କମ୍ ବୟସରେ ବବିତା ରାଜପୁତଙ୍କ କାର୍ଯ୍ୟ ଖୁବ୍ ପ୍ରେରଣାଦାୟକ। ମଧ୍ୟପ୍ରଦେଶର ଅଗୋଥା ଗାଁରେ ରହନ୍ତି ବବିତା। ବହୁ ବର୍ଷ ଧରି ଶୁଖିଲା ପଡ଼ିଥିବା ଏକ ୭୦ ଏକର ବିଶିଷ୍ଟ ହ୍ରଦକୁ ସେ ପୁନରୁଦ୍ଧାର କରିବାକୁ ସକ୍ଷମ ହୋଇଛନ୍ତି। ସେ ପାହାଡ଼ ପାଦଦେଶରେ ୧୨ ଫୁଟ ଚଉଡ଼ା ଏବଂ ୧୦୭ ମିଟର ଲମ୍ବର ଏକ ନାଳ ଖୋଳି ପାହାଡ଼ରୁ ବୋହିଯାଉଥିବା ବର୍ଷାପାଣିକୁ ହ୍ରଦରେ ଠୁଳ କରୁଛନ୍ତି। ବବିତା ‘ଜଳ ସାଥୀ ଗ୍ରୁପ୍’ ଗଠନ କରି ତା’ ମାଧ୍ୟମରେ ନାଳ ଖୋଳିବା କାର୍ଯ୍ୟ ସମ୍ପାଦନ କରିପାରିଛନ୍ତି। ସେ ଏହି ଗ୍ରୁପ୍ରେ ୧୨ଟି ଗାଁର ୨୦୦ ମହିଳାଙ୍କୁ ସାମିଲ କରିଛନ୍ତି। ନାଳରେ ଯେତିକି ବର୍ଷା ଜଳ ଆସୁଛି ସେଥିରେ ହ୍ରଦର ୪୦% ପୂରଣ ହେଉଛି ଓ ଅଧିକ ବର୍ଷା ହେଲେ ହ୍ରଦ ପୂରା ହେବ ବୋଲି କହନ୍ତି ବବିତା। ଶୁଖିଲା ହ୍ରଦକୁ ଜବରଦଖଲରେ ରଖିଥିବା ଲୋକମାନେ ପ୍ରଥମେ ବବିତାଙ୍କୁ ବିରୋଧ କରିଥିଲେ ବି ସେମାନେ ପରେ ତାଙ୍କ ସଫଳତାକୁ ପ୍ରଶଂସା କରିଛନ୍ତି। ଏବେ ହ୍ରଦ ନିକଟ କ୍ଷେତରେ ଚାଷ କରାଯାଉଛି ଓ ମରୁଡ଼ି ସମସ୍ୟା ଦୂର ହୋଇପାରିଛି।