ସାମ୍ପ୍ରତିକ ସମୟରେ ଡିଜିଟାଲ ଶିକ୍ଷାର ଆବଶ୍ୟକତାକୁ ଉପଲବ୍ଧି କରି ଝାଡଖଣ୍ଡର ଜଣେ ଯୁବକ ଗ୍ରାମାଞ୍ଚଳ ପିଲାମାନଙ୍କୁ ସୌରଚାଳିତ ଭ୍ରାମ୍ୟମାଣ କମ୍ପ୍ୟୁଟର କ୍ଲାସ୍ ମାଧ୍ୟମରେ ଶିକ୍ଷା ଦେଉଛନ୍ତି। ସାନ୍ଓ୍ବିଲ ଶ୍ରୀବାସ୍ତବ ‘ଏଡିମ୍ପ୍ୟାକ୍ଟ’ ସଂଗଠନ ମାଧ୍ୟମରେ ବିଭିନ୍ନ ରାଜ୍ୟରେ ଦୁର୍ଗମ ଗ୍ରାମାଞ୍ଚଳର ହଜାର ହଜାର ପିଲାଙ୍କୁ ଡିଜିଟାଲ ଶିକ୍ଷା ପ୍ରଦାନ କରୁଛନ୍ତିି। ପିଲାମାନଙ୍କୁ ଡିଜିଟାଲ ଶିକ୍ଷା ଦେବା ଲାଗି ସେ ସେପ୍ଟେମ୍ବର ୨୦୧୮ରେ ପ୍ରଥମେ ରାଞ୍ଚିରେ ‘ପ୍ରୋଜେକ୍ଟ ସୂର୍ଯ୍ୟକିରଣ’ ଯୋଜନା ଆରମ୍ଭ କରିଥିଲେ। ପରେ ଏହା ଦିଲ୍ଲୀ, ମହାରାଷ୍ଟ୍ର, ବିହାର, ଝାଡ଼ଖଣ୍ଡ, ମେଘାଳୟ ଓ କର୍ନାଟକରେ କାର୍ଯ୍ୟ ଆରମ୍ଭ କରିଛି। ସୌରଚାଳିତ ଭ୍ରାମ୍ୟମାଣ କମ୍ପ୍ୟୁଟର ଲାବ୍ ଦ୍ୱାରା ଏହି ଅଭିଯାନ ଚଳାଇଛନ୍ତି ଶ୍ରୀବାସ୍ତବ। ଓ୍ବାଇଫାଇ ସଂଯୋଗ ସହ ଲାବ୍ରେ ୫ଟି କମ୍ପ୍ୟୁଟର ଓ ଗୋଟିଏ ଡେମୋ କମ୍ପ୍ୟୁଟର ରଖାଯାଇଛି। ଲାବ୍ରେ ୬ରୁ ୭ ଜଣ ପିଲା ବସିପାରୁଛନ୍ତି। ୧ କେଭିଏ ସୋଲାର୍ ଇନଭର୍ଟର ଲାବ୍କୁ ବିଦ୍ୟୁତ୍ ଯୋଗାଉଛି। ଏଥିରେ ୬ରୁ ୭ ଘଣ୍ଟା ଯାଏ ପାଓ୍ବାର ବ୍ୟାକ୍ଅପ୍ ସିଷ୍ଟମ୍ ରହିଛି। ଏଡିମ୍ପ୍ୟାକ୍ଟକୁ ଚଳାଇବା ଲାଗି ଇଞ୍ଜିନିୟରିଂ ଡିଗ୍ରୀଧାରୀଙ୍କୁ ନିଯୁକ୍ତି ଦେଇଛନ୍ତି ଶ୍ରୀବାସ୍ତବ। ଏହି ସଂସ୍ଥା ଦ୍ୱାରା ଏବେ ସୁଦ୍ଧା ବିଭିନ୍ନ ଗାଁ ଓ ସ୍କୁଲରେ ୪ ହଜାରରୁ ଊର୍ଦ୍ଧ୍ୱ ପିଲା ଉପକୃତ ହୋଇସାରିଲେଣି। କମ୍ପ୍ୟୁଟର ଅପରେଟିଂ, ଫାଇଲ ଖୋଲିବା, ଇଣ୍ଟର୍ନେଟ, ଇମେଲ ଓ କ୍ୟାସ୍ଲେସ ଟ୍ରଞ୍ଜାକସନ ସମ୍ବନ୍ଧରେ ଶିକ୍ଷା ଦିଆଯାଉଛି। ଜିଲା ଶିକ୍ଷା ଅଧିକାରୀଙ୍କ ଅନୁମତି ନେଇ ସାମାଜିକ କର୍ମୀ, ଗାଁ ମୁଖିଆଙ୍କ ସହଯୋଗରେ ସମ୍ପୃକ୍ତ ଗାଁ ଓ ସ୍କୁଲଗୁଡିକରେ ଏହାକୁ ତ୍ୱରାନ୍ବିତ କରାଯାଉଛି। ଭିତ୍ତିଭୂମି ତଥା ବୃତ୍ତିଧାରୀ ଶିକ୍ଷକଙ୍କ ଅଭାବରୁ ଦୁର୍ଗମ ଗ୍ରାମଗୁଡିକରେ ଡିଜିଟାଲ ଶିକ୍ଷା ପାଇବାରୁ ବଞ୍ଚିତ ପିଲାମାନଙ୍କ ସମସ୍ୟା ଅନେକାଂଶରେ ଦୂର ହୋଇପାରିଛି ବୋଲି କହନ୍ତି ଶ୍ରୀବାସ୍ତବ।
