ବୟସ ୧୭, କିନ୍ତୁ ବିଚାର ଅତି ଉଚ୍ଚ। ଏମିତି ଜଣେ ଝିଅ ହେଉଛନ୍ତି ହରିୟାଣାର ଦୌଲତପୁର ଗାଁ ନିବାସୀ ଅଞ୍ଜୁ ବର୍ମା। ସେ ତାଙ୍କ ପିତା ଓ ସ୍କୁଲ ଶିକ୍ଷକଙ୍କ ସହଯୋଗରେ ଖୋଲିଛନ୍ତି ‘ବୁଲନ୍ଦ ଉଡ଼ାନ’। ଏହା ମାଧ୍ୟମରେ ସ୍କୁଲରେ ଛାତ୍ରସଂଖ୍ୟା ୭୦୦କୁ ବୃଦ୍ଧି କରିପାରିଛନ୍ତି। ଏବେ ସୁଦ୍ଧା ସେ ୫୦ଟି ବାଲ୍ୟ ବିବାହ ବନ୍ଦ କରିବାରେ ସକ୍ଷମ ହୋଇଛନ୍ତି। ୧୫ଟି ଯୌନ ନିର୍ଯାତନା ଘଟଣାରେ ପୀଡିତାଙ୍କୁ ଆଇନଗତ ସହଯୋଗ ଯୋଗାଇ ଦେଇଛନ୍ତି। ଶିଶୁ ଶ୍ରମିକ ବିରୋଧରେ ସ୍ବର ଉଠାଉଛନ୍ତି। ୧୦ ବର୍ଷ ବେଳେ ସେ ତାଙ୍କ ପିତାଙ୍କ ସମ୍ପର୍କୀୟଙ୍କ ଘରେ ରହି ଘରକାମ କରିବା ସହ ପଢୁଥିଲେ। ସେଠାରେ ତାଙ୍କୁ ମାତାପିତାଙ୍କ ସହ କଥାହେବାର ସୁଯୋଗ ଦିଆଯାଉ ନ ଥିଲା। ପରେ ସେ ଘରକୁ ଫେରି ଆସି ଘରକାମ କରି ପଢିବାକୁ ସମୟ ପାଇ ନ ଥିଲେ। ତେବେ ସେ ପଢିବାବେଳୁ ପିଲାମାନଙ୍କ ପାଇଁ କିଛି କରିବାକୁ ସ୍ବପ୍ନ ଦେଖିଥିଲେ ଯାହା ଆଜି ସାକାର ହୋଇଛି। ଅଞ୍ଜୁ ପ୍ରଥମେ ଗାଁର ଝିଅମାନଙ୍କୁ ତାଙ୍କ ସହ ସାମିଲ କରିବା ଲାଗି ଘର ଘର ବୁଲିଥିଲେ କିନ୍ତୁ କେହି ତାଙ୍କୁ ସହଯୋଗ କରି ନ ଥିଲେ। ପରେ ତାଙ୍କ ଶିକ୍ଷକଙ୍କ ସହଯୋଗ ପାଇବା ପରେ ପଞ୍ଚାୟତ ମଧ୍ୟ ତାଙ୍କୁ ଏଥିରେ ସାହାଯ୍ୟ କରିଥିଲା। ୨୦୧୭ରେ ସେ ‘ବୁଲନ୍ଦ ଉଡ଼ାନ’ ପ୍ରତିଷ୍ଠା କରିଥିଲେ।