ଛତିଶଗଡ଼ ପତ୍ରାର ଏକ ସରକାରୀ ସ୍କୁଲ୍ ପିଲାମାନଙ୍କ ଭବିଷ୍ୟତ ନିଆରା ଢଙ୍ଗରେ ଗଢୁଛିି। ଏହି ସ୍କୁଲ୍ରେ ପିଲାମାନେ ସେମାନଙ୍କ ଆମତ୍ବିଶ୍ୱାସ ବଢାଇବା ଲାଗି ଖୋଲା ଆଲୋଚନା କରୁଛନ୍ତି। ଭାଷଣ ଦେଉଛନ୍ତି ଓ ବିତର୍କ ମଞ୍ଚର ମଧ୍ୟ ଆୟୋଜନ କରୁଛନ୍ତି। ଛତିଶଗଡ଼ରେ କେବଳ ଏହି ସ୍କୁଲରେ ହିଁ ଥିଏଟର ରହିଛି। ୨୦୧୬ରେ ଗ୍ରାମବାସୀ ଓ ଶିକ୍ଷକମାନେ ସ୍କୁଲ ପ୍ରତି ପିଲାମାନଙ୍କ ଆକର୍ଷଣ ବଢାଇବା ଲାଗି ପ୍ରଥମେ ସାଂସ୍କୃତିକ କାର୍ଯ୍ୟକ୍ରମର ଆୟୋଜନ କରିଥିଲେ। ପରେ ଶିକ୍ଷକ ଓ ଗ୍ରାମବାସୀ ୧ ଲକ୍ଷ ଟଙ୍କା ଚାନ୍ଦା କରି ଥିଏଟର ନିର୍ମାଣ କରିଥିଲେ। ପ୍ରସିଦ୍ଧ ଚିତ୍ରଶିଳ୍ପୀ ହବିବ୍ ତନ୍ବୀରଙ୍କ ନାମରେ ଏହା ନିର୍ମାଣ କରାଯାଇଛି। ପ୍ରତିଦିନ ଏହି ମଞ୍ଚରେ ପିଲାମାନଙ୍କୁ ଗାଇବାର ସୁଯୋଗ ଦିଆଯାଉଛି। ପ୍ରଥମରୁ ପଞ୍ଚମ ଯାଏ ପିଲାମାନଙ୍କୁ କହିବାର ସୁଯୋଗ ବି ମିଳୁଛି। ପିଲାମାନଙ୍କ ମନରୁ ସଙ୍କୋଚ ଦୂର କରି ଆମତ୍ବିଶ୍ୱାସ ବଢାଇବା ଲକ୍ଷ୍ୟ ନେଇ ଏହା କରାଯାଇଛି ବୋଲି କୁହନ୍ତି ସ୍କୁଲ୍ର ପ୍ରଧାନଶିକ୍ଷକ ଶିବ ଚନ୍ଦ୍ରବଂଶୀ। ସବୁ ସରକାରୀ ସ୍କୁଲ୍ର ପିଲାମାନଙ୍କ ପାଇଁ ନୀଳରଙ୍ଗର ୟୁନିଫର୍ମ ରହିଥିବାବେଳେ ଏହି ସ୍କୁଲ୍ରେ ହଳଦିଆ ରଙ୍ଗର ୟୁନିଫର୍ମ ରଖାଯାଇଛି। ଏଥିଲାଗି ସବୁ ପିଲାଙ୍କୁ ସ୍ଥାନୀୟ ପଞ୍ଚାୟତ ସହଯୋଗ କରୁଛି। ସ୍କୁଲ୍ରେ ବିଭିନ୍ନ କାର୍ଯ୍ୟକ୍ରମକୁ ସୋସିଆଲ ମିଡିଆରେ ପୋଷ୍ଟ୍ କରାଯାଉଛି। ସ୍କୁଲ୍ର ନିଜସ୍ବ ଓ୍ବେବ୍ସାଇଟ ମଧ୍ୟ ରହିଛି। ପିଲାମାନଙ୍କୁ ଆରମ୍ଭରୁ କୃଷି ସହ ଯୋଡ଼ିବାର ପ୍ରୟାସ କରାଯାଉଛି। ସ୍କୁଲ୍ ପରିସରରେ ଗ୍ରାମବାସୀଙ୍କ ସହଯୋଗରେ କିଚେନ୍ ଗାର୍ଡେନ୍ କରାଯାଇଛି ଓ ସେଠାରେ ପିଲାମାନେ ଜୈବିକ ଉପାୟରେ ପନିପରିବା ଚାଷ କରୁଛନ୍ତି। ଏହା ତାଙ୍କ ମଧ୍ୟାହ୍ନଭୋଜନରେ ଉପଯୋଗ ହେଉଛି। ସ୍କୁଲ୍ରେ ୮୩ ଜଣ ପିଲା ପଢୁଛନ୍ତି ଓ ଥିଏଟରର ଲାଭ ସବୁ ପିଲାଙ୍କୁ ମିଳୁଛି।