ସମାଜରେ ଆଧୁନିକତାର ପ୍ରଭାବ ଯେତେ ବଢିଲେ ବି ଉତ୍ତରପ୍ରଦେଶର ଏକ ଗାଁରେ ଲୋକଙ୍କ ମନରୁ ଅନ୍ଧବିଶ୍ୱାସ ଦୂର ହୋଇନାହିଁ। ଫତେପୁର ଜିଲା ସାରୋଲି ଗାଁରେ ଜଣେ କୃଷକ ତାଙ୍କ ମଇଁଷି ଛୁଆ ପାଇଁ ମୁଣ୍ଡନ ଉତ୍ସବ ପାଳନ କରିବା ଏହାର ଏକ ସଦ୍ୟତମ ଉଦାହରଣ। ମଇଁଷିର ମଣିଷ ଛୁଆ ପରି ଚୁଟି ନ ଥାଏ ଯେ ତାକୁ ମୁଣ୍ଡନ କରାଯିବ। କିନ୍ତୁ ଅନ୍ଧବିଶ୍ୱାସପୀଡ଼ିତ ଜୟଚନ୍ଦ୍ର ସିଂ ନାମକ ଏହି କୃଷକଙ୍କ ଏଭଳି ଅଜବ ଉତ୍ସବ ପାଳନ ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି। ଜୟଚନ୍ଦ୍ର ଏକ ମଇଁଷି ପାଳିଥିଲେ। ସେ ଯେତେ ଛୁଆ ଦେଉଥିଲା ସେମାନେ ମରିଯାଉଥିଲେ। ତେବେ ମଇଁଷି ଛୁଆକୁୁ ବଞ୍ଚାଇବା ଲାଗି ଗାଁର କେତେଜଣ ମୁଖିଆ ତାଙ୍କୁ ମୁଣ୍ଡନ ଉତ୍ସବ ପାଳନ କରିବା ଲାଗି ପରାମର୍ଶ ଦେଇଥିଲେ ଓ ସେ ଏବେ ସଦ୍ୟ ଜନ୍ମ ନେଇଥିବା ଛୁଆଟିକୁ ବଞ୍ଚାଇବା ପାଇଁ ଏହା ପାଳନ କରିଛନ୍ତି। ଏହି ଅବସରରେ ଜୟଚନ୍ଦ୍ର ଗାଁ ଲୋକଙ୍କୁ ଏକ ଭୋଜି ମଧ୍ୟ ଦେଇଛନ୍ତି। ମଇଁଷି ଛୁଆକୁ ପ୍ରଥମେ ଏକ ଲାଲ୍ କପଡାରେ ଘୋଡାଇ ଦିଆଯାଇଥିଲା। ପରେ ନାପିତ ତା’କୁ ଲଣ୍ଡା କରିଥିଲେ। ଏହି ସମୟରେ ଗାଁର ମହିଳାମାନେ ମଇଁଷି ଛୁଆ ଚାରିପାଖରେ ଠିଆ ହୋଇ ଲୋକଗୀତ ଗାନ କରିଥିଲେ। ସାରୋଲି ଏବଂ ତା’ ଆଖପାଖ ଗାଁରୁ ପ୍ରାୟ ୩୦୦ ଲୋକ ଏହି ଉତ୍ସବରେ ଯୋଗଦେଇଥିଲେ।