ପ୍ରାଥମିକ ଅବସ୍ଥାରେ ଭାଷା ଶିକ୍ଷା କରିବା ପିଲାଙ୍କ ପକ୍ଷେ କଷ୍ଟକର ହୋଇଥାଏ। କିନ୍ତୁ ଏହି କାର୍ଯ୍ୟକୁ ଅନାୟାସରେ କରିପାରୁଛନ୍ତି ଜଣେ ୮ ବର୍ଷର ବାଳକ। ସେ ୧୦୬ଟି ଭାଷାରେ ପଢ଼ି ଲେଖି ପାରୁଛନ୍ତି। ଏହି ବିସ୍ମୟ ବାଳକ ହେଉଛନ୍ତି ଚେନ୍ନାଇର ନିଆଲ ଥୋଗୁଲୁଭା। ଏଥିସହ ସେ ୧୦ଟି ଭାଷାରେ କଥା ହୋଇପାରନ୍ତି। ନିଆଲଙ୍କ ଏହି ଅନନ୍ୟ ଗୁଣ ଏବେ ଅନେକ ବ୍ୟକ୍ତିଙ୍କ ଦୃଷ୍ଟି ଆକର୍ଷଣ କରୁଛି। ଇଣ୍ଟରନେଟ୍ ଓ ୟୁଟ୍ୟୁବ୍ ସହାୟତାରେ ସେ ଏତେ ସବୁ ଭାଷା ଶିଖିଥିବା ପ୍ରକାଶ କରିଛନ୍ତି। ଇଣ୍ଟର୍ନ୍ୟାଶ୍ନାଲ ଫୋନେଟିକ୍ ଆଲ୍ଫାବେଟ୍ (ଆଇପିଏ) ଏ ଦିଗରେ ତାଙ୍କୁ ବେଶ୍ ସହାୟକ ହୋଇଛି। ଏହା ମାଧ୍ୟମରେ ସେ ପ୍ରାୟ ସମସ୍ତ କଥିତ ଭାଷାକୁ ଟ୍ରାନ୍ସକ୍ରାଇବ୍ କରିପାରନ୍ତି। ଏହା ମଧ୍ୟ କୌଣସି ଶବ୍ଦର ଉଚ୍ଚାରଣ ସ୍ପଷ୍ଟ ଭାବେ କହିଦେଇଥାଏ। ତେବେ ଏଥିପ୍ରତି ତାଙ୍କର ଆଗ୍ରହ କେବେ ପ୍ରକାଶ ପାଇଲା ତାହା ସେ ଜାଣି ନ ଥିବା କହିଛନ୍ତି। ଏବେ ସେ ଆହୁରି ୫ଟି ଭାଷା ଶିକ୍ଷା କରୁଛନ୍ତି। ଏତେ କମ୍ ବୟସରେ ନିଆଲଙ୍କ ବିଭିନ୍ନ ଭାଷା ଶିକ୍ଷା କରିବାର ଆଗ୍ରହ ଅନ୍ୟମାନଙ୍କ ପାଇଁ ପ୍ରେରଣାଦାୟୀ ନିଶ୍ଚୟ।