ (ଡିଏସ୍ସିଏଲ୍) ଅପଣାଇଥିବା ନିଆରା ଉପାୟ ପ୍ରଶଂସନୀୟ। ଡିଏସ୍ସିଏଲ୍ ଏଥିପାଇଁ ‘ସ୍ବଚ୍ଛତା ହିଁ ସେବା’ ଅଭିଯାନ ଆରମ୍ଭ କରିଛି। ଏହା ମାଧ୍ୟମରେ ‘ପ୍ଲାଷ୍ଟିକ୍ ଓ୍ବାପ୍ସି ଅଭିଯାନ’କୁ ତ୍ୱରାନ୍ବିତ କରି ଲୋକମାନଙ୍କୁ ଥରେ ବ୍ୟବହୃତ ପ୍ଲାଷ୍ଟିକ୍ ଫେରାଇଦେବା ଲାଗି ସଚେତନ କରୁଛି। ଏଥିରେ ଡେରାଡୁନର ନାଗରିକମାନଙ୍କ ଦ୍ୱାରା ଗଠିତ ‘ଗତି’ ଅନୁଷ୍ଠାନ ସହଯୋଗ କରୁଛି। ଡେରାଡୁନ୍ର ୧୦୦ଟି ଓ୍ବାର୍ଡ ମଧ୍ୟରୁ ୧୦ଟିରେ ଥିବା ୨୦ଟି ସରକାରୀ ସ୍କୁଲ୍ ଏହି ଅଭିଯାନରେ ସାମିଲ ହୋଇଛନ୍ତି। ପ୍ରତି ସ୍କୁଲ୍ର ଜଣେ କର୍ମଚାରୀଙ୍କୁ ସେହି ସ୍କୁଲ୍ର ‘ପ୍ଲାଷ୍ଟିକ ଯୋଦ୍ଧା’ ଭାବେ ନିଯୁକ୍ତି ଦିଆଯାଉଛି। ଏହାବାଦ୍ ୨୦ଟି ସ୍କୁଲ୍ର ପ୍ରତି ଶ୍ରେଣୀରୁ ଜଣେ କରି ମୋଟ ୧୬୮ ଜଣ ‘ପ୍ଲାଷ୍ଟିକ୍ ପ୍ରହରୀ’ଙ୍କୁ ମଧ୍ୟ ନିଯୁକ୍ତି ଦିଆଯାଇଛି। ପିଲାମାନେ ଘର, ପଡ଼ୋଶୀ ଓ ଦୋକାନ ଆଦିରୁ ଥରେ ବ୍ୟବହୃତ ପ୍ଲାଷ୍ଟିକ୍ ସଂଗ୍ରହ କରୁଛନ୍ତି। ସବୁ ପିଲା ମୋଟ ୫୫୫ କିଲୋ ପ୍ଲାଷ୍ଟିକ ବର୍ଜ୍ୟ ସଂଗ୍ରହ କରିସାରିଛନ୍ତି। ପ୍ଲାଷ୍ଟିକ୍ ବର୍ଜ୍ୟରୁ ଡିଜେଲ୍ ଓ ପେଟ୍ରୋଲ୍ ପ୍ରସ୍ତୁତ କରୁଥିବା ଇଣ୍ଡିଆନ ଇନଷ୍ଟିଚ୍ୟୁଟ ଅଫ୍ ପେଟ୍ରୋଲିୟମ୍ ସହ ଏହି ଅଭିଯାନ ହାତ ମିଳାଇଥିବା ଜଣାପଡ଼ିଛି।