ଉତ୍ତର ଭାରତରେ ମୁଖ୍ୟତଃ ପଞ୍ଜାବ, ହରିୟାଣା, ଦିଲ୍ଲୀ ଓ ଉତ୍ତରପ୍ରଦେଶର କେତେକାଂଶରେ ଶସ୍ୟଖୁଣ୍ଟା ଓ ଅବଶେଷାଂଶ ପୋଡ଼ି ଯୋଗୁ ବାୟୁ ପ୍ରଦୂଷଣ ବଢ଼ୁଥିବାରୁ ଏହା ଉପରେ କଟକଣା ଲଗାଯାଇଛି। ତଥାପି କୃଷକମାନେ ବହୁ ସ୍ଥାନରେ ନଡ଼ା ପୋଡୁଛନ୍ତି। ଏଭଳି ଅଭ୍ୟାସରୁ ସେମାନଙ୍କୁ ଦୂରେଇ ରଖିବା ପାଇଁ ଦିଲ୍ଲୀର ଇଞ୍ଜିନିୟର ଅର୍ପିତ ଘୁପର ଏକ ନୂଆ ପଦକ୍ଷେପ ନେଇଛନ୍ତି। ସେ ପଞ୍ଜାବ ଓ ହରିୟାଣା କୃଷକମାନଙ୍କଠାରୁ ନଡ଼ା କିଣି ଥର୍ମୋକୁଲ ଓ ମାଟିରେ ମିଶିପାରୁଥିବା ବିକଳ୍ପ ଉପତ୍ାଦ ପ୍ରସ୍ତୁତ କରୁଛନ୍ତି। ଅର୍ପିତଙ୍କ ବୟସ ୩୦। ସେ ୨୦୧୯ରେ ପଞ୍ଜାବ ଓ ହରିୟାଣା କୃଷକମାନଙ୍କୁ ନଡ଼ା ପୋଡ଼ି ସମସ୍ୟା ସମାଧାନ କରିବା ଲାଗି ଅଭିଯାନ ଆରମ୍ଭ କରିଥିଲେ। ସେ ‘ଧରାକ୍ଷା ଇକୋ ସଲ୍ୟୁଶନ’ ଷ୍ଟାର୍ଟଅପ୍ ମାଧ୍ୟମରେ ଏହା କରୁଛନ୍ତି। ଏହି ଷ୍ଟାର୍ଟଅପ୍ ଦ୍ୱାରା ଏବେସୁଦ୍ଧା ପଞ୍ଜାବ ଓ ହରିୟାଣାରେ ୨୫୦ଟନ୍ ନଡ଼ା ପୋଡ଼ି ରୋକିବାରେ ସକ୍ଷମ ହୋଇପାରିଛନ୍ତି। ଅର୍ପିତ ପ୍ରତି ଏକରରୁ ନଡ଼ା ସଂଗ୍ରହ କରି ସେ ବାବଦରେ ୫୦୦ ଟଙ୍କା ଦେଉଛନ୍ତି। ଗତ ବର୍ଷ ଅର୍ପିତ ଏହି ଷ୍ଟାର୍ଟଅପ୍ ମାଧ୍ୟମରେ ୨୫ ଲକ୍ଷ ଟଙ୍କା କାରବାର କରିଛନ୍ତି।