ବର୍ଜ୍ୟବସ୍ତୁକୁ ପୁନଃ ଉପଯୋଗ କରିବାରେ ଯେଉଁ କେତେଜଣ କାର୍ଯ୍ୟ କରୁଛନ୍ତି ସେମାନଙ୍କ ମଧ୍ୟରେ ବେଙ୍ଗାଲୁରୁର ପ୍ରଦୀପ ନାୟାର ଅନ୍ୟତମ। ସେ ଆଇଟି କମ୍ପାନୀ ଚାକିରି ଛାଡି ଶିପିଂ ଇଣ୍ଡଷ୍ଟ୍ରିରୁ ବାହାରୁଥିବା ବର୍ଜ୍ୟକାଠରୁ ଫର୍ନିଚର ତିଆରି କରୁଛନ୍ତି। ଏହା ପ୍ଲାଷ୍ଟିକ୍ ଫର୍ନିଚରଠାରୁ ବହୁତ ଭଲ ଓ ପରିବେଶ ଉପଯୋଗୀ ହୋଇପାରୁଛି। ଶିପିଂ କମ୍ପାନୀକୁ ବିଦେଶରୁ ବିଭିନ୍ନ ଯନ୍ତ୍ରାଂଶ ପାଇନ କାଠରେ ପ୍ୟାକ୍ ହୋଇ ଆସେ ଓ ତାହାକୁ କମ୍ପାନୀଗୁଡିକ ବାହାରେ ଫିଙ୍ଗି ଦିଅନ୍ତି। ପ୍ରତିବର୍ଷ ପ୍ରାୟ ୯୦ ଟନ୍ରୁ ଅଧିକ କାଠ ବାହାରେ ଜମାହୋଇ ପରିବେଶକୁ ପ୍ରଦୂଷିତ କରେ। ତେବେ ପ୍ରଦୀପଙ୍କ ଏଭଳି ପଦକ୍ଷେପ ଯୋଗୁ ଏବେ ପ୍ରଦୂଷଣ ଦୂର କରିବା ସହ ଶସ୍ତାରେ ଲୋକମାନେ ଫର୍ନିଚର ପାଇପାରୁଛନ୍ତି। ପାଣି ଓ ଖରାରେ ପାଇନ କାଠ ନଷ୍ଟ ହେଉ ନ ଥିବାରୁ ଏହି ଫର୍ନିଚରଗୁଡିକ ବହୁଦିନ ରହିପାରିବ ବୋଲି କହନ୍ତି ପ୍ରଦୀପ। ସ୍ଥାନୀୟ କାରିଗରଙ୍କ ହସ୍ତକଳାର ଛାପ ଏଥିରେ ବି ଦେଉଛନ୍ତି। ୨୦୧୫ରେ ସେ ୟୁବିଲିଡ୍ କମ୍ପାନୀ ପ୍ରତିଷ୍ଠା କରି ଫର୍ନିଚର ତିଆରି କରୁଛନ୍ତି। ତାଙ୍କୁ ଏହି କାର୍ଯ୍ୟରେ ସାହାଯ୍ୟ କରୁଛନ୍ତି ତାଙ୍କର ଦୁଇ ଜଣ ବନ୍ଧୁ ଲାବଣ୍ୟ ଓ ଅରୁଣ । ପ୍ରାୟ ୨୫ ଶହରୁ ଅଧିକ ଡିଜାଇନର ଫର୍ନିଚର ୩୦ ହଜାରରୁ ଊର୍ଦ୍ଧ୍ୱ ଗ୍ରାହକଙ୍କୁ ଯୋଗାଇ ସାରିଲେଣି। ସେମାନେ ବର୍ଜ୍ୟକାଠରୁ ଫର୍ନିଚର ତିଆରି କରିବା କୌଶଳ ସମ୍ପର୍କରେ ଲୋକମାନଙ୍କୁ ଶିକ୍ଷା ଦେବା ଲାଗି ଆଗକୁ ଯୋଜନା ରଖିଛନ୍ତି ବୋଲି କହନ୍ତି ପ୍ରଦୀପ।