ଜଳ ସଂରକ୍ଷଣ ଓ ଏହାର ପୁନଃ ବ୍ୟବହାରର ଆବଶ୍ୟକତା ଏବେ ଜରୁରୀ ହୋଇପଡ଼ିଛି। ଏଥିରେ ଯଦି ଆମେ ପ୍ରଭାବୀ ଢଙ୍ଗରେ ପଦକ୍ଷେପ ନ ନେବା ତେବେ ଆଗାମୀ ଦିନରେ ଗମ୍ଭୀର ଜଳାଭାବର ସମ୍ମୁଖୀନ ହେବାକୁ ପଡ଼ିବ। ଏହା ଏବେ ମଧ୍ୟ ଦେଶର ବିଭିନ୍ନ ସହର ଓ ଗ୍ରାମାଞ୍ଚଳରେ ଦେଖାଗଲାଣି। ଏଭଳି ସ୍ଥିତିକୁ ଲକ୍ଷ୍ୟ କରି ଘରେ ବ୍ୟବହୃତ ଜଳକୁ ପୁନଃ ବ୍ୟବହାରକ୍ଷମ କରିବାର ବାଟ ଦେଖାଇଛନ୍ତି ମହାରାଷ୍ଟ୍ରର ଅଭିଜିତ ସାଥେ। ଦେଶର ବିଭିନ୍ନ ସହରରେ ଥିବା ଆପାର୍ଟମେଣ୍ଟଗୁଡ଼ିକରେ ପ୍ରତିଦିନ ଘରୋଇ ଭାବେ ଯଥା ରୋଷେଇ, ଗାଧୁଆ, ବାସନ ଓ ପୋଷାକ ସଫା ଇତ୍ୟାଦିରେ ବ୍ୟବହୃତ ୧.୨୫ ଲକ୍ଷ ଲିଟର ଜଳ (ଗ୍ରେ ଓ୍ବାଟର)କୁ ରିସାଇକ୍ଲିଂ ବା ପୁନଃ ବ୍ୟବହାର ଯୋଗ୍ୟ କରିପାରୁଛନ୍ତି। ଏହାକୁ ପାନୀୟ ବ୍ୟତୀତ ପୁନର୍ବାର ଘର କାର୍ଯ୍ୟରେ ବ୍ୟବହାର କରାଯାଉଛି। ଗ୍ରେ ଓ୍ବାଟର ବ୍ୟବହାର ଫଳରେ ୪୦% ଫ୍ରେଶ୍ ଓ୍ବାଟର ବା ବିଶୁଦ୍ଧ ଜଳ ବଞ୍ଚାଯାଇପାରିବ ବୋଲି କହନ୍ତି ଅଭିଜିତ। ସେ ‘ଜଳ ସେବକ’ ସଂସ୍ଥା ପ୍ରତିଷ୍ଠା କରି ତା’ ମାଧ୍ୟମରେ ଏହି କାର୍ଯ୍ୟ ପରିଚାଳନା କରୁଛନ୍ତି। ଦେଶର ୧୨ଟି ସହରରେ ଏଥିପାଇଁ ଆବଶ୍ୟକ ଉପକରଣ ଲଗାଇପାରିଛନ୍ତି। ଘରୋଇ କାର୍ଯ୍ୟରେ ବ୍ୟବହାର ପରେ ଭାରତରେ ପ୍ରତିଦିନ ୩୧ ବିଲିୟନ ଜଳ ନଷ୍ଟ କରାଯାଇଥାଏ। ଏହାକୁ ଦେଖିଲେ ଜଳର ପୁନଃବ୍ୟବହାର କରିବାରେ ଅଭିଜିତଙ୍କ ପ୍ରୟାସର ପ୍ରାସଙ୍ଗିକତା ଯଥେଷ୍ଟ ରହିଛି ବୋଲି କୁହାଯିବ।