ବିହାରର ଭାଗଲପୁର ଅଞ୍ଚଳରେ ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି। ଏଠାରେ ଜଣେ ବ୍ୟକ୍ତି ନିଜ ସ୍ତ୍ରୀଙ୍କୁ ତାଙ୍କ ପ୍ରେମିକ ସହ ବିବାହ କରାଇ ଦେଇଛନ୍ତି। କେବଳ ସେତିକି ନୁହେଁ, ଉପହାର ସ୍ବରୂପ ସେ ନିଜ ଅଢ଼େଇ ବର୍ଷର ପୁଅକୁ ମଧ୍ୟ ସ୍ତ୍ରୀଙ୍କ ହାତରେ ଟେକି ଦେଇଛନ୍ତି। ଏହି ଘଟଣା ଏବେ ଭାଗଲପୁରରେ ଚର୍ଚ୍ଚାର ବିଷୟ ପାଲଟିଥିବା ବେଳେ ଗାଁର ଅନେକ ଲୋକ ଏହି ବିବାହର ସାକ୍ଷୀ ରହିଛନ୍ତି। ଘଟଣାଟି ଭାଗଲପୁର ଖିସିବାନ୍ଦ ପଞ୍ଚାୟତର ସାଲେପୁର ଗାଁର। ଏଠାରେ ଜଣେ ବ୍ୟକ୍ତି ଘରଭଡ଼ା ନେଇ ସ୍ତ୍ରୀ ଓ ଗୋଟିଏ ପୁଅ ସହ ରହୁଥିଲେ। କିଛିଦିନ ତଳେ କୌଣସି ଏକ ମାମଲାରେ ଉକ୍ତ ବ୍ୟକ୍ତିଙ୍କୁ ଜେଲ ଯିବାକୁ ପଡ଼ିଥିଲା। ସେ ଜେଲ୍ରେ ଥିବାବେଳେ ତାଙ୍କ ସ୍ତ୍ରୀଙ୍କର ଘର ମାଲିକଙ୍କ ପୁଅ ସହ ପ୍ରେମ ସମ୍ପର୍କ ଗଢ଼ି ଉଠିଥିଲା। ଉକ୍ତ ବ୍ୟକ୍ତି ଜଣକ ଜେଲରୁ ଫେରିବା ପରେ ସ୍ତ୍ରୀଙ୍କ ପ୍ରେମ କାହାଣୀ ସମ୍ପର୍କରେ ସୂଚନା ପାଇଥିଲେ। ଦିନେ ପଞ୍ଚାୟତ ଡାକି ସରପଞ୍ଚଙ୍କ ଉପସ୍ଥିତିରେ ସ୍ତ୍ରୀଙ୍କର ବିବାହ ଉକ୍ତ ଘର ମାଲିକଙ୍କ ପୁଅ ସହ କରିବାକୁ ପ୍ରସ୍ତାବ ଦେଇଥିଲେ। ଏଥିରେ ପଞ୍ଚାୟତ ରାଜି ହୋଇଯିବାରୁ ସେ ସ୍ତ୍ରୀଙ୍କର ବିବାହ କରିଦେବା ସହ ନିଜ ଅଢ଼େଇ ବର୍ଷର ପୁଅକୁ ଉପହାର ଆକାରରେ ଦେଇଥିବା ସୂଚନା ମିଳିଛି।