ଶିକ୍ଷକଙ୍କ ନାମ ଭେରାରାମ ଭାଖର। ଲୋକେ ତାଙ୍କୁ ଶ୍ରଦ୍ଧାରେ ଡାକୁଛନ୍ତି ଗଛବାଲା ମାଷ୍ଟର। ସେ ୪ ଲକ୍ଷ ଗଛ ଲଗାଇ ରାଜସ୍ଥାନର ଶୁଷ୍କ ଅଞ୍ଚଳକୁ ସବୁଜ କରିସାରିଲେଣି। ସେ ଦୀର୍ଘ ୨୪ ବର୍ଷ ମଧ୍ୟରେ ଏହି ସଂଖ୍ୟକ ଗଛ ଲଗାଇ ସାରିଛନ୍ତିି। ଭେରାରାମ ଗଛ ଲଗାଇବା ପରେ ନିଜେ ତାହାର ଜଗାରଖା କରୁଛନ୍ତି ଏବଂ ପ୍ରତିବର୍ଷ ଗୋଟିଏ ମାସର ଦରମା ଏଥିରେ ଖର୍ଚ୍ଚ କରୁଛନ୍ତି। ସେ କଲେଜରେ ପଢୁଥିବା ସମୟରେ ସାଙ୍ଗଙ୍କ ସହ ମିଶି ପ୍ରଥମେ ୫୦ଟି ଗଛ ଲଗାଇଥିଲେ ଓ ସେବେଠାରୁ ସେ ଗଛଲଗା କାମ ଜାରି ରଖିଛନ୍ତି। ଶିକ୍ଷା ଶେଷକରି ସେ ଶିକ୍ଷକଭାବେ ଯୋଗଦେବା ପରେ ମଧ୍ୟ ଗଛ ଲଗାଇ ଆସୁଛନ୍ତି। ଭେରାରାମ ବିଭିନ୍ନ ସ୍କୁଲ ଓ ଗାଁର ସର୍ବସାଧାରଣ ଜମିରେ ଏହି ସବୁ ଗଛ ଲଗାଉଛନ୍ତି। ସେ ବୃକ୍ଷରୋପଣ ସମ୍ପର୍କରେ ଛୋଟ ଛୋଟ କାର୍ଯ୍ୟକ୍ରମ ଆୟୋଜନ କରୁଛନ୍ତି। ଏହା ବ୍ୟତୀତ ଲୋକମାନଙ୍କୁ ମାଗଣାରେ ଗଛ ଦେଇ ତାଙ୍କ ସବୁଜ ଅଭିଯାନରେ ସାମିଲ କରୁଛନ୍ତି। କେବଳ ବୃକ୍ଷରୋପଣ ନୁହେଁ, ସେ ପଶୁପକ୍ଷୀ ସଂରକ୍ଷଣରେ ବି ସମୟ ଦେଉଛନ୍ତି। ଏବେ ସୁଦ୍ଧା ସେ ୫୦୦ରୁ ଅଧିକ ବନ୍ୟପଶୁଙ୍କୁ ଉଦ୍ଧାର କରିସାରିଲେଣି। ପରିବେଶ ଲାଗି ସମର୍ପିତ ଭେରାରାମ ସମାଜର ଜଣେ ପ୍ରକୃତ ହିରୋ ଓ ସମାଜ ଲାଗି ପ୍ରେରଣା।