ମାନବ ସେବା ହିଁ ଈଶ୍ୱର ସେବା। ଏହା ଉପଲବ୍ଧି କରିଛନ୍ତି ଲଦାଖର ଜଣେ ବୌଦ୍ଧ ସନ୍ନ୍ୟାସୀ ଲୋବଜାଙ୍ଗ ଜୋଟ୍ପା। ସେ ସେନାର ଅଦରକାରୀ ପାରାଶୁଟ୍ ବ୍ୟବହାର କରି ଆରମ୍ଭ କରିଥିବା ଇଂଲିଶ ମାଧ୍ୟମ ସ୍କୁଲରେ ଏଯାବତ୍ ହଜାର ହଜାର ପିଲାଙ୍କ ଜୀବନ ଗଢିଛନ୍ତି। ଜୋଟ୍ପା ପ୍ରଥମେ ଲେହର ଲାମଡନ୍ ମଡେଲ ସିନିୟର ସେକେଣ୍ଡାରୀ ସ୍କୁଲ୍ରେ ଶିକ୍ଷକ ଥିଲେ। ସେଠାରୁ ଲଦାଖର ନୁବ୍ରା ଉପତ୍ୟକାକୁ ଫେରିବା ପରେ ୧୯୮୩ରେ ଦୀକ୍ଷିତ ଗାଁରେ ପ୍ରଥମ ଇଂଲିଶ ମାଧ୍ୟମ ସ୍କୁଲ୍ ଆରମ୍ଭ କରିଥିଲେ। ଏହାର ନାମ ରଖିଥିଲେ ଲାମଡନ ମଡେଲ ସ୍କୁଲ। ସେ ଲାମଡନ୍ ଓ୍ବେଲ୍ଫେୟାର ସୋସାଇଟି ପକ୍ଷରୁ ଏହାକୁ ଆରମ୍ଭ କରିଥିଲେ। ସ୍କୁଲ ଆରମ୍ଭ ହେବାବେଳେ ୯ ଜଣ ପିଲା ଥିଲେ। ଏହାକୁ ଚଳାଇବା ଲାଗି କୌଣସି ଫଣ୍ଡ୍ ମଧ୍ୟ ନ ଥିଲା। ଦୀକ୍ଷିତର ବାସିନ୍ଦାମାନେ ସ୍କୁଲକୁ ୧ ଏକର ଜମି ଦେଇଥିଲେ। ଏହାସହ ୧୦ରୁ ୫୦ ଟଙ୍କା ଯାଏ ଦାନ କରିଥିଲେ। ଘର ତିଆରି କରିବା ପାଇଁ କାଠ, ପଥର ଏବଂ ବାଲି ବି ଯୋଗାଇଦେଇଥିଲେ। ପରେ ସ୍ଥାନୀୟ ପବ୍ଲିକ ଓ୍ବାର୍କ ଡିପାର୍ଟମେଣ୍ଟ ଓ ସେଠାକାର ସେନା ପକ୍ଷରୁ ସାହାଯ୍ୟ ମିଳିଥିଲା। ସ୍କୁଲ ଘର ନିର୍ମାଣ ହେବା ପୂର୍ବରୁ ଦୀକ୍ଷିତ ରାଜପରିବାର ଅଧୀନରେ କବାଟ କି ଝରକା ନ ଥିବା ଦୁଇଟି ପୁରୁଣା ଭଡ଼ାଘରେ ସ୍କୁଲ ଚାଲିଥିଲା। ଥଣ୍ଡାରୁ ରକ୍ଷାପାଇବା ଲାଗି ସେନାର ଅଦରକାରୀ ପାରାଶୁଟ୍ରେ ଏହି ଘରକୁ ଘୋଡାଇ ରଖାଯାଉଥିଲା। ଏବେ ଲାମଡନ ମଡେଲ ସ୍କୁଲରେ ୩୦୦ ପିଲା ପଢୁଛନ୍ତି। ଗୋଟିଏ ହଲ୍ ଓ ହଷ୍ଟେଲ ବି ରହିଛି। ହଷ୍ଟେଲରେ ରହୁଛନ୍ତି ୭୦ ପିଲା। ଲଦାଖରେ ପ୍ରଥମେ ପହଞ୍ଚିଥିବା ଫ୍ରାନ୍ସ, ଜର୍ମାନୀ ଓ ବେଲଜିୟମ୍ର ଟୁରିଷ୍ଟମାନେ ଏବେ ଏହି ସ୍କୁଲକୁ ଅନୁଦାନ ଦେଉଛନ୍ତି। ୪୦ ବର୍ଷ ମଧ୍ୟରେ ତାଙ୍କ ସ୍କୁଲରୁ ୫ ହଜାରରୁ ଊର୍ଦ୍ଧ୍ୱ ପିଲା ପାସ୍ କରି ବିଭିନ୍ନ କ୍ଷେତ୍ରରେ ପ୍ରତିଷ୍ଠା ଲାଭ କରିପାରିଛନ୍ତି।