ସରକାରୀ ସ୍କୁଲରେ ପିଲା ସଂଖ୍ୟା କମିବା ଏବେ ଚିନ୍ତାର କାରଣ ହେଉଛି। ଏଥିରେ ସୁଧାର ଆଣିବା ଲାଗି ସରକାର ବିଭିନ୍ନ ଯୋଜନା କାର୍ଯ୍ୟକାରୀ କରୁଛନ୍ତି। ତଥାପି ସଫଳତା ଆଶାନୁରୂପ ହୋଇପାରୁନାହିଁ। କିନ୍ତୁ ମଧ୍ୟପ୍ରଦେଶର ନାଗପୁର-ଛିନ୍ଦଓ୍ବାଡା ରାସ୍ତାକଡ଼ରେ ଥିବା ଉମରାନାଳାସ୍ଥିତ ସରକାରୀ ପ୍ରାଥମିକ ସ୍କୁଲରେ ପିଲା ସଂଖ୍ୟା ବୃଦ୍ଧି କରିବାରେ ଜଣେ ଶିକ୍ଷକଙ୍କ ଭୂମିକା ଅତ୍ୟନ୍ତ ପ୍ରଶଂସନୀୟ। ଏହି ଶିକ୍ଷକ ହେଉଛନ୍ତି ମହେଶ ଭାଦେ। ୨୦୧୯ରେ ସେ ଏହି ସ୍କୁଲରେ ନିଯୁକ୍ତି ପାଇଥିଲେ। ସେତେବେଳେ ଏହି ସ୍କୁଲରେ ପ୍ରଥମରୁ ପଞ୍ଚମ ଯାଏ ମାତ୍ର ୫ଜଣ ପିଲା ପଢୁଥିଲେ। ପରେ ଏହି ସ୍କୁଲର ବିକାଶ ହେବା ପରେ ଏବେ ୪୮ରୁ ଅଧିକ ପିଲା ପଢୁଛନ୍ତି। ମହେଶ ଛୁଟିଦିନରେ ସବୁ ପରିବାରକୁ ଭେଟି ଶିକ୍ଷାର ମହତ୍ତ୍ୱ ସମ୍ପର୍କରେ ସଚେତନ କରିବାରେ ଲାଗିଗଲେ। ନିଜ ଖର୍ଚ୍ଚରେ ସ୍କୁଲର କିଛି ବିକାଶ ଓ ପଢ଼ାରେ ଉନ୍ନତି ଆଣିବା ପରେ ଏବେ ଘରୋଇ ସ୍କୁଲରୁ ପିଲାମାନେ ଆସି ଏହି ସରକାରୀ ସ୍କୁଲରେ ନାମ ଲେଖାଉଛନ୍ତି। ସ୍କୁଲରେ ପିଲାଙ୍କ ପାଇଁ ବିଭିନ୍ନ ମନୋରଞ୍ଜନ କାର୍ଯ୍ୟକ୍ରମ ବି କରାଯାଉଛି। ମହେଶ ସ୍କୁଲ ପରିସରରେ ବହୁ ଗଛ ଲଗାଇ ପରିବେଶକୁ ସବୁଜ କରିପାରିଛନ୍ତି।