ନୂଆଦିଲ୍ଲୀ, ୧୪।୮(ପି.ଟି.)- କିମ୍ବଦନ୍ତୀ ଭାରତୀୟ ମହିଳା ସ୍ପ୍ରିଣ୍ଟର ପି.ଟି. ଉଷା ଏସିଆନ ଆଥ୍ଲେଟିକ୍ ଆସୋସିଏଶନ (ଏଏଏ)ର ଆଥ୍ଲେଟିକ କମିଶନ ସଦସ୍ୟ ହୋଇଛନ୍ତି। ଉପମହାଦେଶୀୟ ଷ୍ଟେଜ୍ରେ ଚମତ୍କାର ଆଚିଭମେଣ୍ଟ ପାଇଁ ଉଷାଙ୍କୁ ଏହି ସମ୍ମାନଜନକ ସଦସ୍ୟତା ପଦ ପାଇଁ ନିଯୁକ୍ତ କରାଯାଇଛି। ୫୫ ବର୍ଷୀୟା ଉଷା ତାଙ୍କ ସମୟରେ ଏସିଆ ମହାଦେଶର ଶ୍ରେଷ୍ଠ ମହିଳା ଧାବିକା ରହିଥିଲେ। ୧୯୯୨ ଅଲିମ୍ପିକ ସ୍ବର୍ଣ୍ଣ ପଦକ ବିଜେତା ହାମର୍ ଥ୍ରୋୟର ଉଜବେକିସ୍ତାନର ଆନ୍ଦ୍ରେ ଅବଦୁଭାଲିୟେଭ ୬ ସଦସ୍ୟ ବିଶିଷ୍ଟ ଏଏଏ ଆଥ୍ଲେଟିକ କମିଶନର ଅଧ୍ୟକ୍ଷ ରହିଛନ୍ତି। ‘ଏଏଏ ଆଥ୍ଲେଟିକ କମିଶନ ସଦସ୍ୟ ଭାବେ ମୋତେ ନିଯୁକ୍ତ କରାଯାଇଥିବାରୁ ଏହାକୁ ଗ୍ରହଣ କରୁଛି। ଏହା ଦେଶ ଓ ମୋ ପାଇଁ ଏକ ବଡ଼ ସମ୍ମାନ’ ବୋଲି ଉଷା ତାଙ୍କ ପ୍ରତିକ୍ରିୟାରେ କହିଛନ୍ତି।