ନୂଆଦିଲ୍ଲୀ,୨୧।୧: ଦିଲ୍ଲୀ ବିଧାନସଭା ନିର୍ବାଚନର ନାମାଙ୍କନ ପତ୍ର ଦାଖଲର ଶେଷ ଦିନରେ ଆମ ଆଦମୀ ପାର୍ଟି(ଏଏପି)କୁ ବଡ଼ ଝଟ୍କା ଲାଗିଛି। କାଣ୍ଟର ବିଧାୟକ କମାଣ୍ଡୋ ସୁରେନ୍ଦ୍ର ସିଂହ ମଙ୍ଗଳବାର ଏଏପିରୁ ଇସ୍ତଫା ଦେଇଥିବା ଜଣାପଡ଼ିଛି। ଏଏପିରୁ ଇସ୍ତଫା ଦେବା ନେଇ ସେ ଟୁଇଟ ଜରିଆରେ ସମସ୍ତଙ୍କୁ ଜଣାଇଛନ୍ତି। ସେ ଲେଖିଛନ୍ତି, ଅତ୍ୟନ୍ତ ଦୁଃଖୀ ହୋଇ ସେ ଏଏପିରୁ ଇସ୍ତଫା ଦେଇଛନ୍ତି। ଏବେ ସେ ଏନ୍ସିପିର ଟିକେଟରୁ ନିର୍ବାଚନ ଲଢ଼ିବେ ବୋଲି ଶୁଣିବାକୁ ମିଳିଛି। ସୂଚନାଯୋଗ୍ୟ, ଚଳିତ ନିର୍ବାଚନରେ ତାଙ୍କୁ ଟିକେଟ ନ ମିଳିଥିବାରୁ ସେ ଅସନ୍ତୋଷ ପ୍ରକାଶ କରିଥିଲେ। ଚଳିତ ଥର ତାଙ୍କ ସ୍ଥାନରେ ବିରେନ୍ଦ୍ର ସିଂହ କାଦୟାନଙ୍କୁ ଏଏପି ଟିକେଟ ଦେଇଥିଲା। କମାଣ୍ଡୋ ସୁରେନ୍ଦ୍ର ୨ଥର ଦିଲ୍ଲୀ କାଣ୍ଟରୁ ନିର୍ବାଚନ ଜିତି ସାରିଛନ୍ତି।