ରାସ୍ତାକଡ଼ରେ ବହୁ ଅସହାୟ ଶିଶୁ ବୁଲୁଥିବା ଦେଖାଯାଏ। ସେମାନଙ୍କ ପରିବାର ବି ରାସ୍ତାକଡ଼ରେ ରହି ସେମାନଙ୍କୁ ଭିକ୍ଷା ପାଇଁ ପ୍ରେରିତ କରିଥାନ୍ତି। ଏହା ବ୍ୟତୀତ ରାସ୍ତାକଡ଼ ଢାବା କିମ୍ବା ବିଭିନ୍ନ ପ୍ଲାଷ୍ଟିକ୍ ସଂଗ୍ରହ କେନ୍ଦ୍ରରେ ଏମାନେ ପରିବାର ସଦସ୍ୟଙ୍କ ସହ କାମ ବି କରିଥାନ୍ତି। କମ୍ ବୟସରେ ନିଶା ସେବନକରି ଏହି ପିଲାମାନେ ଖାଇବା ଭୁଲିଯାଆନ୍ତି। ଫଳରେ ସେମାନଙ୍କ ସ୍ବାସ୍ଥ୍ୟ ଗୁରୁତର ଭାବେ ପ୍ରଭାବିତ ହୋଇଥାଏ। ଏଭଳି ଅବସ୍ଥାରେ ରହୁଥିବା ପିଲାମାନଙ୍କୁ କୋଲକାତାର ମୋଇନ ବାନାର୍ଜୀ ଉଦ୍ଧାରକରି ଶିକ୍ଷାର ମୁଖ୍ୟ ସ୍ରୋତରେ ଯୋଡ଼ିବାରେ ଲାଗିଛନ୍ତି। ପ୍ରଥମେ ୭ରୁ ୧୧ ବର୍ଷ ବୟସର ପାଖାପାଖି କେତେଜଣ ଶିଶୁଙ୍କୁ ଉଦ୍ଧାରକରି ଶିକ୍ଷକଙ୍କ ସହାୟତାରେ ପଢ଼ାଇବା ଆରମ୍ଭ କରିଥିଲେ। ଏଥିପାଇଁ ସେ କାମ କରୁଥିବା ମହାଜୀବନ ସଂସ୍ଥାର ସହଯୋଗ ଲୋଡ଼ିଥିଲେ। ଏହା ସହ ଚାଇଲ୍ଡଲାଇଫ୍ ଏନ୍ଜିଓ ସହଯୋଗରେ ପିଲାମାନଙ୍କୁ ଚିକିତ୍ସା ସୁବିଧା ଯୋଗାଇଦେବା ସହ ସେମାନଙ୍କ କାଉନସେଲିଂ କରୁଛନ୍ତି। ଏବେ ସେ ପାଖାପାଖି ୪୦ଜଣ ଶିଶୁଙ୍କୁ ନିଶା କବଳରୁ ମୁକ୍ତକରି ସ୍କୁଲକୁ ଆଣିପାରିଛନ୍ତି। ଏହି ପିଲାମାନଙ୍କ ପରିବାର ମଧ୍ୟ ଶିକ୍ଷାର ମହତ୍ତ୍ୱ ଉପଲବ୍ଧି କରିବା ପରେ ଶିକ୍ଷା ପାଇଁ ଅଧିକ ଆଗ୍ରହ ପ୍ରକାଶ କରୁଛନ୍ତି।