କମ୍ପ୍ୟୁଟର ଶିକ୍ଷାର ବିକାଶ ଲାଗି ଶୋହିବ ଦାର ଯେଉଁ ପ୍ରୟାସ ଜାରି ରଖିଛନ୍ତି ତାହା ପ୍ରଶଂସନୀୟ। ସେ ତିନୋଟି ରାଜ୍ୟର ୧୫,୦୦୦ରୁ ଊର୍ଦ୍ଧ୍ୱ ଶିଶୁଙ୍କୁ ମାଗଣାରେ କମ୍ପ୍ୟୁଟର ଶିକ୍ଷା ପ୍ରଦାନ କରୁଛନ୍ତି। ୨୦୧୭ରେ ସେ ଆନୁଷ୍ଠାନିକ ଭାବେ ‘ପି ଜାମ୍ ଫାଉଣ୍ଡେଶନ’ ପ୍ରତିଷ୍ଠା କରି ଶିକ୍ଷାଦାନ ଜାରି ରଖିଛନ୍ତି। ଏହା ମାଧ୍ୟମରେ ସେ ମହାରାଷ୍ଟ୍ର, ତେଲଙ୍ଗାନା ଏବଂ କଶ୍ମୀରର ୫୧ଟି ସ୍କୁଲ୍ରେ ୧୫,୫୦୦ ଶିଶୁଙ୍କୁ କମ୍ପ୍ୟୁଟର ଶିକ୍ଷା ଦେଉଛନ୍ତି। ଏଥିପାଇଁ କୌଣସି ଦେୟ ନେଉନାହାନ୍ତି ସେ। ଶୋହିବ ଓ ତାଙ୍କ ଇଞ୍ଜିନିୟର ବନ୍ଧୁମାନେ ଏହି ସବୁ ସ୍କୁଲ୍ରେ ୪୦୦ରୁ ଊର୍ଦ୍ଧ୍ୱ କମ୍ପ୍ୟୁଟର ସେମାନଙ୍କ ଉଦ୍ୟମରେ ଲଗାଇ ଶିକ୍ଷାଦାନ ବ୍ୟବସ୍ଥାରେ ନିଜକୁ ବି ସାମିଲ କରିଛନ୍ତି। ଏପରି କି କରୋନା ସମୟରେ ପିଲାମାନଙ୍କୁ ଏହି ଶିକ୍ଷାରୁ ବଞ୍ଚିତ ନ କରିବା ପାଇଁ ସେମାନେ ‘ଗେମ୍ ଅଫ୍ କରୋନା’ର ଏକ ସାପ-ଶିଡି ଖେଳ ଆରମ୍ଭ କରି ପିଲାମାନଙ୍କୁ ଉତ୍ସାହିତ କରିଛନ୍ତି। ଶୋହିବ କଶ୍ମୀରର ମୂଳ ବାସିନ୍ଦା ହୋଇଥିଲେ ବି ବେଙ୍ଗାଲୁରୁରେ ଇଞ୍ଜିନିୟରିଂ ଶିକ୍ଷା ଶେଷ କରି ପୁଣେର ଏକ ସରକାରୀ ସ୍କୁଲରେ ଡିଜିଟାଲ ଶିକ୍ଷା ଦେଉଥିବାବେଳେ ପିଲାମାନେ ଏ କ୍ଷେତ୍ରରେ ସମ୍ପୂର୍ଣ୍ଣ ଦୁର୍ବଳ ଥିବା ଲକ୍ଷ୍ୟ କରିଥିଲେ। ପରେ କେବଳ ସେହି ସ୍କୁଲ ନୁହେଁ, ଅନ୍ୟ ସ୍କୁଲରେ ପିଲାମାନଙ୍କୁ ଡିଜିଟାଲ କ୍ଷେତ୍ରରେ ଧୁରନ୍ଧର କରିବା ପାଇଁ ଅଣ୍ଟାଭିଡି ତାଙ୍କ ସାଥୀ ଇଞ୍ଜିନିୟରମାନଙ୍କ ସହ ମିଶି କମ୍ପ୍ୟୁଟର ଯୋଗାଡ଼ କରିବା ପରେ ପିଲାମାନଙ୍କୁ ଶିକ୍ଷା ଦେବା ଆରମ୍ଭ କରିଥିଲେ।