ନୂଆଦିଲ୍ଲୀ, ୧୮।୬(ପି.ଟି.)- ଏସିଆନ ଫୁଟବଲ କନ୍ଫେଡେରେଶନ(ଏଏଫସି)ର ୧୬ ବର୍ଷରୁ କମ୍ ଚାମ୍ପିୟନଶିପ୍ ପାଇଁ ଭାରତ ପୁଲ୍-୩ରେ ସ୍ଥାନ ପାଇଛି। ପ୍ରତିଯୋଗିତା ଏଏଫ୍ସି ହାଉସ କୁଆଲାଲମ୍ପୁରଠାରେ ଗୁରୁବାରଠାରୁ ଆରମ୍ଭ ହେବ। ତାସ୍କେଣ୍ଟରେ ଅନୁଷ୍ଠିତ ପ୍ରତିଯୋଗିତାର ଗ୍ରୁପ‘ବି’ରେ ଶୀର୍ଷସ୍ଥାନ ହାସଲ କରି ଭାରତ ଏହି ଟୁର୍ନାମେଣ୍ଟ ପାଇଁ ଯୋଗ୍ୟତା ହାସଲ କରିଥିଲା। ଭାରତୀୟ ଯୁବ ଦଳ ୩ ମ୍ୟାଚରେ ୧୦ ଗୋଲ ଦେଇଥିବାବେଳେ ଗୋଟିଏ ଗୋଲ ବରଣ କରି ୭ ପଏଣ୍ଟ ପାଇଥିଲା। ଏଥିରେ ଉଜବେକିସ୍ତାନ, ବାହାରିନ ଓ ତୁର୍କମେନିସ୍ତାନ ଭାରତର ପ୍ରତିଦ୍ୱନ୍ଦ୍ୱୀ ଥିଲେ।
ଆଗାମୀ ପ୍ରତିଯୋଗିତା ପାଇଁ ପୁଲ୍-୩ରେ ଭାରତ ସହିତ ଇରାନ, ୟେମେନ ଓ ସୌଦୀ ଆରବ ସ୍ଥାନ ପାଇଛନ୍ତି। ପୁଲ୍-୧ରେ ବାହାରିନ, ଜାପାନ, ତାଜିକସ୍ତାନ ଓ ଦକ୍ଷିଣ କୋରିଆ, ପୁଲ-୨ରେ ଅଷ୍ଟ୍ରେଲିଆ, ଉତ୍ତର କୋରିଆ, ଇଣ୍ଡୋନେସିଆ ଓ ଓମାନ ଏବଂ ପୁଲ୍-୪ରେ ଚାଇନା, ଉଜ୍ବେକିସ୍ତାନ, କାତାର ଓ ୟୁଏଇ ସ୍ଥାନ ପାଇଛନ୍ତି। ”ଆମେ ଡ୍ର ଉଠାଣକୁ ଆଗ୍ରହର ସହିତ ଅପେକ୍ଷା କରିଥିଲୁ। ଯୋଗ୍ୟତା ପର୍ଯ୍ୟାୟରେ ଉଜ୍ବେକିସ୍ତାନକୁ ପଛରେ ପକାଇ ଦେଇ ଖେଳାଳିମାନେ ଦକ୍ଷତାର ପ୍ରମାଣ ଦେଇଛନ୍ତି। ଆଗକୁ ତୀବ୍ର ପ୍ରତିଦ୍ୱନ୍ଦ୍ୱିତା ହେବାକୁ ଥିବାରୁ ସେମାନେ ନିଜକୁ ପ୍ରମାଣିତ କରିବାର ସମୟ ଆସିଛି“ ବୋଲି ମୁଖ୍ୟ କୋଚ୍ ବିବିଆନୋ ଫର୍ନାଣ୍ଡିଜ୍ ପ୍ରକାଶ କରିଛନ୍ତି। ଏଏଫସି ୧୬ ବର୍ଷରୁ କମ୍ ଚାମ୍ପିୟନଶିପ ଫାଇନାଲ୍ସରେ ଭାରତ କ୍ରମାଗତ ୩ୟ ଏବଂ ଓଭରଅଲ୍ ୯ମ ଥରପାଇଁ ପ୍ରବେଶ କରିଛି। ୨୦୧୮ରେ ଭାରତୀୟ ଯୁବଦଳ ୧୭ ବର୍ଷରୁ କମ୍ ଫିଫା ବିଶ୍ୱକପ ଯୋଗ୍ୟତାଠାରୁ ଗୋଟିଏ ବିଜୟ ଦୂରରେ ରହିଥିଲା। କ୍ୱାର୍ଟର ଫାଇନାଲରେ ଦଳ ଏକମାତ୍ର ଗୋଲରେ ଦକ୍ଷିଣ କୋରିଆଠାରୁ ପରାଜିତ ହୋଇଥିଲା। ପୂର୍ବରୁ ୨୦୦୨ରେ ମଧ୍ୟ ଭାରତ କ୍ୱାର୍ଟର ଫାଇନାଲ ଖେଳିଥିଲା। ବର୍ତ୍ତମାନର ଦଳ କ୍ରମାଗତ ୮ଟି ଅନ୍ତର୍ଜାତୀୟ ମ୍ୟାଚରେ ଅପରାଜେୟ ରହିଛି।
