ଗୁଜରାଟର ଏକ ଗାଁରେ ହିନ୍ଦୁ-ମୁସଲମାନ ଏକତାର ଛବି ନଜରକୁ ଆସିଛି। ଅମରେଲି ଜିଲାର ଜଲିୟା ଗାଁରେ ପ୍ରତିଦିନ ପବିତ୍ର କୋରାନ ପାଠ କରାଯିବା ସହ ସଂସ୍କୃତରେ ଭଜନ ମଧ୍ୟ ଗାନ କରାଯାଏ। ଏହି ଗାଁରେ ରହନ୍ତି ସୁନ୍ନି ମୁସଲିମ ଲଲିୟା ପରିବାର। ଏହି ପରିବାରର ନୌସିଫ ଲଲିୟାଙ୍କ ବାହାଘରରେ ଦେଖିବାକୁ ମିଳିଛି ଏକ ନିଆରା ପରମ୍ପରା, ଯାହା ସାମ୍ପ୍ରଦାୟିକ ସଦ୍ଭାବନା ତଥା ଏକତାର ଉଦାହରଣ ସୃଷ୍ଟି କରିଛି। ନୌସିଫଙ୍କ ସହ ଜାର ଗାଁର ପିନଲ ମୁଛିୟାଙ୍କ ବାହାଘର ହୋଇଥିଲା। ଏହି ବାହାଘରକୁ ଦେଶର ବିଭିନ୍ନ ଜାଗାରୁ ୧୫ ଜଣ ହିନ୍ଦୁ ଧର୍ମଗୁରୁଙ୍କୁ ନିମନ୍ତ୍ରଣ କରାଯାଇଥିଲା। ଦୁଇଦିନ ଧରି ଆୟୋଜିତ ହୋଇଥିବା ଏହି ବାହାଘରରେ ଦମ୍ପତିଙ୍କୁ ଆଶୀର୍ବାଦ ଦେବା ପାଇଁ ଧର୍ମଗୁରୁମାନେ ମଧ୍ୟ ଜଲିୟାରେ ପହଞ୍ଚିଥିଲେ। ଏମାନେ ଜାର ଗାଁଠାରୁ ଜଲିୟା ଯାଏ ପ୍ରାୟ ୩୫ କିଲୋମିଟର ଶୋଭାଯାତ୍ରାର ନେତୃତ୍ୱ ମଧ୍ୟ ନେଇଥିଲେ। ନୌସିଫଙ୍କ ବାହାଘର ସ୍ଥିର ହେବା ପରେ ତାଙ୍କ ପରିବାର ଏହି ଧର୍ମଗୁରୁମାନଙ୍କୁ ନିମନ୍ତ୍ରଣ କରିବା ଲାଗି ସ୍ଥିର କରିଥିଲେ। ବରପକ୍ଷର ଏହି ନିଷ୍ପତ୍ତିକୁ କନ୍ୟା ପିନଲ୍ଙ୍କ ପରିବାର ସହମତି ଜଣାଇଥିଲେ। ହିନ୍ଦୁ-ମୁସଲମାନ ଏକତାକୁ ମଜଭୁତ କରିବା ପାଇଁ ଏହା ଏକ ବଡ ସୁଯୋଗ ବୋଲି ସେମାନେ ଭାବିଥିଲେ। ବାହାଘରରେ ଏଭଳି ପରମ୍ପରା ଲଲିୟା ପରିବାରରେ ତିନିପିଢି ଧରି ପାଳନ କରାଯାଇଆସୁଛି ବୋଲି କୁହନ୍ତି ନୌସିଫଙ୍କ ଚାଚା ରଫିକ୍ ଲଲିୟା। ଏହି ପରମ୍ପରା ତାଙ୍କ ପୂର୍ବଜ ଆପା ଗିଗା ଆରମ୍ଭ କରିଥିଲେ। ସେ ଜୁନାଗଡ଼ ଜିଲା ସତାଧାରରେ ଜଣେ ସନ୍ଥ ଭାବେ ରହୁଥିଲେ। ଲଲିୟା ପରିବାର ମୁଖ୍ୟତଃ ଚାଷ କରନ୍ତି। ଏହି ପରିବାରର ତିନିପୁଅଙ୍କ ମଧ୍ୟରେ ନୌସିଫ ସବା ସାନ। ନୌସିଫଙ୍କ ଦୁଇ ବଡଭାଇଙ୍କର ବି ଏହିଭଳି ବାହାଘର ହୋଇଥିଲା।