ଭାରତର ପୂର୍ବତନ ପ୍ରଧାନମନ୍ତ୍ରୀ ଲାଲ୍ବାହାଦୁର ଶାସ୍ତ୍ରୀଙ୍କ ‘ଜୟ ଯବାନ, ଜୟ କିଷାନ’ ଧ୍ୱନିର ମହତ୍ତ୍ୱକୁ ଉପଲବ୍ଧି କରିଛନ୍ତି ପଞ୍ଜାବର ପୂର୍ବତନ ସେନା ଅଧିକାରୀ ହରିଶ ଚନ୍ଦ୍ର ସିଂ। ସେ ସେନାରେ ନିଜର ଦାୟିତ୍ୱ ଶେଷ କରିବା ପରେ କୃଷିରେ ଲାଗିଛନ୍ତି। ହରିଶ ସିଂ ୨୦୧୫ରେ ସେନାର କର୍ନେଲ ପଦବୀରୁ ଅବସର ନେବା ପରେ ସୁପରଫୁଡ୍ ଚାଷ କରିବା ଲାଗି ନିଷ୍ପତ୍ତି ନେଇଥିଲେ।
ସେଥିରେ ସଫଳ ହୋଇ ଏବେ ବର୍ଷକୁ ୧୧ ଲକ୍ଷ ଟଙ୍କା ରୋଜଗାର କରିପାରୁଛନ୍ତି। ସେ ପ୍ରଥମେ ପାଖାପାଖି ୧ ଏକର ଜମିରେ ଚିଆସିଡ୍ ଚାଷ ଆରମ୍ଭ କରିଥିଲେ। ସେଥିରେ ୧୫,୦୦୦ ଟଙ୍କା ଖଟାଇ ୧ ଲକ୍ଷ ଟଙ୍କା ପାଇଥିଲେ। ପରେ ସେ ଚିଆସିଡ୍ ସହିତ ଏବେ ପ୍ରାୟ ୪ ଏକର ଜମିରେ ଡ୍ରାଗନଫ୍ରୁଟ୍ସ ଓ ପର୍ପଲ ପଟାଟୋ ଚାଷ କରୁଛନ୍ତି। ଏହି ସବୁ ସୁପରଫୁଡ୍ ବେଶି ବିଦେଶରୁ ଆସୁଥିବାରୁ ଆମ ଦେଶରେ ଏହାକୁ କିଭଳି ଅଧିକ ଅମଳ କରାଯାଇପାରିବ ସେଥିପାଇଁ ଯୁବବର୍ଗଙ୍କୁ ଏହି ଚାଷ ସମ୍ପର୍କରେ ପ୍ରଶିକ୍ଷଣ ଦେଉଛନ୍ତି।