ଗୋଟିଏ କି ଦୁଇଟି ନୁହେଁ, ଜଙ୍ଗଲରେ ବଢୁଥିବା ୧୨୦ ପ୍ରକାର ବିରଳ ଅର୍ଚିଡ୍ର ଭଣ୍ଡାର ପାଲଟିଛି କେରଳର ଭି.ୟୁ. ସାବୁଙ୍କ ଘର। ଏହି ସବୁ ଅର୍ଚିଡ୍ ହେଉଛି ସୌନ୍ଦର୍ଯ୍ୟବର୍ଦ୍ଧକ। ଏଥିରୁ ୬୦ଟି ସେ ପଶ୍ଚିମଘାଟ ପର୍ବତମାଳା ଅଞ୍ଚଳରୁ ସଂଗ୍ରହ କରିଛନ୍ତି। ଓ୍ବାଏନାଡା ସ୍ଥିତ ତାଙ୍କ ଘରକୁ ସଜାଇବା ଉଦ୍ଦେଶ୍ୟରେ ସେ ଏହିସବୁ ଅର୍ଚିଡ୍ ରଖିନାହାନ୍ତି ବରଂ ବିିଲୁପ୍ତ ଅବସ୍ଥାରୁ ଏଗୁଡ଼ିକୁ ସଂରକ୍ଷଣ କରି ରଖିବା ତାଙ୍କର ମୁଖ୍ୟ ଲକ୍ଷ୍ୟ। ଏଗୁଡ଼ିକ ମଧ୍ୟରେ ୩୬ଟି ଇଣ୍ଟର୍ନ୍ୟାଶନାଲ ୟୁନିୟନ ଫର୍ କଞ୍ଜରଭେଶନ ଅଫ୍ ନେଚର(ଆଇୟୁସିଏନ୍)ର ଅତି ସଙ୍କଟ ତାଲିକାରେ ଅଛି। ଅର୍ଚିଡ୍ ସଂରକ୍ଷଣରେ ସମର୍ପିତ ସାବୁ ୨୦୧୬ରେ ହେଲ୍ଥ କେୟାର ମ୍ୟାନେଜମେଣ୍ଟରେ ଡିଗ୍ରୀ ହାସଲ ପରେ ଏକ ହସ୍ପିଟାଲରେ କାର୍ଯ୍ୟ କରିବା ସହ ଅର୍ଚିଡ୍ ଚାଷ ମଧ୍ୟ କରୁଛନ୍ତି। କେବଳ ଏତିକି ନୁହେଁ ସେ ପଶ୍ଚିମଘାଟ ପର୍ବତମାଳରେ ଓ୍ବାଇଲ୍ଡ ଅର୍ଚିଡ୍ର ୨୦୦୦ ଚାରା ରୋପଣ କରିଛନ୍ତି। ଘରେ ବ୍ୟବସାୟ ଦୃଷ୍ଟିରୁ ୪ଟି ପଲିହାଉସରେ ୪,୦୦୦ ଅର୍ଚିଡ୍ ଗଛ ଲଗାଇଛନ୍ତି। ସାବୁଙ୍କ ଘରକୁ ୨୦ଟି ଅନୁଷ୍ଠାନର ପାଖାପାଖି ୫,୦୦୦ ପିଏଚ୍.ଡି. ଛାତ୍ରୀଛାତ୍ର ଓ ଉଦ୍ଭିଦବିଜ୍ଞାନୀ ବୁଲି ଦେଖିସାରିଲେଣି।