ଜଳ ସଙ୍କଟ ଦୂର କରିବା ଲାଗି ବର୍ଷାପାଣି ବ୍ୟବହାରର ଆବଶ୍ୟକତା ଏବେ ଅନୁଭବ କରାଗଲାଣି। ଏଥିପାଇଁ ବର୍ଷାଜଳ ସଂରକ୍ଷଣ ଓ ତାହାର ବ୍ୟବହାର ସମ୍ପର୍କରେ ବହୁ ବ୍ୟକ୍ତି ଓ କମ୍ପାନୀ ଚେଷ୍ଟା କରୁଛନ୍ତି। ତେବେ ଗୁଜରାଟ ସୁରଟର ଯୁବକ ରାହୁଲ କାଚା ବର୍ଷାପାଣି ସଂରକ୍ଷଣ କରିବା ସହ ତାହାକୁ ପାନୀୟଯୋଗ୍ୟ କରି ସେଥିରୁ ଆୟ କରିପାରୁଛନ୍ତି। ବର୍ଷାପାଣି ଅମୃତ ବୋଲି ପ୍ରମାଣ କରିଦେଇଛନ୍ତି। ରାହୁଲ ୨୦୨୧ରେ ଏହାର ବ୍ୟବହାର ସମ୍ପର୍କରେ ବିଚାର କରି କାର୍ଯ୍ୟ ଆରମ୍ଭ କରିଥିଲେ। ଏବେ ସେ ବର୍ଷାପାଣିକୁ ଗଚ୍ଛିତ କରି ତାହାକୁ ଫିଲ୍ଟର କରୁଛନ୍ତି ଓ ବୋତଲରେ ଭର୍ତ୍ତି କରି ୧୫୦ ଜଣ ଲୋକଙ୍କୁ ଦେଉଛନ୍ତି। ସେ ଯେଉଁ ପ୍ରଣାଳୀରେ ବର୍ଷାଜଳକୁ ପାନୀୟଯୋଗ୍ୟ କରିପାରୁଛନ୍ତି, ସେ ସମ୍ପର୍କିତ ଜ୍ଞାନକୌଶଳ ଅନ୍ୟମାନଙ୍କୁ ଯୋଗାଇ ଦେଉଛନ୍ତି । ପ୍ରାରମ୍ଭରେ ଏହି କାର୍ଯ୍ୟ ସହଜ ନ ଥିଲା। ଏହା ମଧ୍ୟ ବ୍ୟୟବହୁଳ ଥିଲା। ସେଥିପାଇଁ ରାହୁଲ ତାଙ୍କ ଟେକ୍ନୋଲୋଜି ସମ୍ପର୍କରେ ଅନେକ ଲୋକଙ୍କୁ ଜଣାଇବା ପରେ ସେମାନେ ଆର୍ଥିକ ସହଯୋଗ କରିଥିଲେ। ଏବେ ସେ ୨ ଲକ୍ଷ ଲିଟରର ଷ୍ଟୋରେଜ ଟାଙ୍କି ଓ ୧ ଲକ୍ଷ ଲିଟରର ଟାଙ୍କି ନିର୍ମାଣ କରିଛନ୍ତି। ଏଥିରେ ମୋଟ ୩୫ ଲକ୍ଷ ଟଙ୍କା ଖର୍ଚ୍ଚ ହୋଇଛି। କେବଳ ଏତିକି ନୁହେଁ,ରାହୁଲ ବର୍ଷା ପାଣି ଉପରେ ଲୋକଙ୍କୁ ସଚେତନ କରୁଛନ୍ତି। ଏବେ ସେ ତାଙ୍କ ଘର ଆଖପାଖରେ ଥିବା ୧୫୦ ଘରକୁ ବର୍ଷାପାଣି ପିଇବା ଲାଗି ଯୋଗାଇ ଦେଉଛନ୍ତି। ବର୍ଷାଜଳ ସଂରକ୍ଷଣରେ ମଧ୍ୟ ସେମାନଙ୍କୁ ସହଯୋଗ କରୁଛନ୍ତି।